Micah 3

Ilonggo (Ang Biblia (1982))

← Chapter 2 Jump to: Chapter 4 →

1Kag nagsiling ako: Pamati, kamo nga mga pangolo ni Jacob kag mga manugdumala sang panimalay sang Israel! Indi bala sa inyo ang pagkilala sang katarungan?—

2kamo nga nagadumut sang maayo kag nagahigugma sang malaut nga nagaak-ak sa ila sang panit nila, kag sang ila unud sa ila mga tul-an;

3nga nagakaon man sang unud sang akon katawohan, kag nagakakas sa ila sang panit nila, kag nagaboong sang ila mga tul-an, kag nagatuktuk sa ila subong nga sa kolon, subong sang unud sa sulud sang kawa.

4Niyan magatuaw sila sa Ginoo, apang indi sia magsabat sa ila; lipdan niya sa ila ang iya nawung sa sadto nga tion, sono sa ila paghimo sing malaut sa ila mga binuhatan.

5Amo ini ang ginasiling sang Ginoo nahanungud sa mga manalagna nga nagapasayup sa akon katawohan, nga nagakagat sa ila mga ngipon kag nagasinggit “Paghidait,” apang ang bisan sin-o nga wala nagabutang sa ila mga baba nagaaman gid sila sing inaway batok sa iya.

6Busa manginkagab-ihon sa inyo, agud nga wala kamo sing palanan-awon, kag manginkadudulman sa inyo, agud nga indi kamo makapamakot. Ang adlaw magatunud sa mga manalagna, kag ang adlawon manginmadulum sa ila;

7ang mga manugpanan-aw mahuy-an, kag ang mga manugpamakot malibogan; sila tanan magatabon sang ila mga bibig, kay wala sing sabat gikan sa Dios.

8Apang nahanungud sa akon, puno ako sang gahum, tungud sa Espiritu sang Ginoo, kag sang paghukom kag sang gahum, sa pagpahayag kay Jacob sang iya paglalis kag sa Israel sang iya sala.

9Pamati sini, kamo nga mga pangolo sang panimalay ni Jacob kag mga manugdumala sang panimalay sang Israel, nga nagakangil-ad sang katarungan kag nagapatiko sang tanan nga katadlungan,

10ginapatindug nila ang Sion nga may dugo kag ang Jerusalem nga may kalautan.

11Ang iya mga pangolo nagahukom tungud sa balus, ang iya mga sacerdote nagatudlo tungud sa hinakay, ang iya mga manalagna nagapamakot tungud sa cuarta; apang nagasandig sila sa Ginoo kag nagasiling, “Wala bala ang Ginoo sa tunga naton? Wala sing malaut nga magaabut sa aton.”

12Busa tungud sa inyo aradohon ang Sion subong sang latagon; ang Jerusalem mangintinumpok, kag ang bukid sang balay subong sang mataas nga mga duug sang talon.

← Chapter 2 Jump to: Chapter 4 →