1 Timothy 1

Ika 2018 Bible

Jump to: Chapter 2 →

1Mmẹ wụ Pọlụ de ẹkụkwọ-ozini. M wụ onyẹ-ozi pụ-ichẹn Kraịstị Jizọsị. Osolobuẹ hụn a zụọpụhanị ẹnyi lẹ Kraịstị wụ Jizọsị hụn wụ olilẹnya ẹnyi tumẹ m.

2M rị e dejẹnni Timoti wụ ezigbo nwa m imẹ okukwe. Ẹfọma lẹ omikẹn lẹ udọn Chuku-Nẹdi lẹ Kraịstị wụ Jizọsị Di-nwọnni-ẹnyi ya rịnị ị.

3Nọdị nwan Ẹfẹsọsụ kẹ m dọn gwa ị ogẹn m gi jẹnkọ Masẹdonia, kẹni ị gwa ndị hụ rị a kuzi ihiẹn wụlẹni ezioku akuzizilẹ ẹ;

4w'e gọnzilẹ ntịn ilu “ihiẹn-haịn” lẹ okẹn ịchọ-alị oku nwọnlẹni njẹndemẹ hụn e mẹ ịhịan a jụ ajụjụ-ajụjụ hụn nkẹ ịhịan e gi bi obibi okukwe Osolobuẹ gi e mẹ ihiẹn ẹ.

5I sikọ d'a gwa wẹ akuzizilẹ, kẹni ịhịan hụn ụzọ gi ihiẹn-ọsụsụọ gha obi rị mma pụha e bi, e gi ịhọrị rị mma lẹ okukwe ru akpakalị obi e bi.

6O nwọnọlẹ ndị latọ ihiẹn ndịnị, kpahu, sọnmẹ oku nwọnlẹni isi.

7Wẹ chọ nị wẹ a kuzi Iwu Mozizi, bụ aghọtanị wẹ ihiẹn wẹ rị e ku, e kushi ikẹn, amarịn wẹ ihiẹn Iwu gi ẹ ku.

8Ẹnyi a marịnghọ nị Iwu wụ ezigbo ihiẹn, omẹni ịhịan e gi ẹ mẹ ihiẹn furu ni wẹ gi ẹ e mẹ,

9marịn nị ẹlẹ ndị ezi-omumẹ kẹ wẹ tini iwu, kanị ndị-ejẹ lẹ ndị nnupụ-isi; ndị nwọnlẹni ihiẹn wẹ kpọ Osolobuẹ lẹ ndị e mẹ njọ; ndị e lelịa ihiẹn rị nsọ lẹ ndị ghalẹni e ro nke Osolobuẹ; ndị e gbu nẹdi wẹ mọbụ nnẹ wẹ ili lẹ ndị izighẹ;

10ndị ughẹrẹ lẹ ikẹnnyẹ wẹ lẹ ikẹnnyẹ e mẹ mgba lẹ ikpoho wẹ lẹ ikpoho e mẹ mgba; ndị e re ịhịan lẹ ndị e ṅọn ịhịan; ndị-ntụ lẹ ndị a shịa ẹri-ntụ — lẹzi ndị ọzọ ile e mẹ ihiẹn ọwụlẹ ya lẹ ezigbo nkuzi ghalẹni a dangbama.

11Ezigbo nkuzini rị imẹ oziọma hụn Osolobuẹ, Onyẹ hụ furu w'a ja mma, buche m ẹka.

12M rị a kpanmịn Kraịstị wụ Jizọsị Di-nwọnni-ẹnyi hụn ye m ikẹn m gi rị a rụn ọrụn, n'o weri m nọkẹ onyẹ o gi dọn ẹnya, we m ọrụn,

13ọsụọn'a nị m te kuja oku ẹ, kpokpo ndị nke ẹ, ye wẹ ụya ri. Kanị o mẹkwọnị m omikẹn, makẹni amarịn m ihiẹn m rị e mẹ ogẹn ahụn makẹni m'e ke kweri.

14Di-nwọnni-ẹnyi gi ẹka rị mma sọn m, mẹni m omikẹn ọda-ọda, wezi okukwe lẹ ihiẹn-ọsụsụọ rị imẹ Jizọsị ye m ọda-ọda.

15Okuni wụ ezioku furu w'a nabanhanchanrịn: “Kraịstị wụ Jizọsị bịa imẹ ụwa d'a zụọpụha ndị njọ” hụn o mẹ ni mmẹ kachanrịn njọ imẹ wẹ ile.

16Kanị, ufiri ẹ kẹ Osolobuẹ gi mẹni m omikẹn, mmẹ hụn kachanrịn njọ e mẹ, kẹni Kraịstị wụ Jizọsị gi m ghọsịchanrịn ndidin zu oke, gi m mẹ ihiẹn nleri, kẹni ndị ọzọ k'e kwerin'ẹ gi ẹ marịn nị wẹ nwẹn sikọ d'e nwọnzi ndụn itẹbitẹ.

17Eze Itẹbitẹ kẹ Osolobuẹ wụ! Eze ghalẹni a nwụn! Onyẹ wẹ ghalẹni e legha ẹnya! Chuku ohu sụọ rịnị! Mgbaye lẹ ọjịja-mma ya rịn'a jẹnrin ejẹn! Isẹẹ!

18Timoti nwa m, m rị e ye i iwu ndịnị makẹ amụma ndị hụ wẹ bu banyen'i ogẹn mbụ, kẹni ị saẹka gi wẹ lụ ọgụn ahụn rị mma,

19e kwọnkẹnmẹ okukwe lẹ idọnmẹ obi ọchan. O nwọngụọ ndị latọ idọnmẹ obi wẹ ọchan, gi ẹ sụkpọpụ okukwe wẹ.

20Himẹnusu lẹ Alẹzanda rị imẹ wẹ. E wegụọ m wẹ ẹbụbụọ ye Ekwensụ n'o mẹ wẹ ihiẹn, kẹni wẹ marịn kubehi arụ.

Jump to: Chapter 2 →