Psalms 107

Ilonggo (Ang Biblia (1982))

← Chapter 106 Jump to: Chapter 108 →

1O pasalamati ang Ginoo, kay maayo sia; kay ang iya malig-on nga paghigugma nagapadayon sa gihapon!

2Magsiling sing subong ang mga gintubus sang Ginoo, nga gintubus niya sa kamut sang kasumpung

3kag gintipon pagowa sa mga duta, gikan sa sidlangan kag sa katundan, gikan sa aminhan kag sa bagatnan.

4Nagdalangdalang sila sa kamingawan sa dalan nga desierto, wala sila makakita sing banwa nga puluy-an;

5nagutum kag nauhaw, ang ila kalag napunaw sa ila.

6Niyan nagtuaw sila sa Ginoo sa ila kalisdanan, kag ginluwas niya sila sa ila mga kasakitan;

7gintuytuyan man niya sila sa matadlong nga dalan, agud nga makakadto sila sa banwa nga puluy-an.

8Kabay kuntani nga magdayaw ang mga tawo sa Ginoo tungud sang iya malig-on nga paghigugma, kag sang iya makatilingala nga mga binuhatan sa mga anak sang mga tawo!

9Kay ginabusug niya ang kalag nga ginalangkag, kag ginapuno niya sing kaayohan ang kalag nga gutum.

10Ang mga naglingkod sa kadudulman kag sa landong sang kamatayon, nga nagapus sa kapipit-an kag sa salsalon,

11bangud nga nagbato sila sa mga polong sang Dios, kag nagtamay sang laygay sang Labing Mataas.

12Busa ginpapaubus niya nga may kabudlayan ang ila mga tagiposoon; napukan sila, kag wala gid sing matabang.

13Niyan nagtuaw sila sa Ginoo sa ila kalisdanan, kag ginluwas niya sila sa ila mga kasakitan;

14ginpagowa niya sila gikan sa kadudulman kag sa landong sang kamatayon, kag ginbugras ang ila mga gapus.

15Kabay kuntani nga ang mga tawo magdayaw sa Ginoo tungud sang iya malig-on nga paghigugma, kag sang iya makatilingala nga mga binuhatan sa mga anak sang mga tawo!

16Kay ginbingkal niya ang mga gawang nga saway, kag gin-utud ang mga pintal nga salsalon.

17Ang iban nagbuangbuang bangud sang sala sang ila pagkamalalison, kag bangud sang ila mga kalautan ginapiotan;

18ang ila kalag nagakangil-ad sang tanan nga bagay sang kalan-on; kag nagapalapit sila sa mga gawang sang kamatayon.

19Niyan nagtuaw sila sa Ginoo sa ila kalisdanan, kag ginluwas niya sila sa ila mga kasakitan;

20ginapadala niya ang iya polong, kag ginaayo sila, kag ginaluwas sila sa ila mga kalaglagan.

21Kabay kuntani nga ang mga tawo magdayaw sa Ginoo tungud sang iya malig-on nga paghigugma, kag sang iya makatilingala nga mga binuhatan sa mga anak sang mga tawo!

22Kag magdolot sila sang mga halad sang pagpasalamat, kag magpahayag sang iya mga binuhatan nga may pag-inamba!

23Ang iban nagdulhog sa dagat sa mga sakayan, nga nagapatikang sa malapad nga mga tubig;

24ini sila nakakita sang mga binuhatan sang Ginoo, sang iya mga kalatingalahan sa kadadalman.

25Kay nagasogo sia, kag ginapahuyup ang mamadlus nga hangin, nga nagabayaw sang kabaluran niya.

26Nagatimbook sila sa kalangitan, nagapaubus sila sa mga kadadalman; ang ila mga kalag nagakatunaw bangud sang kalisdanan;

27nagadulingduling sila kag nagakapukanpukan kaangay sang hobog nga tawo, kag wala sila sing mahimo.

28Niyan nagatuaw sila sa Ginoo sa ila kalisdanan, kag ginapagowa niya sila sa ila mga kasakitan;

29ginapalinaw niya ang unus, sa bagay nga nagatonong ang kabaluran.

30Niyan nagakasadya sila bangud nga matinong sila, gani ginadala niya sila sa ila ginahandum nga dungkaan.

31Kabay nga ang mga tawo magdayaw sa Ginoo tungud sang iya malig-on nga paghigugma, kag sang iya makatilingala nga mga binuhatan sa mga anak sang mga tawo!

32Pagpakataason nila sia man sa katilingban sang katawohan, kag dayawon sia sa lingkoran sang mga tigulang.

33Ang mga suba ginabaylo niya nga kamingawan, ang mga tuburan sang tubig nga duta nga kigas,

34ang duta nga mabungahon nga desierto nga maasin, tungud sang pagkamalaut sang mga nagapuyo sa iya.

35Ginabaylo niya ang kamingawan nga danaw sang tubig, ang duta nga kigas nga mga tuburan sang tubig.

36Kag didto ginapapuyo niya ang mga gutum, agud nga mag-aman sila sing banwa nga puluy-an;

37magsab-ug sila sing mga latagon, kag magtanum sing mga ulubasan, kag magkuha sila sing mga bunga sang patubas.

38Ginapakamaayo man niya sila sa bagay nga nagabuad sila sing daku; kag wala niya pagtuguti nga magbuhin ang ila kahayupan.

39Sang liwat ginbuhinan sila kag ginpapaubus paagi sa pagpigus, kalisud, kag pagkagha,

40sia nagaula sing pagtamay sa mga principe kag ginapadalangdalang sila sa mamingaw nga walay dalan;

41apang ginatib-ong niya ang mga nawad-an gikan sa kapipit-an, kag ginahimo sia nga mga panimalay kaangay sa panong.

42Makakita sini ang mga matadlong kag magkasadya; kag ang tanan nga kalautan magatakup sang iya baba.

43Ang bisan sin-o nga maalam magaandam sa sining mga butang; pamalandongon nila ang malig-on nga paghigugma sang Ginoo.

← Chapter 106 Jump to: Chapter 108 →