Malachi 2

Ilonggo (Maayong Balita nga Biblia (2012))

← Chapter 1 Jump to: Chapter 3 →

1Ang Ginoo sang mga hangaway nagasiling sa mga pari, “Ini nga sugo para sa inyo:

2Kinahanglan pasidunggan ninyo ako paagi sa inyo ginahimo. Kon indi ninyo pagpamatian ang akon ginasiling, dayon pagapakamalauton ko kamo. Pakamalauton ko ang mga butang nga inyo ginabaton. Kon sa bagay, ginpakamalaut ko na ini tungod kay wala ninyo ginasapak ang akon sugo.

3Pagasilutan ko ang imo mga kaliwat kag inusnos ko ang inyo mga guya sa ipot sang mga hayop nga inyo ginahalad, kag akon kamo ipanghaboy sa tinumpukan sang ipot.

4Dayon mahibaluan ninyo nga ako naghatag sa inyo sini nga sugo, agod ang akon kasugtanan sa mga pari nga mga kaliwat ni Levi indi malapas.

5“Sa akon kasugtanan nagsaad ako sa ila sing kabuhi kag kauswagan, kag amo ini ang ginhatag ko sa ila agod magtahod sila sa akon. Sang una nagtahod sila kag nagkahadlok sa akon.

6Gintudlo nila ang matarong kag indi ang sayop. Nagkabuhi sila suno sa akon kabubot-on. Wala lamang sila naghimo sing matarong, kundi ginbuligan man nila ang madamo sa pag-untat sa paghimo sang kalautan.

7Katungdanan sang mga pari ang pagtudlo sang matuod nga pagkilala sa Dios. Ang mga tawo dapat magkadto sa ila sa paghibalo sang akon kabubot-on, tungod kay sila amo ang mga manugbalita sang Ginoo sang mga hangaway.

8“Pero karon kamo nga mga pari naglipas sa husto nga dalan. Ang inyo pagpanudlo nagpatalang sa madamo sa paghimo sing sayop. Ginlapas ninyo ang kasugtanan nga akon ginhimo upod sa inyo.

9Gani, tungod sini, himuon ko kamo nga mangintalamayon sa mga Israelinhon, tungod kay wala kamo nagatuman sang akon kabubot-on, kag kon magtudlo kamo sa akon mga tawo, may pinilian kamo.”

10Indi bala nga kita tanan may isa lamang ka amay? Indi bala nga isa lang ka Dios ang nagtuga sa aton? Karon ngaa bala ginalapas ta ang aton mga saad sa isa kag isa, kag ngaa bala ginatamay ta ang kasugtanan nga ginhimo sang Dios sa aton mga katigulangan?

11Ang mga tawo sang Juda naglapas sang ila saad sa Dios, kag naghimo sang makangilil-ad nga butang sa Jerusalem kag sa bug-os nga pungsod. Ila gindagtaan ang Templo nga ginahigugma sang Ginoo. Ang mga lalaki nagpangasawa sang mga babayi nga nagasimba sa dumoluong nga mga dios.

12Kabay nga kuhaon sang Ginoo halin sa katilingban sang Israel ang bisan sin-o nga nagahimo sini, kag indi gid sia pagtugotan nga manginbahin liwat sa mga halad nga ginadulot sang aton pungsod sa Ginoo sang mga hangaway.

13Yari pa ang isa ka butang nga inyo ginahimo. Ginatabunan ninyo sing mga luha ang altar sang Ginoo, paagi sa inyo paghinibi kag mga panalambiton, tungod kay wala na niya ginabaton ang inyo mga halad nga ginadulot sa iya.

14Nagapamangkot kamo kon ngaa wala na niya ginabaton ini. Tungod kay iya nahibaluan nga wala mo gintuman ang imo saad sa imo ginpangasawa sang ikaw pamatan-on pa. Sia amo ang imo kapihak sang dughan, kag wala mo gintuman ang imo saad sa iya, bisan nga nagsaad ka sa Dios nga manginmatutom ka sa iya.

15Wala bala kamo gin-isa sang Dios sa lawas kag sa espiritu? Ano bala ang iya tinutuyo sini? Agod may mga anak kamo nga matuodtuod gid nga mga tawo sang Dios. Gani mag-andam kamo sa inyo mga kaugalingon, nga wala sing isa sa inyo nga maglapas sang iya saad sa iya asawa.

16Ang Ginoo nga Dios sang Israel nagasiling, “Ginakaakigan ko ang pagbulagay, naakig ako kon ang isa sa inyo maghimo sining mapintas nga butang sa iya asawa. Gani mag-andam kamo sa inyo kaugalingon, kag indi ninyo paglapason ang inyo saad nga manginmatutom sa inyo kaugalingon nga asawa.”

17Ginpakapuyan ninyo ang Ginoo sang inyo mga hambal. Pero nagapamangkot kamo, “Sa ano nga paagi ginpakapuyan namon ang Ginoo?” Paagi sa inyo pagsiling, “Ang Ginoo sang mga hangaway nagahunahuna nga ang tanan nga nagahimo sing malaut maayo, kon sa bagay ang Ginoo nalipay sa ila.” Ukon sa inyo pagpamangkot, “Diin bala ang Dios nga kuno matarong?”

← Chapter 1 Jump to: Chapter 3 →