1 Thessalonians 2

Ilonggo (Ang Biblia (1982))

← Chapter 1 Jump to: Chapter 3 →

1Kay kamo inyo, mga kauturan, nakahibalo nga ang amon pagduaw sa inyo indi walay pulus;

2apang bisan nakaantus na kami kag ginpakahuy-an sa Filipos, subong nga nahibaloan ninyo, nagmasidla kami sa aton Dios sa pagpahayag sa inyo sang maayong balita sang Dios sa dakung pagpakigsumpung.

3Kay ang amon pagpangabay indi gikan sa sayup ukon sa pagkadimatinlo, ukon sa daya;

4kondi subong nga pinakamaayo kami sang Dios nga pagsaligan sang maayong balita, sa amo nagapamolong kami, indi nga nagapahamuut sa mga tawo, kondi sa pagpahamuut sa Dios nga nagatilaw sang amon mga tagiposoon.

5Kay wala gid kami naggamit sing mga polong sang pag-olog-olog, subong nga inyo nahibaloan, ukon sing isa ka pamalibad sang pagkadaluk, subong nga saksi ang Dios;

6ukon nagpangita kami sang himaya gikan sa mga tawo, bisan gikan sa inyo ukon sa iban, bisan kami kuntani makabuut sa pagkinahanglan sa inyo subong nga mga pinadala ni Cristo.

7Apang malolo kami sa tunga ninyo, subong sang yaya nga nagabatiti sang iya mga magamay.

8Gani, sanglit nga nagahandum sa inyo sing mahigugmaon, nahamuut kami sa pagpaambit sa inyo indi lamang sang maayong balita sang Dios kondi man sang amon mga kaugalingon, bangud nga nanginmahal gid kamo sa amon.

9Kay nakadumdum kamo sang amon pagpangabudlay kag kasakit, mga kauturan; nagpangabudlay kami sa adlaw kag gab-i, agud nga indi namun mapabug-atan ang bisan sin-o sa inyo, samtang nagwali kami sa inyo sang maayong balita sang Dios.

10Kamo mga saksi, kag ang Dios man, kon daw ano kabalaan kag katarung kag kadisalawayon ang amon paggawi ayon sa inyo nga mga tomoloo;

11kay nahibaloan ninyo kon paano, subong sang amay sa iya mga anak, naglaygay kami sa tagsa sa inyo kag nagpabaskug sa inyo kag nagpanugyan sa inyo

12sa paggawi sing takus sa Dios, nga nagatawag sa inyo sa iya kaugalingon nga ginharian kag himaya.

13Kag tungud sini kami man nagapasalamat sa Dios sa walay langan, nga sang pagbaton ninyo sang polong sang Dios nga inyo nabatian sa amon, ginbaton ninyo indi subong sang polong sang mga tawo kondi nga sa pagkamatuud amo gid ini, ang polong sang Dios, nga nagapanghikot man sa inyo nga mga nagatoo.

14Kay kamo, mga kauturan, nanginmanug-ilog sang mga iglesia sang Dios kay Cristo Jesus nga yadto sa Judea; kay kamo man nag-antus sang amo nga mga butang sa inyo kaugalingon nga mga kasimanwa subong nga sila nag-antus sa mga Judio,

15nga nagpatay kay Ginoong Jesus kag sang mga manalagna, kag nagtabog sa amon, kag wala nagapahamuut sa Dios kag nagasumpung sa tanan nga tawo

16sa pagdumili sa amon sa pagpamolong sa mga Gentil agud nga maluwas sila—sa pagpuno sa gihapon sang talaksan sang ila mga sala. Apang ang kasingkal sang Dios nag-abut sa ila tubtub sa katapusan!

17Apang sanglit kami, mga kauturan, nahamulag sa inyo sa halip-ot nga tion, sa nawung kag indi sa tagiposoon, nagpaninguha kami sing labi pa gid nga may daku nga handum sa pagtan-aw sang inyo nawung;

18bangud nga buut kami kuntani makadto sa inyo—ako, si Pablo, sa liwat kag liwat—apang si Satanas nagsablag sa amon.

19Kay ano bala ang amon paglaum ukon kalipay ukon purungpurung sang paghimaya sa atubangan sang aton Ginoong Jesus sa iya pag-abut? Indi bala kamo gid?

20Kay kamo amo ang amon himaya kag kalipay.

← Chapter 1 Jump to: Chapter 3 →