1 Timothy 5

Ilonggo (Ang Biblia (1982))

← Chapter 4 Jump to: Chapter 6 →

1Dili pagsabdonga ang magulang pa sa imo nga tawo kondi laygayi sia subong nga amay; kabiga ang manghud pa sa imo nga mga lalaki subong nga mga utud,

2ang magulang pa sa imo nga mga babayi subong nga mga iloy, ang manghud pa sa imo nga mga babayi subong nga mga utud, sa bug-os nga kaputli.

3Tahura ang balo nga mga babayi nga mga balo nga matuud.

4Kon ang balong babayi may mga kabataan ukon mga apo, paton-a sila sing una sang ila diosnon nga katungdanan ayon sa ila kaugalingon nga panimalay kag sa pagbalus sa ila mga ginikanan; kay ini kalahamut-an sa itololok sang Dios.

5Sia nga matuud nga balong babayi, kag pinatumbayaan, nagalaum sa Dios kag nagapadayon sa mga pag-ampo kag mga pangamuyo sa adlaw kag gab-i;

6apang ang babayi nga nagapangabuhi sa patuyang patay na sa nagakabuhi pa sia.

7Isogo ini, agud nga magdisalabdongon sila.

8Kon ang bisan sin-o wala nagasakdag sang iya mga himata, labi na gid sang iya kaugalingon nga panimalay, napanghiwala niya ang pagtoo kag malain pa sa dimatinoohon.

9Walay listahon nga balong babayi nga kubus sa kan-uman ka tuig, kinahanglan nga sia nakasal sing makaisa lamang;

10kag kinahanglan nga napamatud-an sia sing maayo tungud sa maayong mga buhat niya, subong nga nakabatiti sang mga anak, nakapakita sang pagkamasapopohon, nakahugas sang mga tiil sang mga balaan, nakatabang sang mga napiotan, kag nakahimo sing maukud sang maayo sa tagsa ka bagay.

11Apang ang mga bataon nga balong babayi dumilian mo sa paglista; kay kon ang ila kinaugali nga balatyagon magbatok kay Cristo buut sila magpamana,

12kag sa amo may katagudilian sila kay ginsikway nila ang ila unang panaad.

13Labut pa, nagatoon sila sa paglandolando, nga nagapamalay-balay, kag indi lamang landolando kondi mga babaan kag mga mahilabtonon, nga nagapamolong sang indi dapat nila hambalon.

14Gani buut ko nga ang mga bataon nga mga balo magpamana, mag-anak, magdumala sang ila mga panimalay, kag indi maghatag sing kahigayonan sa kasumpung sa pagpasipala sa aton.

15Kay may iban nga naglipas nga nagsonod kay Satanas.

16Kon ang bisan sin-o nga babayi nga matinoohon may mga himata nga balong babayi, ipasakdag sila sa iya; dili pagpabug-atan ang iglesia, agud nga masakdag sini ang matuud nga balong mga babayi.

17Ang mga tigulang nga nagadumala sing maayo pag-isipon nga takus sa pilo nga kadungganan, labi na gid ang mga nagapangabudlay sa pagwali kag sa pagpanudlo;

18kay ang kasulatan nagasiling, “Dili mo pagbusalan ang baka nga nagalinas sang trigo,” kag, “Ang mamumugon takus sang iya sohol.”

19Dili magbaton sing panumbong batok sa isa ka tigulang luwas sa pagpamatuud sang duha ukon tatlo ka saksi.

20Kon nahanungud sa mga nagapadayon sa pagpakasala, sabdonga sila sa atubangan sang tanan, agud nga ang iban mahadluk.

21Ginatulinan ko ikaw sa atubangan sang Dios kag ni Cristo Jesus kag sang mga manugtunda nga pinili, nga bantayan mo ining mga pagsolondan sa walay pinilian, nga wala nagahimo sing bisan ano sa pagpasulabi.

22Dili magmadagmit sa pagtakdung sang mga kamut, bisan magpakig-ambit sa mga sala sang iban; tipigi ang imo kaugalingon sa kaputli.

23Dili na mag-inum sing tubig lamang, kondi maggamit sing diotay nga alak tungud sa imo suluksuluk kag sa imo masunsun nga mga balatian.

24Ang mga sala sang iban nga mga tawo dayag, nga nagapadulong sa paghukom, apang ang mga sala sang iban magapakita sa olihi.

25Sa amo man ang maayo nga mga buhat dayag; kag bisan indi sila dayag, indi sila malipdan.

← Chapter 4 Jump to: Chapter 6 →