1 Timothy 4

Ilonggo (Ang Biblia (1982))

← Chapter 3 Jump to: Chapter 5 →

1Karon ang Espiritu nagasiling sing hayag nga sa olihi nga mga tion ang iban magatalikud sa pagtoo nga nagatalupangud sa nagapatalang nga mga espiritu kag sa mga pagtolon-an sang mga yawa,

2paagi sa pagkasalimpapaw sang mga tawong butigon, nga ginhirohan ang ila mga kaisipan,

3nga nagadumili sang pagpangasawa kag nagasogo sa paglihi sa mga kalan-on nga gintuga sang Dios nga pagbatonon nga may pagpasalamat sang mga nagatoo kag nakakilala sang kamatooran.

4Kay ang tagsa ka tinuga sang Dios maayo, kag walay bisan ano nga isikway kon batonon nga may pagpasalamat;

5kay ginpakabalaan ini niyan sang polong sang Dios kag pangamuyo.

6Kon mapahamtang mo ining mga pagtudlo sa mga kauturan, manginmaayo ka nga alagad ni Cristo Jesus, nga ginsagud sa mga polong sang pagtoo kag sang maayong pagtolon-an nga nasonod mo.

7Dumilii ang dibalaan kag walay pulus nga patopato nga mga sugilanon. Maghanas ka sa pagkadiosnon;

8kay ang paghanas nga lawasnon may diotay nga kapuslanan, apang ang pagkadiosnon kapuslanan sa tanan nga butang, nga may saad sang kabuhi karon kag sa palaabuton.

9Matuud ang pinamolong kag takus sang bug-os nga pagbaton.

10Kay sa sining katuyoan nagapangabudlay kita kag nagapanikasug, kay ang aton paglaum nahamtang sa Dios nga buhi, nga amo ang Manluluwas sang tanan nga tawo, labi na gid sang mga nagatoo.

11Isogo kag ipanudlo ining mga butang.

12Dili pagpatamaya ang bisan sin-o sang imo pagkapamatan-on, kondi magmanginhuwaran ka sa mga nagatoo, sa polong, sa paggawi, sa gugma, sa pagtoo, sa kaputli.

13Tubtub nga ako mag-abut, mag-ukud ka sa pagbasa sang kasulatan sa dayag, sa pagpangwali, sa pagpanudlo.

14Dili pagpatumbayai ang hiyas nga yara sa imo, nga ginhatag sa imo paagi sa tagna sang gintakdungan ka sang mga tigulang sang ila mga kamut.

15Himoa ining mga katungdanan, ukuri ini sila, agud nga ang imo pag-uswag makita sang tanan.

16Andami ang imo kaugalingon kag ang imo pagpanudlo; magpadayon sa sina, kay sa paghimo sini maluwas mo ang imo kaugalingon kag ang mga nagapamati sa imo.

← Chapter 3 Jump to: Chapter 5 →