Jeremiah 23

Chhattisgarhi

1“ओ चरवाहामन ऊपर हाय, जऊन मन मोर चराई के भेड़मन ला नास करत हें अऊ तितिर-बितिर करत हें!” यहोवा ह ये घोसना करत हे।

2एकरसेति यहोवा, इसरायल के परमेसर ह मोर मनखेमन के देखरेख करइया चरवाहामन ला ये कहत हे: “तुमन मोर झुंड ला तितिर-बितिर कर दे हव अऊ ओमन ला भगा दे हव अऊ ओमन के देखरेख नइं करे हव, एकरसेति तुम्हर दुस्ट काम के कारन, मेंह तुमन ला सजा दूहूं,” यहोवा ह ये घोसना करत हे।

3“ओ जम्मो देस, जिहां मेंह अपन झुंड ला भगा दे रहेंव, ओ देसमन ले मेंह खुद ओमन के बांचे भाग ला इकट्ठा करहूं अऊ ओमन ला ओमन के चराई म वापिस लानहूं, जिहां ओमन फूलहीं-फरहीं अऊ गनती म बढ़हीं।

4मेंह ओमन बर चरवाहामन ला ठहिराहूं, जेमन ओमन के देखरेख करहीं अऊ ओमन न तो फेर डरहीं या भय खाहीं अऊ न ही ओमा ले कोनो गंवाही,” यहोवा ह ये घोसना करत हे।

5“ओ दिनमन आवत हें,” यहोवा ह घोसना करत हे, “जब मेंह दाऊद बर एक धरमी मनखे ला बढ़ाहूं, ओह एक राजा होही, जऊन ह बुद्धिमानी से राज करही अऊ देस म नियाय अऊ धरम के काम ला करही।

6ओकर दिनमन म यहूदा के मनखेमन ला बंचाय जाही अऊ इसरायली मनखेमन सुरकछित बसे रहिहीं। ओला ये नांव के दुवारा पुकारे जाही: यहोवा हमर धरमी उद्धारकर्ता।

7“एकरसेति देखव, ओ दिनमन आवत हें,” यहोवा ह घोसना करत हे, “जब मनखेमन फेर नइं कहिहीं, ‘यहोवा के जिनगी के कसम, जऊन ह इसरायलीमन ला मिसर देस ले निकाल लानिस,’

8पर ओमन ये कहिहीं, ‘यहोवा के जिनगी के कसम, जऊन ह उत्तर के देस ले अऊ ओ जम्मो देस ले इसरायल के संतानमन ला ले आईस, जिहां ओमन ला भगा दे रिहिस।’ तब ओमन अपन खुद के देस म रहिहीं।”

9अगमजानीमन के बारे म: मोर हिरदय ह मोर भीतरे-भीतर टूटत हे; मोर जम्मो हाड़ामन कांपत हें। मेंह एक मतवार मनखे सहीं अंव, एक बलवान मनखे सहीं, जेकर ऊपर मंद के नसा छा गे हवय। एकर कारन ए यहोवा अऊ ओकर पबितर बचन।

10ये देस ह बेभिचारीमन ले भरे हवय; सराप पड़े के कारन, ये देस ह सूखा पड़े हे अऊ सुन्ना जगह के चराईमन सूख गे हवंय। अगमजानीमन दुस्टता के जिनगी जीयथें अऊ अपन ताकत के उपयोग अनियाय के काम म करत हें।

11“अगमजानी अऊ पुरोहित दूनों परमेसर ला छोंड़ दे हवंय; अऊ त अऊ मेंह अपन मंदिर म ओमन के दुस्टता ला देखथंव,” यहोवा ह घोसना करत हे।

12“ये खातिर ओमन के रसता म फिसलन होही; ओमन ला अंधियार म डाल दिये जाही अऊ उहां ओमन गिरहीं। जऊन बछर ओमन ला सजा दिये जाही ओ बछर, मेंह ओमन ऊपर बिपत्ति लानहूं,” यहोवा ह घोसना करत हे।

