2 Corinthians 13

ibibio

← Chapter 12 Jump to:

1Anye ami ado ayọhọ ñkenta a-ndiighe adise ndufo. “Afịd ikọ anaasọọñọ ada ke inua ntiense awo iba me ita.”

2Mmaabebem iso idʌt ndufo utọñ ke ini ñkebaaha ye ndufo ayọhọ ñkemba. Mmenyʌñ mmaana nnam ntodo idahami a-membaaha ye ndufo: Mmaanyọñ ndi, ndiifeene nnọ mbon emaekenam idiọọk ñkpọ ke ini akeboiyoke ye mbon mfen;

3sia ndufo eyemme idiọọñọ ke Krais aboiyo anto miin atañ mme ikọ ami. Anye idooho mmem-mmem ke adinam ñkpọ ye ndufo, ado anie adudu ke atu ndufo.

4Sia akpesʌk ado ekekọññọ anye ke krọs ke mmemidem, anye asʌk adodu uwem ke adudu Abasi. Kpa ntodo ñnyịn imimem idem ke anye, ado ke adudu Abasi, ñnyịn iyaidu uwem ye anye ke adinam ñkpọ inọọ ndufo.

5Iduuñọ idem ndufo ise me ndufo eba ke mbuọdidem; itʌm idomo idem ndufo. Nte ndufo idiọọñọke ke Krais Yisọs adọdʌñ ke idem ndufo? Miidooho ntodo, ke akpanikọ, ndufo iboiyoke udomo.

6Ndin mmedot anyen nte ke ndufo eyaediọọñọ ke ñnyịn iwuọhọ ubọk ñkaña.

7Idahami ñnyịn ibọñ akam inọ Abasi mbaak ndufo idinam se idiọọk, idooho ma mme awo ikịt ñnyịn nte nti awo, ado ma ñnyịn inam se inen akpesʌk ado abaaha nte ñnyịn ima idue.

8Ñnyịn ikanna adinam baaba ñkpọ ndomokeed adibiọọñọ akpanikọ, ado ida ke akpanikọ ikpọọñ.

9Ñnyịn idat esịd ke ini imemme ado ndufo emesọñ idem; akam ñnyịn ado yak ndufo ekappa efọn ema.

10Ntak ado ami ami ñwette mme ñkpọ ami ke ini ami membaaha ye ndufo; mbaak ke ini ndiidi ndisọñ ido ye ndufo ke ukara mmi, ukara a-Abọọñ akenọọhọ ate ndat nnam ndufo ekọt, idooho adidat isuan ndufo.

11Ke akpatre, nditọete mmi, itie sʌñ. Yak akikere ndufo ado adikappa mfọn mma, ikpañ utọñ ke ebeeñe mmi, inie esịd keed, idʌñ emem-emem. Ndin Abasi ima ye emem ayaaba ye ndufo.

12Ikọọm keed aken ye adisana ntʌminua.

13Afịd ikọd Abasi e-enọ ekọm.

14Yak mfọn Abọọñ Yisọs Krais, ye ima Abasi ye ewana Adisana Sịbidịd eba ye afịd ndufo.

← Chapter 12 Jump to: