Malachi 4

Ilonggo (Maayong Balita nga Biblia (2012))

← Chapter 3 Jump to:

1Ang Ginoo sang mga hangaway nagasiling, “Yari karon, ang adlaw magaabot nga ang tanan nga bugalon kag ang malaut nga mga tawo masunog subong sang dagami. Sa sadto nga adlaw masunog sila, kag wala gid sing may mabilin sa ila.

2Pero kamo nga nagatuman sa akon, ang akon gahom sa pagluwas magabutlak sa inyo subong sang adlaw, kag magaayo sa inyo subong sang pag-ayo sang silak sang adlaw. Manginhilway kamo kag malipayon subong sang mga tinday sang baka nga ginpagwa sa toril.

3Pagadag-on ninyo ang malaut, kag manginsubong sila sang yab-ok sa inyo mga dapadapa, sa adlaw nga himuon ko ini.

4“Dumdoma ninyo ang mga gintudlo sang akon alagad nga si Moises, ang mga kasugoan kag mga pagsulondan nga ginhatag ko sa iya sa Bukid sang Sinai nga dapat tumanon sang tanan nga mga tawo sang Israel.

5“Pero sa wala pa mag-abot ang daku kag makakulogmat nga adlaw sang Ginoo, ipadala ko sa inyo si Elias nga propeta.

6Pasag-ulion niya ang mga ginikanan kag mga anak, kay kon indi, magaabot ako kag laglagon ko ang inyo pungsod.”

← Chapter 3 Jump to: