1 Timothy 3

Ilonggo (Ang Biblia (1982))

← Chapter 2 Jump to: Chapter 4 →

1Matuud ang pinamolong: Kon ang bisan sin-o nagahandum sang palangakoan sang manugtatap, nagahandum sia sing maayong hilikuton.

2Karon ang manugtatap kinahanglan magdisalabdongon, bana sang isa ka asawa, mahaganhaganon, but-anan, dungganon, masinapopohon, sampaton sa pagpanudlo,

3dipalahobog, dimakiawayon kondi malolo, dimabinangigon, kag dimahigugmaon sang cuarta.

4Kinahanglan magdumala sia sing maayo sang iya kaugalingon nga panimalay, nga nagatatap sang iya mga anak nga magpasakup kag magmatinahoron sila sing bug-os;

5kay kon ang tawo indi makahibalo magdumala sang iya kaugalingon nga panimalay, paano bala ang pag-atipan niya sang iglesia sang Dios?

6Dili sia bag-ong pinaliso, basi kon magpabugal sia kag maholog sa katagudilian sang yawa;

7labut pa kinahanglan nga sia tahuron sang mga tagaluwas, basi kon maholog sia sa kahuluy-an kag sa siod sang yawa.

8Ang mga diacono subong man kinahanglan magtalahoron, diduha sing hinambalan, dipalainum sing alak, didalok sang daug;

9kinahanglan huptan nila ang tinago sang pagtoo sa putli nga kaisipan.

10Kag sila man pagtilawan anay; ugaling mangindiacono sila kon sila disalawayon.

11Subong man ang mga babayi kinahanglan magtalahoron, mga dimapatopatoon, kondi mahaganhaganon, matutum sa tanan nga butang.

12Kinahanglan ang mga diacono makaisa lamang makasal, kag magdumala sila sing maayo sang ila mga anak kag ila mga panimalay;

13kay ang mga nagaalagad sing maayo subong nga mga diacono nagahiagum sa ila kaugalingon sing pagkahalangdon kag dakung kasidla sa pagtoo nga yara kay Cristo Jesus.

14Nagalaum ako sa pagkara sa imo sa madali, apang nagasulat ako sa imo sining mga pagtudlo agud nga,

15kon magdugay ako, mahibaloan mo kon paano ang dapat paggawi sang isa sa panimalay sang Dios, nga amo ang iglesia sang Dios nga buhi, ang haligi kag pamakud sang kamatooran.

16Sa pagkamatuud, nagatu-ad kita, daku ang tinago sang aton pagtoloohan: Ang Dios napahayag sa unud, ginpakamatarung sa Espiritu, nakita sang mga manugtunda, ginwali sa tunga sang mga Gentil, gintoohan sa kalibutan, ginbayaw sa himaya.

← Chapter 2 Jump to: Chapter 4 →