2 Corinthians 1

ibibio

Jump to: Chapter 2 →

1Bọọd a-adooho mbed Krais Yisọs ke uduak Abasi, ye Timoti ayịnete ñnyịn, Ewet ñwed ami enọ ufọkabasi a-abaaha ke Kọrint ye afịd ikọd Abasi ke afịd Akaya.

2Mfọn ye emem Abasi Ete ñnyịn ye Abọọñ Yisọs Krais akpekap aba ye ndufo.

3Ekọọm anie Abasi, Ete Abọọñ ñnyịn Yisọs Krais, ete mbọm ye Ete afịd idọñesịd,

4i-idọññọ ñnyịn esịd ke afịd mfịna ñnyịn, nọ ato do ñnyịn ikan idọñ mbon e-ebaaha ke mfịna ye idọñesịd ake ñnyịn ke idem ñnyịn ibọọhọ ito Abasi.

5Sia, kpa naña mme ufen Krais aboiyo adʌk ke uwem ñnyịn, kpa ntodo, ato ke Krais, idọñesịd ñnyịn ayọhọ aduọi.

6Adieke ñnyịn ikịtte ukuud, ami ado nọ ndufo enie idọñesịd ye adinyaaña a-anamma ndufo enie ukeme edibiom ukem-ukem ndutʌkkọ a-ñnyịn inyʌññọ ikịt.

7Iminyʌñ inie idodanyen a-asọñọke ada, sia ñnyịn imidiọọñọ ite ke naña ndufo ewana ke ukuud ñnyịn, ntodo ke ndufo ewana ke idọñesịd ñnyịn.

8Ñnyịn iyemme ndufo enana ifiọk, nditọete, ebaña mfịna a-ñnyịn ikikịtte ke Esia. Ekifeefiik ñnyịn akpọsọñ-akpọsọñ akan naña ñnyịn ikpikan inie ukeme asịm idaha a-ñnyịn iduọọhọ idodanyen ibaña uwem.

9Ke akpanikọ imaikere ke esịd ñnyịn ke iyaikpañña. Ado aketịppe ntom mbaak ñnyịn idibuọd idem ke idem ñnyịn ado ibuọd idem ke Abasi a-anamma akpañkpa aset.

10Anye a-akinyaañake ñnyịn asio ke ekamba ñkpa, ayainyaaña ñnyịn. Ke anye ke ñnyịn inie idodanyen ite ke anye ayaakaiso inyaaña ñnyịn,

11naña ndufo ekinyaaña ñnyịn ke akam ndufo. Ndin uwak awo eyaenọ ekọọm ke iwuod ñnyịn ke mfọn a-anye afọnnọ ye ñnyịn ke ñkpeubọk uwak awo.

12Sia nduaak inua a-ñnyịn iduaaha ado ami, ikọ ntiense esịd ñnyịn atañña abo ke ñnyịn ikisañake ke akikere abʌkidem ado ke mfọn Abasi. Ñnyịn inyʌñ inam ntom, itooho ke ndufiọk ederimbod ado ato ke mfọn Abasi.

13Sia ñnyịn iwette ñkpọ se ndufo miidiikanna idiọọñọ se awuọọñọ. Iminie idodanyen ke,

14naña ndufo ediọọñọ ñnyịn ubaak-ubaak, eyaenyʌñ edidiọọñọ ñnyịn ayọhọ-ayọhọ ma ato do ndufo ekan ewọk inua ebaña ñnyịn kpa naña ñnyịn idiiwọk inua ibaña ndufo ke usen Abọọñ Yisọs.

15Sia mmaanie mbuọdidem ke ami, ñkeduak adise ndufo akpa ma ndufo edia udod ñkemba.

16Ñkeduak adidi adise ndufo ke ini ñkaaha Masidonia nnyʌñ ntịmme ndikịt ndufo ke unyọñọ Masidonia, ndin ndufo ediinnọ ñka Yudia.

17Ke ini ñkenamma akikere ami, me ñkenam anye mfefeere-mfefeere? Me ñkenam akikere ami ke ido ederimbod nọ ato do ke inweek keed ami mbo, “Ih, ih,” ye “Iyoo, Iyoo?”

18Sia Abasi adooho anam akpanikọ, ikọ a-ñnyịn ikwọrọke inọ ndufo idooho “Ih” ye “Iyoo.”

19Sia Ayịn Abasi, Yisọs Krais, a-ami ye Saidas ye Timoti ikikwọrọke ke atu ndufo, ikidooho “Ih” ye “Iyoo,” ado ke anye asʌk ado afịd-afịd ini “Ih.”

20Mme enwọñọ Abasi ekpewak naña ewawak ammọ edoñño “Ih” ke Krais. Ke ntodo, anyʌñ ato ke anye ñnyịn ibọọrọ “Amen” inọ Abasi ubọọñ.

21Idahami ado Abasi akenam ñnyịn ye ndufo isọọñọ ida ke Krais. Anye amaiyet ñnyịn adan

22anyʌñ inịm ñnyịn idiọọñọ inie Amọ ke idem ñnyịn. Anyʌñ ayaak Sịbidịd amọ asịn ke esịd ñnyịn nte ubiọñ anọ se idiidi.

23Mmekood Abasi mbo adido ntiense mmi, nte ke ami ñketre aditịmme ndi Kọrint mbaak ndinọ ndufo mfịna.

24Idooho nte ñnyịn ikaakara mbuọdidem ndufo, ado ñnyịn inam utom ye ndufo nọ enie idadesịd, sia ke mbuọdidem ke ndufo eda ke ñkpad iba.

Jump to: Chapter 2 →