1 Thessalonians 1

Ilonggo (Ang Biblia (1982))

Jump to: Chapter 2 →

1Si Pablo, si Silvano, kag si Timoteo, Sa iglesia sang mga taga-Tesalonica sa Dios nga Amay kag Ginoong Jesu-Cristo: Ang bugay sa inyo kag paghidait.

2Nagapasalamat kami sa Dios sa gihapon tungud sa inyo tanan, nga nagasambit sa inyo sing masunsun sa amon mga pangamuyo,

3nga nagapanumdum sa atubangan sang aton Dios kag Amay sang inyo buhat sang pagtoo kag pagpangabudlay sang paghigugma kag pagkalig-on sang paglaum sa aton Ginoong Jesu-Cristo.

4Kay amon nahibaloan, mga kauturan nga hinigugma sang Dios, nga pinili niya kamo;

5kay ang amon maayong balita wala mag-abut sa inyo sa polong lamang, kondi man sa gahum kag sa Espiritu Santo kag sa bug-os nga pagsalig. Nahibaloan ninyo kon ano nga sari sang mga tawo kami sa inyo tunga tungud sa inyo.

6Kag kamo nanginmanug-ilog sa amon kag sa Ginoo, kay nagbaton kamo sang polong sa dakung kapipit-an, nga may kalipay sa Espiritu Santo;

7sa bagay nga nanginhuwaran kamo sa tanan nga nagatoo sa Macedonia kag sa Acaya.

8Kay indi lamang ang polong sang Ginoo nagguub gikan sa inyo sa Macedonia kag Acaya, kondi ang inyo pagtoo sa Dios naglapnag sa tagsa ka duug, sa bagay nga wala na kami sing kinahanglan maghambal sing bisan ano.

9Kay sila ila nagasugid nahanungud sa amon kon paano ang inyo pagbaton sa amon, kag kon paano ang pagliso ninyo pa Dios gikan sa mga diosdios, sa pag-alagad sa buhi kag matuud nga Dios,

10kag sa paghulat sa iya Anak gikan sa langit, nga iya ginbanhaw, si Jesus nga nagaluwas sa aton sa kasingkal nga magaabut.

Jump to: Chapter 2 →