1 Timothy 2

Ika 2018 Bible

← Chapter 1 Jump to: Chapter 3 →

1Igi bidọn, m sị ụnụ: a rịọnị nị ịhịan ile Osolobuẹ; e mẹni ni wẹ ekpere; a rịọdọnni ni wẹ; e gi ni ufiri wẹ a kpanmịn a,

2e mẹzini ni ndị-nze lẹ ndị ile rị isi-ọkịkị ekpere ẹrịra, kẹni ẹnyi hụn ụzọ e gi udọn e bi, e bini Osolobuẹ, e nwọn mgbaye.

3Ihiẹn rị mma, a sụọ Osolobuẹ wụ Onyẹ-nzụọpụha ẹnyi rọ,

4makẹni Osolobuẹ chọ nị ịhịan ile nwọnrin nzụọpụha, marịn ezioku.

5Makẹni, Osolobuẹ ohu sụọ rị; Onyẹ Ewegbamanị wụzị ohu sụọ hụn e wegbama Osolobuẹ lẹ ịhịan. Onyẹni wụ Kraịst Jizọsị hụn wụzịkwọ ịhịan;

6hụn we enwẹn ẹ ye, kẹni ọ wụrụ ihiẹn w'e gi gbapụha ịhịan ile. Osolobuẹ a shịagụọ ẹri banyeni ihiẹnni ogẹn furuni.

7Ịya haịn wẹ gi tumẹ m onyẹ e zisọnmẹ ozi ẹ lẹ onyẹ-ozi pụ-ichẹn (m rị e ku ezioku, arị m a tụ ntụ) lẹ onyẹ a kuzi ndị wụlẹni ndị Ju okukwe lẹ ezioku.

8Ya wụ, m chọ nị ikẹnnyẹ rị ebe ọwụlẹ hụn a nị wẹ e mẹ ekpere, a kịshi ẹka rị nsọ elu, ẹlẹ ẹka olulu lẹ ndọndọ.

9M chọzị nị ikpoho e gi uche e kẹn ekikẹn: w'e yile ihiẹn e mẹ ifẹnrẹn kanị ihiẹn furuni; ẹlẹ ịchọ ntutu mma mọbụ iyi goru mọbụ ihiẹn-mma mọbụ ẹkwa ṅanrannị.

10Kama, wẹ gi ọrụn-ọma chọ enwẹn wẹ mma, k'o furu nị ikpoho e fe Osolobuẹ e mẹ.

11Wẹ gha a kuzi, ikpoho wẹ gba nkịtịn, e gọn ntịn ihiẹn wẹ rị a kuzi, wechanrịn enwẹn wẹ che okpuru.

12M sị okpoho y'a kuzilẹ; y'a kịlẹ okẹnnyẹ; y'a gba nkịtịn.

13Makẹni Adam kẹ wẹ buzọ ke nị wẹ d'e ke Ivu;

14e dufieni wẹ Adam, okpoho kẹ wẹ dufie, ọ nọ wụrụ onyẹ mẹ njọ.

15Kanị Osolobuẹ jẹnkọ d'e gi oku ọmụmụ nwa zụọpụha ikpoho, ka sị a mẹni wẹ hụ e gi okukwe lẹ ihiẹn-ọsụsụọ e bi, a rị nsọ, e kwọndọn enwẹn wẹ.

← Chapter 1 Jump to: Chapter 3 →