1 Thessalonians 4

Ilonggo (Ang Biblia (1982))

← Chapter 3 Jump to: Chapter 5 →

1Sa katapusan, mga kauturan, nagapakilooy kag nagalaygay kami sa inyo sa kay Ginoong Jesus, nga subong sang natun-an ninyo sa amon kon paano nga dapat kamo maggawi kag magpahamuut sa Dios, subong nga nagagawi kamo, magbugana kamo sing labi kag labi pa.

2Kay nahibaloan ninyo kon anong mga tugon ang amon ginhatag sa inyo paagi sa Ginoong Jesus.

3Kay ini amo ang kabubut-on sang Dios, ang inyo pagkabalaan: nga maglikaw kamo sa pagkamakihilawason;

4nga ang tagsa sa inyo mahibalo mag-angkon sang iya kaugalingon nga asawa sa pagkabalaan kag kadungganan,

5indi sa unudnon nga kailigbon subong sang mga Gentil nga wala makakilala sa Dios;

6nga walay tawo nga maglakbang, kag maglimolimo sa iya utud sa amo nga butang, kay ang Ginoo amo ang manugtimalus sini tanan nga butang, subong nga amon ginpaandaman sing maligdong kamo nga daan.

7Kay ang Dios wala magtawag sa aton nga sa pagkadimatinlo, kondi sa pagkabalaan.

8Busa ang nagasikway sini, wala nagasikway sang tawo kondi sang Dios, nga nagahatag sa inyo sang iya Espiritu Santo.

9Apang nahanungud sa gugma sa paghiliutud wala kamo sing kinahanglan nga ang bisan sin-o magsulat sa inyo, kay kamo gid natudluan sang Dios nga maghigugmaanay;

10kag matuud gid ginahigugma ninyo ang tanan nga kauturan sa bug-os nga Macedonia. Apang nagalaygay kami sa inyo, mga kauturan, nga magbugana kamo sing labi kag labi pa,

11sa pagtinguha sa pagpakalinong, sa paghimo sang inyo kaugalingon nga buluhaton, kag sa pagpangabudlay sa inyo mga kamut, subong nga gintugyanan kamo namun;

12agud nga pagtahuron kamo sang mga tagaluwas, kag indi magsandig sa iban.

13Apang buut kami, mga kauturan, nga makahibalo kamo nahanungud sa mga nagakatolog, agud nga indi kamo magkasubo subong sang iban nga walay paglaum.

14Kay sanglit nagatoo kita nga si Jesus napatay kag nabanhaw, subong man, paagi kay Jesus, ang mga nagakatolog dalhon sang Dios kaupud niya.

15Kay ini ginasiling namun sa inyo sa polong sang Ginoo, nga kita nga mga buhi, nga nabilin tubtub sa pag-abut sang Ginoo, indi mag-una sa mga nagakatolog.

16Kay ang Ginoo gid magakunsad gikan sa langit nga may singgit sang pagmando, sa tingug sang puno nga manugtunda, kag sa budyong sang Dios. Kag ang mga napatay kay Cristo mabanhaw sing una;

17niyan kita nga mga buhi, nga nabilin, sagmiton sing tingub upud sa ila paibabaw sa mga panganud sa pagsugata sa Ginoo sa kahawaan; kag niyan manginkaupud kita sing dalayon sa Ginoo.

18Busa maglinipayay kamo sa sining mga polong.

← Chapter 3 Jump to: Chapter 5 →