Psalms 68

Ilonggo (Ang Biblia (1982))

← Chapter 67 Jump to: Chapter 69 →

1Magtindug ang Dios, mag-aplaag ang iya mga kaaway; magpalagyo man sa atubangan niya ang mga nagadumut sa iya!

2Subong sang aso nga ginapalid, sa amo taboga sila; subong sang talo nga nagakatunaw sa atubangan sang kalayo, sa amo mawala ang malauton sa atubangan sang Dios!

3Apang magkasadya ang matarung; maghimaya sila sa atubangan sang Dios; magkalipay sila nga may kasadya!

4Amba kamo sa Dios, amba sing mga pagdayaw sa iya ngalan; pataas sing dalan tungud sa iya nga nagasakay palatas sa mga desierto; ang iya ngalan ang Ginoo, maghimaya kamo sa atubangan niya!

5Amay sang mga ilo kag hukom sang mga balong babayi amo ang Dios sa iya balaan nga puluy-an.

6Ang Dios nagapapuyo sa mga panimalay sang nagaisaisa; ginadala sa kauswagan ang mga binilanggo; apang ang mga mabinatoon nagapuyo sa duta nga kigas.

7O Dios, sang nag-una ka sa imo katawohan, sang naglatas ka sa kamingawan, Sela

8ang duta nagkurug, ang mga langit man nagpatupa sing ulan, sa atubangan sang Dios; yadto nga Sinai nagkurug sa atubangan sang Dios, ang Dios sang Israel.

9Ikaw, O Dios, nagpadala sing bugana nga ulan; ginpalig-on mo ang imo panublion, sang linapyo ini;

10ang imo katilingban nagpuyo didto; sa imo pagkaayo, O Dios, nagtigana ka sa mga imol.

11Ang Ginoo nagahatag sang polong; ang mga babayi nga nagabantala sang mga balita daku nga kadam-an:

12“Ang mga hari sang mga hangaway nagapalagyo, nagapalagyo sila!” Ang mga babayi nga nagapabilin sa puluy-an nagabahinbahin sang inagaw,

13kon nagahigda kamo sa tunga sang mga palasudlan sang carnero— kasubong ini sang mga pakpak sang salampati nga naputus sing pilak, kag ang iya mga kuyus sing dalag nga bulawan.

14Sang ginpaaplaag sang Makaako ang mga hari didto, kasubong ini sang nagatupa nga nieve sa Salmon.

15Ang bukid sang Dios amo ang bukid sang Basan; ang mataas nga bukid amo ang bukid sang Basan!

16Kay ngaa bala nagapasiplat kamo, kamo nga mga bukid nga mataas, sa bukid nga naluyagan sang Dios nga sa iya puluy-an, hoo, diin ang Ginoo magapuyo sa gihapon?

17Ang mga kangga sang Dios duha ka pulo ka libo, mga linibolibo, ang Ginoo gikan sa Sinai yara sa tunga nila sa santuario.

18Nagkayab ka sa hitaas, gindala mo ang mga bihag, nagbaton ka sing mga dolot sa mga tawo, sa mga mabinatoon man, agud nga magpuyo kaupud nila ang Ginoong Dios.

19Pakamaayohon ang Ginoo, nga nagadala adlawadlaw sang aton lulan; ang Dios aton kaluwasan. Sela

20Ang aton Dios amo ang Dios sang kaluwasan; kag iya sang Dios, nga Ginoo, ang pagluwas sa kamatayon.

21Apang ang Dios magaboong sang olo sang iya mga kaaway, sang bohokon nga bagol sang nagapadayon pa sa iya pagkamalalison.

22Ang Ginoo nagsiling, “Gikan sa Basan pabalikon ko, pabalikon ko sila gikan sa mga kadadalman sang dagat,

23agud nga maligis mo sila nga nagasalup ang imo tiil sa dugo, agud nga ang mga dila sang imo mga ido may ila nga bahin gikan sa kaaway.”

24Nakita nila ang imo mga paglakat, O Dios, ang mga paglakat sang akon Dios, akon Hari, pasulud sa santuario—

25ang mga manug-amba nag-una, ang mga manuglanton nagsonod, sa tunga nila ang mga dalaga nga nagapatonog sang mga pandereta:

26“Pakamaayohon ninyo ang Dios sa mga katilingban, ang Ginoo, kamo nga gikan sa tuburan sang Israel!”

27Didto yara ang diotay nga Benjamin nga ila manugdumala, ang mga principe sang Juda kag ang ila kabon, ang mga principe sang Zabulon, ang mga principe sang Neftali.

28Ang imo Dios nagsogo sang imo kusug; palig-ona, O Dios, ang imo ginhimo tungud sa amon.

29Bangud sang imo templo sa Jerusalem ang mga hari magadala sa imo sing mga dolot.

30Sabdonga ang sapat nga talonon sang kabagaasan, ang kadam-an sang mga baka nga lalaki pati ang mga tinday sang baka sang mga katawohan. Tapaka ang mga nagahamkon sa buhis; paaplaaga ang mga katawohan nga nagakalipay sa inaway.

31Ang mga principe magagowa sa Egipto; ang Etiopia magadalidali sa pag-untay sang iya mga kamut sa Dios.

32Kamo nga mga ginharian sang duta, mag-amba sa Dios; O amba kamo sing mga pagdayaw sa Ginoo, Sela

33sia nga nagasakay sa ibabaw sang langit sang mga langit, nga gikan sa dumaan; yari karon, ginamitlang niya ang iya tingug, mabaskug nga tingug.

34Ipahanungud ninyo ang kabakud sa Dios, ang iya pagkahalangdon sa ibabaw sang Israel, kag ang iya kusug yara sa kahawaan.

35O Dios, makakulugmat ka kutub sa imo balaan nga mga duug, ang Dios sang Israel, nagahatag sia sing kabakud kag gahum sa iya katawohan. Pakamaayohon ang Dios!

← Chapter 67 Jump to: Chapter 69 →