13“सामरिया के अगमजानीमन के बीच म मेंह ये खराप चीज देखेंव: ओमन बाल देवता के नांव म अगमबानी करिन अऊ मोर इसरायली मनखेमन ला डहार ले भटका दीन।

14अऊ यरूसलेम के अगमजानीमन के बीच म मेंह कुछू भयंकर चीज देखे हंव: ओमन बेभिचार करथें अऊ पाखंडी जिनगी जीथें। ओमन दुस्टमन के हांथ ला मजबूत करथें, जेकर कारन ओमा के एको जन भी अपन दुस्टता ला नइं छोंड़य। ओमन मोर बर सदोम के मनखे सहीं अंय; अऊ यरूसलेम के मनखेमन अमोरा के मनखेमन सहीं अंय।”

15ये खातिर सर्वसक्तिमान यहोवा ह अगमजानीमन के बारे म ये कहत हे: “मेंह ओमन ला करू जेवन खवाहूं अऊ जहरवाला पानी पीयाहूं, काबरकि यरूसलेम के अगमजानीमन ले अभक्ति ह जम्मो देस म फईल गे हवय।”

16सर्वसक्तिमान यहोवा ह ये कहत हे: “अगमजानीमन तुमन ले जऊन अगमबानी करत हें, ओला झन सुनव; ओमन तुमन ला लबारी के बात ले भर दीहीं। ओमन यहोवा के मुहूं ले नइं, पर अपन ही मन से दरसन के बात ला गोठियाथें।

17जऊन मनखेमन मोला तुछ समझथें, ओमन ला येमन कहत रहिथें, ‘यहोवा ह कहत हे: तुमन ला सांति मिलही।’ अऊ ओ जम्मो, जऊन मन अपन हठी मन के मुताबिक चलथें ओमन ला येमन कहिथें, ‘तुम्हर कोनो हानि नइं होवय।’

18पर येमा के कोन ह यहोवा के बचन ला देखे या सुने बर ओकर सभा म ठाढ़ होय हवय? कोन ह ओकर बचन ला सुने अऊ धियान दे हवय?

19देखव, यहोवा के आंधी ह कोरोध म फट जाही, एक बवंडर ह दुस्टमन के मुड़ ऊपर घुमत आवत हे।

20जब तक यहोवा ह अपन हिरदय के उदेस्य ला पूरा नइं कर लीही, तब तक ओकर गुस्सा ह सांत नइं होवय। अवइया दिनमन म तेंह ये बात ला साफ-साफ समझबे।

21मेंह ये अगमजानीमन ला नइं पठोय हंव, तभो ले ओमन अपन संदेस बताय बर दऊड़त गे हवंय; मेंह ओमन ले नइं गोठियाय हंव, तभो ले ओमन अगमबानी करे हवंय।

22पर यदि ओमन मोर सिकछा म चले होतिन, त ओमन मोर मनखेमन ला मोर बचन सुनाय रहितिन अऊ मोर मनखेमन ला ओमन के खराप चालचलन अऊ ओमन के दुस्ट काममन ले बंचा ले होतिन।

23“का मेंह सिरिप लकठा रहे म ही परमेसर अंव,” यहोवा ह घोसना करत हे, “अऊ दूरिहा रहे म परमेसर नो हंव?

24गुपत जगह म कोन ह छुप सकथे कि मेंह ओला नइं देख सकंव?” यहोवा ह ये घोसना करत हे। “का मेंह स्वरग अऊ धरती ला भरा-पूरा नइं रखंव?” यहोवा ह घोसना करत हे।

25“मेंह अगमजानीमन के गोठ ला सुने हंव, जऊन मन मोर नांव म ये कहिके लबारी अगमबानी करथें, ‘मेंह एक सपना देखे हंव! मेंह एक सपना देखे हंव!’

26ये लबरा अगमजानीमन अपन ही मन के भरम ला अगमबानी करके कहिथें; येमन के मन म येह कब तक चलत रहिही?

