1 Corinthians 5

ibibio

← Chapter 4 Jump to: Chapter 6 →

1Etañ ke akpanikọ ete ke use ye efịbe ye ñkpọ ntodo mmọdo ke ufọọd ndufo, kpa utọ adooho itịppeke ke atu mbon a-mmiidiọọñọke Abasi: Awodeen akenie ewana ye anwaan ete amọ.

2Ado ado ñkpọ ñwọkinua! Nte ikpinaaha efʌhọ ke esịd ndufo enyʌñ ebịne awo a-anamma utọ ñkpọ ami esio ke atu ndufo?

3Akpesʌk ado ami membaaha do ye ndufo ke ikpọkidem, ami mmọdo ye ndufo ke sịbidịd. Ami mmebebiire ikpe nnọ andikinam utọ ñkpọ ado, kpa nte ñkpekebaaha ke idem mmi.

4Ke ini ndufo ebohoke ke anyịñ Abọọñ Yisọs ye ami ñko ke sịbidịd, adudu Abọọñ Yisọs anyʌñ aba do,

5isaana utọ awo ami inọ Setan nọ ato do ebiad abʌkidem amọ efep enyʌñ enyaaña sịbidịd amọ ke usen Abọọñ.

6Ñkpọkinua ndufo ifọnnọ. Ado nte ndufo idiọọñọke ke ata etək-etək yis anam nọ ndomuyo atịt?

7Sio akaan yis ado fep ke ufọọd ndufo nọ ndufo edo ufa ndomuyo ake yis mmiisịneke, kpa naña ndufo enyʌñ edoñño. Sia ewa Krais, andido ayịn edọñ Usọrọ Nsaña Mboyo ñnyịn.

8Ke ntom, yak ñnyịn inam adinam Usọrọ ami, ado idooho ye akaan yis, yis ake udu ye ndoom, ado uyo ake mmiinieeghe yis, uyo ake adisana esịd ye akpanikọ.

9Mmaiwet ndufo ke ñwed mmi nte ikiinie ewana ye mbon use,

10ye mbon ederimbod ami e-edoññoke mme abʌd-abʌd awo, mme adọrọ itọñ mme mbon ñwo, mme akpono ndem. Ke ntodo akpena ewuọọñọ ekpọñ ederimbod ami.

11Ado ami ñwet idahami nte yak ndufo ekụụnie ewana ye awo a-adatta idem amọ nte ayịnete ado asịn efịbe, me anam use, me akpa mmịn, me anam ñwo, me adọrọ itọñ, me akpono ndem, me abiad awo anyịñ. Kuuwana ubọk udia ye utọ awo ado.

12Nso-o imbeghe miin adibiire ikpe nnọ mbon a-mmiibaaha ke esịd ufọkabasi? Nte inaaha ebiire ikpe enọ mbon e-ebaaha ke esịd ufọkabasi?

13Abasi ayaakpe ikpe mbon e-ebaaha ke ederimbod. “Ebịne idiọọk awo esio ke atu ndufo.”

← Chapter 4 Jump to: Chapter 6 →