Acts 24

ibibio

← Chapter 23 Jump to: Chapter 25 →

1Ndin usen ition amaakeboiyo, akwa aku Ananayas amaadika Siseria ye ubaak mme etubom, ye akpeikpe keed a-akekereke Tetudus enyʌñ ekama se ediitañ idian Bọọd edinọ adaiwuod ukara, Fediks.

2Ke ini ekoodo Bọọd adi, Tetudus amaaben ikọ ikpe amọ anịm ke iso Fediks ntom: “Nnyịn iminem esịd ke emem a-abaaha akpeene ke ukara mfo ye ukeme a-afo anieehe adida ñkịt ini iso, a-adatta mme ufa nti-ñkpọ adi ke abio ami.

3Ke afịd-afịd usʌñ me afịd itie, ata eti Fediks, ñnyịn imikịt inyʌñ ukọọm fiin ata eti-eti.

4Ado mbaak ñnyịn idufịna aba, imuukpe fiin ubọk ite yak afo akop ikọ ñnyịn ke mfọnido mfo ke etak ini.

5“Sia ñnyịn imiyaara ikịt ibo ke awo ami ado awo ntịme, anye anam nọ mme Yuu ke afịd ederimbod esiin ntịme. Anye ado aboiyo iso awo ke afịd mbon idọọk ñka Nasarin,

6anye ñko akedomo adiwuud tembịd: ke ntodo ñnyịn imaimʌm anye.

7Nnyịn ikpa ikibiire ikpe amọ naña mbed ñnyịn asaña. Ado Daisias a-akedooho adaiwuod amaadi ibọ ñnyịn anye ke ñkanubọk.

8Ama eduuñọ anye ke idem mfo, ayaakan adiọọñọ akpanikọ abaña afịd se ñnyịn itañ ami idian anye.”

9Mme Yuu mfen emaenyʌñ ediana edot anye ikọ adisọọñọ mbo ke se etañ ado akpanikọ.

10Ndin, ke ini adaiwuod ukara amaakeanọ idiọọñọ ke ubọk abo anye Bọọd atañ ikọ, Bọọd amaabọọrọ ate: “Sia mmediọọñọ mbo ke afo ado abiereikpe idịd ñkañ ami ke uwak isua, annem miin esịd adikañ idem mmi.

11Iboiyoke usen duob ye iba ndin ami ñkedọọk ñka Yerusedem adikpono Abasi, naña afo akeme adibịp ndiọọñọ.

12Mbon seindọt mii uyo ikiiñkịtte miin nte nniin eniin ye awo ke tembịd me adinam mme atu awo esịn ntịme ke sinakọk me ke itie ake adodo ke abio.

13Ammọ ibooho ikan itañ uwọt fiin ibo ke se mmimọ itañ indian miin ado akpanikọ.

14Ado mmenyịmme mbo ke ami ñkpono Abasi mme ete-ete ñnyịn ñkeene Usʌñ Krais, ammọ ebooho ke ado idiọọk ñka. Ami mmenịm afịd ñkpọ a-asañake akekem ye Ibed Moses e-ewette ke ñwed mme Brọfed,

15ñdin ami mmenie ukem idodanyen ke Abasi ukem nte ibon ami enieehe, nte ke afịd awo, nti ye ndiọi, eyaeset ke ñkpa.

16Ke ntodo, ami nsendodomo afịd ini adinam akikere esịd mmi ana inwañ-inwañ ke iso Abasi ye ke iso awo.

17“Ke uwak isua amaakeboiyo, ami mmaadi Yerusedem ye mme enọ adinọ mme uwueene ye enọ ima esịd.

18Mmaasaña ñkeene se ibed ayem ke ini e-ekeñkịtte ke afe tembịd naña nnam ñkpọ ami. Atu awo ikibaaha me ami, ñko ñkiisịnne mfịna.

19Ado emaebaaña mme Yuu e-eketooho Esia, a-akpenaaha nte eba mi nọ endot ikọ adieke ammọ enieeghe ñkpọ adidat imbiom miin ikpe.

20Ke abeehe ado, mbon e-ebaaha mi akpena etañ idiọọk ñkpọ ammọ ekekịtte ke idem mmi ke ini ñkedaaha ke iso esob Sanhidrin.

21Ibọhọke ñkpọ keed a-ñkebọññọ ñkpo ke ini nsʌkkọ nda ke iso ammọ mbo: ‘Ke abaña adised ke ñkpa ke ami nda ke iso ikpe mfịn ami.’ ”

22Ndin Fediks, a-amaakemeghe ye Usʌñ Krais amaasio ikpe anịm uson mfan, abo, “Ini Disias, etubom ekọñ amaadi, ami ñyaabiere ikpe mfo.”

23Anye amaanọ sentudiọn uyo abo ekpeme Bọọd, ado yak anye anie ifuuro anyʌñ ayak mme ufan amọ enọ anye se anye ayem.

24Ke usen ifañ amaakeboiyo, Fediks amaasaña ye anwaan amọ Drusida, awonwaan Yuu, adi. Anye amaadọñ ekekood Bọọd anyʌñ akpañ utọñ akop naña anye atañ ikọ abaña mbuọdidem ke Krais Yisọs.

25Daña Bọọd asʌkkọ atañ ikọ abaña adinenido, mfara ke idem ye ikpe a-adiidi, Fediks amaakop ndịk anyʌñ abo anye ate, “Ado akem diin! Amekeme ika. Ke ini a-adiifọn mme ami, ñyaadọñ ukood.”

26Kpa ke ukem-ukem ini ado anye amaadot anyen ate ke Bọọd ayainọ imọ ubọk edem, ke ntak ado anye amaasidọñ abo ekood Bọọd ndin-ndin anyʌñ anie nneme ye anye.

27Isua iba amaakeboiyo, Bọsiọs Festus amaadidat itie Fediks, ado sia Fediks akeyemme inam mfọn nnọ mme Yuu, anye amaayaak Bọọd asʌk asịne ke ufọk ñkpakọb.

← Chapter 23 Jump to: Chapter 25 →