1 Timothy 4

ibibio

← Chapter 3 Jump to: Chapter 5 →

1Sịbidịd atʌm atañ ate ke ini utịd eyo, mme awo eyaeduọññọ ekpọñ mbuọdidem ekeene mme nsu-nsu sịbidịd ye ukpeebñkpọ ndiọi sịbidịd.

2Mme utọ ukpeeb ado eto ke ndubịk mme asʌhọ nsu e-ebenne nsu ekpeep nte akpanikọ, esịd ammọ anyʌñ adoro ufiọn nte ñkpọ e-edatta ikañ adomutịm efọp.

3Ekpeeb ebo yak awo akuudọ ndọ, enyʌñ ebiọñọ awo adidia nsio-nsio ndidia, a-Abasi akebotto anọ mbon e-enịmme ke akpanikọ, enyʌññọ ediọọñọ akpanikọ, abo edia ye esịd ekọọm.

4Afịd-afịd se Abasi akebot afọn, ibaaha se awo akpesịn adieke ebọọhọ edia ye ekọọm,

5koro ikọ Abasi ye akam enam ammọ esana.

6Adieke afo akpeebe nditọete mme ñkpọ ami, afo ayaado eti asañautom Krais Yisọs, e-emaekebọọk ke akpanikọ abaaha ke mbuọdidem ye nti ukpeebñkpọ a-afo akeeneke.

7Kuukpañ utọñ unọ mbʌk a-Abasi miisịneke ke esịd ye ntañ a-ñkaan ibaan etoppo, ado kpeeb adidu uwem ke uteñe Abasi.

8Awo adisịne ikpọkidem afọn, ado uteñe Abasi afọn akan ke afịd ñkpọ, anyʌñ akama nti ñkpọ anọ uwem ami, ye uwem anye a-adiidi.

9Ikọ ami ado akpanikọ, anyʌñ adod se awo anyịmme ayọhọ-ayọhọ.

10Ke ntak ami ke ñnyịn ikpa utom, inyʌñ inwanake adikọọñ idodanyen ñnyịn ke ndu-ndu Abasi, a-adooho Andinyaaña anọ afịd awo, akpan-akpan mme andinịm ke akpanikọ.

11Nọ ewʌhọ nyʌñ kpeeb mme ñkpọ ami.

12Kuuyak awo use ke ndek adat ke ado etəkayịn, ado do uwọd-ñkpọ nọ mme andinịm ke akpanikọ ke ikọ inua mfo, ke edu uwem mfo, ke ima, ke mbuọdidem ye ke edidu edisana uwem.

13Tutu ntịmme ndi, sịn ifịk kood ikọ Abasi anwa-anwa, kwọọrọ ikọ, nyʌñ kpekpeeb.

14Kuuduọọk enọ u-usịneke fiin ke idem, e-ekunọọhọ eto brọfesi idaha mme nyobioawo ekudotto ubọk.

15Tʌm nam mme ñkpọ ami; sịn idem mfo ayọhọ-ayọhọ, ma afịd awo ekịt ñkọd mfo.

16Kpeme uwem mfo ye ukpeebñkpọ mfo sịk-sịk. Sọọñọ yịre ke adinam utom ami nọ ato do afo anyaaña idem mfo, ye mbon e-ekoppo ikọ mfo.

← Chapter 3 Jump to: Chapter 5 →