27ओमन सोचथें कि ओमन जऊन सपना के बात एक-दूसर ला बताथें, ओला सुनके मोर मनखेमन मोर नांव ला भुला जाहीं, जइसने कि ओमन के पुरखामन बाल देवता के अराधना करके मोर नांव ला भुला गे रिहिन।

28जऊन अगमजानी ह सपना देखे हवय, ओह अपन सपना ला बतावय, पर जेकर करा मोर बचन हवय, ओह ओ बचन ला ईमानदारी से सुनावय। काबरकि भूंसा अऊ अनाज के दाना के का मेल?” यहोवा ह ये घोसना करत हे।

29“का मोर बचन ह आगी सहीं नो हय,” यहोवा ह घोसना करत हे, “अऊ का ओह हथौड़ा सहीं नो हय, जऊन ह चट्टान ला कुटा-कुटा कर देथे?

30“एकरसेति” यहोवा ह घोसना करत हे, “मेंह ओ अगमजानीमन के बिरूध हंव, जऊन मन मोर बचन समझके एक-दूसर के बचन ला चोरा लेथें।”

31यहोवा ह घोसना करत हे, “हव, मेंह ओ अगमजानीमन के बिरूध हंव, जऊन मन अपन खुद के बात कहिथें अऊ तभो ले ये बताथें, ‘यहोवा ह घोसना करत हे।’

32सच म, मेंह ओमन के बिरूध हंव, जऊन मन झूठा सपना के अगमबानी करथें,” यहोवा ह ये घोसना करत हे। “मेंह ओमन ला न तो पठोय हंव अऊ न ही ठहिराय हंव, तभो ले ओमन मोर मनखेमन के आघू म अगमबानी करथें अऊ बेकार के अपन लबारी बात ले मोर मनखेमन ला भरमाथें। ओमन ले मोर मनखेमन ला कोनो फायदा नइं होवय,” यहोवा ह घोसना करत हे।

33“जब ये मनखे, या कोनो अगमजानी या कोनो पुरोहित तुम्हर ले पुछथे, ‘यहोवा ले का संदेस मिले हवय?’ त ओमन ला कह, ‘का संदेस?’ यहोवा ह ये घोसना करत हे, ‘मेंह तुमन ला तियाग दूहूं।’

34यदि कोनो अगमजानी या कोनो पुरोहित या कोनो अऊ दावा करथे, ‘यहोवा ले ये संदेस आय हवय,’ त मेंह ओमन ला अऊ ओमन के घराना ला सजा दूहूं।

35तुमन ले हर एक जन अपन संगी अऊ आने इसरायलीमन ले ये बात कहिते रहिथे: ‘यहोवा ह का जबाब दे हवय?’ या ‘यहोवा ह का कहे हवय?’

36पर तुमन ये झन कहव ‘यहोवा करा ले आय एक संदेस,’ काबरकि हर एक के बचन ह ओकर खुद के संदेस होथे। ये किसम ले तुमन जीयत परमेसर, यहोवा, हमर सर्वसक्तिमान परमेसर के बचन ला तोड़-मरोड़ के कहिथव।

37तुमन अगमजानी ले अइसने पुछत रहव: ‘यहोवा ह तोला का जबाब दे हवय?’ या ‘यहोवा ह का कहे हवय?’

38हालाकि तुमन दावा करथव, ‘यहोवा ले ये संदेस आय हवय,’ यहोवा ह ये कहत हे: तुमन ये बचनमन के उपयोग करेव, ‘यहोवा ले ये संदेस आय हवय,’ हालाकि मेंह तुमन ला कहे हंव कि तुमन अइसने दावा झन करव, ‘यहोवा ले ये संदेस आय हवय।’

39एकरसेति, मेंह ये सहर सहित तुमन ला बिलकुल ही भुला जाहूं अऊ अपन आघू ले निकाल दूहूं, जेला कि मेंह तुमन अऊ तुम्हर पुरखामन ला देय हंव।

40मेंह तुम्हर ऊपर कभू खतम न होनेवाला कलंक लानहूं—कभू खतम न होनेवाला लज्जा, जेला कभू भुलाय नइं जाही।”

← Chapter 22 Jump to: Chapter 24 →