1 Timothy 2

ibibio

← Chapter 1 Jump to: Chapter 3 →

1Ami mmekpeiye nte, ata akpa ñkpọ, yak enam mme ebeeñe, mme akam, ñkpeubọk ye ekọọm enọ afịd awo,

2enọ mme mbọọñ ye afịd mme ikpọawo ke adaha ukara, nọ ato do ñnyịn inie emem ye ifuuro, idat ini ñnyịn edidu uwem awo Abasi ke usʌñ a-anieeghe ukpono.

3Ami afọn, anyʌñ anem Abasi Andinyaaña ñnyịn,

4a-Ayemme afịd awo enie adinyaaña, enyʌñ enie ifiọk akpanikọ.

5Abasi keed kpọd aba ye akpeemem keed ke ufọọd Abasi ye awo, anye ke idem amọ anyʌñ ado awo, kpa Krais Yisọs,

6a-akenọọhọ idem amọ nte ñkpọ ufak nnọọ ukeed awo, enyʌñ enọ etob ami ke ini amaakem.

7Ke ntak ami ke ekendot miin isọn utom ye abọsịd, ami ntañ akpanikọ, nsʌhọke nsu, mmaana ndo akwọrọ ikọ mbaña ata mbuọdidem nnọ mme Yentaid.

8Mmeyem ideen ebọñ akam ke afịd itie, ebenne ndisana ubọk ke enyọñ, ekeenie iyadesịd mme eniin.

9Ukem ado ñko mmeyem ibaan esịnne afọñ a-adooto ukpono ye uku, idooho ke adidọk ided me usiine mme ñkpọ mbana idem me kood ye nsọñudua itiad, mme ke edisịne nsọñudua afọñ,

10ado ke nti utom, adotto mme ibaan ebooho ke mmimọ ikpono Abasi.

11Ñko, yak awonwaan akpeeb ñkpọ ke ndopuyo ye nsuukidem.

12Nnyịmmeke awonwaan ado andikpeeb, nyʌññọ nnyịmme awonwaan akara awodeen; ana awonwaan adodop uyo.

13Sia eketo ebot Adam ndin edibot Iif.

14Idooho Adam ke ekebiaaña, ado awonwaan ke setan akebiañña, anyʌñ anam anye ado anam idiọọk ñkpọ.

15Ado eyaenyaaña ibaan ke ntak uman ayịn, adieke ammọ ekaaha iso eba ke mbuọdidem, ima, adisana uwem ye mfadidem.

← Chapter 1 Jump to: Chapter 3 →