1 Corinthians 4

ibibio

← Chapter 3 Jump to: Chapter 5 →

1Ke ntodo, akpena mme awo idat ñnyịn nte mme nditọufọk Krais ye mbon e-enọọhọ adudu ete ediọọñọ mme ndedịbe ñkpọ Abasi.

2Ana nte mbon e-enọọhọ utọ adudu ami enam akpanikọ.

3Ñkereke me ndufo me esop awo abiire ikpe mmi; ke akpanikọ ami ke idem mmi mbiireke ikpe nnọ idem mmi.

4Esịd mmi ana inwañ-inwañ, ado ado inamma nọ ikpe antoppo miin. Abọọñ ado andikpe ikpe mmi.

5Ke ntak ado, kuubiire ikpe ke abaña ñkpọ ndomokeed; bet tutu Abọọñ adi. Anye ndin ayaadiyaara anwa-anwa se idịbe ke akịm anyʌñ ayaara akikere esịd mme awo. Ke ini ado amaakem, awo keed-e-keed ayaabọ itooro ato Abasi.

6Idahami, nditọeka, mmeben mme ñkpọ ami nnam udomo ñkpọ ke idem mmi ye Apọdọs ke ufọn ndufo, nọ atodo ndufo ekpeeb ito ñnyịn se ikọ ami awuọọñọ: “Kuubọhọ adaña se ewet etre.” Ke ntodo, ndufo idiitañña ase awo keed ikan ake awo mfen.

7Anie awo inam awo keed akpəghọ akan awo mfen? Nso-o ñkpọ ke afo anie a-afo muukubọọghọbọ? Ndin adieke adooho akebọọbọ, ntak akpọọhọ inua nte ñkpọ a-afo muukubọọghọbọ?

8Ñko ndufo emenie afịd se eyeyem! Ñko ndufo emekappa emọmọiyọ! Emedido mme andikaara, ñnyịn inieeghe ubọk do! Ubaha nte ndufo ekpenekkeke edo mme andikaara nọ ato do ñnyịn ñko ikeene ndufo ikaara!

9Antie miin nte Abasi aben ñnyịn mme abọsịd anịm edem udịm nte mbon e-edueeghe isop ñkpa ke asan. Enịm ñnyịn nte ñkpọ ñyọọ enọ afịd ekondo, mme enyere ye mme awo ñko.

10Ñnyịn idoñño ndisịme inọ Krais, ado ndufo emenekke enie aniọñ ke Krais! Ñnyịn imikop mmemidem, ado ndufo emekop uko! Ndufo emebọ ukpono, ado ñnyịn imibọ esuenne!

11Tutu asịm idahami, ñnyịn imikop abiọñ ye nsaditọñ, ñnyịn isịne ntaaha afọñ, ikama ñnyịn ke ukuud, ñnyịn inieeghe itie idʌñ.

12Ñnyịn iminam akpọsọñ utom ke idem ñnyịn. Ke ini emaisueeñ ñnyịn, ñnyịn idọọdiọñ; ke ini ekọbọke ñnyịn, ñnyịn iyọọyọ;

13ke ini etañña abʌd-abʌd ikọ ye ñnyịn, ñnyịn ibọọrọ ke eti usʌñ. Tutu asịm ini ami, ñnyịn imikappa ido mme nseseppe ñkpọ a-mbon ederimbod miiyemme aba.

14Ami ñwette ñwed ami mbo nọ buud imʌm ndufo, ado ñwet ñkpọ ndʌdutọñ, nte mme ndima nditọ mmi.

15Akpesʌk ado nte afo anieeghe tọsịn andikpeme duop ke Krais, afo unieeghe uwak ete, sia ke Krais Yisọs ami mmaakappa ndo ete ndufo ato ke eti etob.

16Ke ntak ado mmikpeiye nte yak ndufo emkpebe miin.

17Sia ntak ado anam ndọñ Timoti, adima ayịn mmi a-anamma akpanikọ ke Abọọñ, nte ibịne ndufo. Anye ayaitoiyo ndufo usʌñ edu uwem ke Krais Yisọs, a-asañake akekem ke se ami ñkpeeb ke afịd-afịd ufọkabasi.

18Ndusʌk ndufo emedikokko idem, nte ñkpọ ebooho ke ami ndieeghe ibịne ndufo.

19Ado ami ñyaasọsọp ndisoobo ye ndufo, ke mfọn Abasi, ndin ami ñyaaduuñọ ndiọọñọ se mbon ñkokkoidem ami etaañ ye se utọ adudu ke ammọ enieeñe.

20Sia abio ubọọñ Abasi idooho akpọsọñ utaañ ikọ, ado ado adudu.

21Nso-o ke ndufo ekpema? Ekpema ndi ye ikpa me ke ima ye ifuuro-ifuuro sịbidịd?

← Chapter 3 Jump to: Chapter 5 →