1 Timothy 5

Ika 2018 Bible

← Chapter 4 Jump to: Chapter 6 →

1Aganlẹ okẹnnyẹ-ọba, ka gi mgbaye gwa a oku nọkẹ nẹdi ịhịan; a gwa ikẹnnyẹ rị ibe alị oku rịkẹ umunẹ;

2a gwa ikpoho-ọba oku nọkẹ onyẹ rị a gwa nnẹ ẹ; a gwa ikpoho rị ibe alị oku nọkẹ umunẹ, ka dọnmẹchanrịnkwọ enwẹn i ọchan.

3A tụnị nị ikpoho di wẹ nwụnhụn nwọnlẹni eyemẹka nke-esi ụya.

4Omẹni okpoho di ẹ nwụn e nwọnghọ ụmụ mọbụ ụmụ-oyẹ, wẹ mụnrụngụdẹ kẹ w'e fe Osolobuẹ iwe wẹ, e gi ẹka wẹ rị e yeni ndị mụnị wẹ a kụkinbelụa wẹ ụgwọ, makẹni ịya a sụọ Osolobuẹ.

5Okpoho di ẹ nwụn hụn nwọnlẹni onyẹ ọwụlẹ nke-esi e gi Osolobuẹ e dọn ẹnya, e mẹ ekpere ogẹn ile, a rịọ Osolobuẹ uhinhin lẹ efinnaị.

6Kanị, hụn rị e bi obibi ẹhụ-ufu anwụnhụngụọ, ọsụọn'a nị ọ rị ndụn.

7Hụn a nị y'e yezi wẹ iwu ndịnị amamgbe w'a hụn ihiẹn w'e gi kọrịanị wẹ.

8Onyẹ ghalẹni e lepụ ndị nke ẹ ẹnya, tụmadụ ikpụlọ a, a jụgụọ ofufe-Kraịstị; ịya kadẹ onyẹ kwerilẹni njọ.

9Okpoho di ẹ nwụn rugụ ahụa ọgụn ẹtọ mọbụ karị sụọ kẹ ụka jẹnkọ d'e lepụ ẹnya; o k'a wụrịrị onyẹ lụkarịlẹni di ohu.

10Ọ k'a wụrịrị onyẹ wẹ gi ọrụn ọma marịn: ya wụ, n'ọ zụnghọ ụmụ; n'ọ nabanhanghọ ndị ọbịa; n'o feghọ ndị nke Osolobuẹ, chanchanpụ wẹ unyin ụkụ; n'o yeghọnị ndị rị nsọngbu ẹka; n'o bughọ enwẹn ẹ che ọrụn ọma ụzọ ile.

11Ka agụnyelẹ ikpoho di wẹ nwụnhụn hụn kelẹni ka ẹgẹdi. Makẹni, ihiẹn a gụn ẹhụ nwọn ikẹn ban ẹgbata wẹ lẹ Kraịstị, a chọma wẹ nị wẹ lụrụ di.

12Ogẹn hụ ikpe a ma wẹ makẹni e tikpọgụọ wẹ nkwa ibuzọ wẹ kwe.

13Wezụkadẹ ọhụn, o ru a mụnrụn wẹ ẹka-nkụtọpụ, a gha ụlọ-ụlọ. Ẹlẹdẹ ẹka-nkụtọpụ sụọ, a sị sị-sị-sị, rụnkọ ọrụn wẹ zilẹni wẹ, kukọ oku rulẹni wẹ.

14Ufiri ẹ, m sị ikpoho di wẹ nwụn kelẹni ka ẹgẹdi wẹ lụrụ di, wẹ mụ ụmụ, wẹ e lepụ ikpụlọ wẹ ẹnya, amamgbe eṅẹnrẹn a hụn ihiẹn o k'e ku.

15Ụfọdụ ikpoho ndịnị a kpahugụọlẹ, sọnmẹ Ekwensụ.

16Omẹni, okpoho kwerini nwọn onyẹ di ẹ nwụnhụn iwe wẹ, ya yeni wẹ ẹka, makẹ ụka gha e bukẹ ibu, kẹni ụka hụn ụzọ e yeni ndị di wẹ nwụnhụn nwọnlẹni onyẹ e yeni wẹ ẹka nke-esi ẹka.

17Ndị-isi ụka rị a kị ọhụnma furu w'e ye ọghọ lẹ ụgwọ-ọrụn furu w'e ye ndị-isi, ye wẹ ya ụzọ ẹbụọ, tụmadụ ndị rị a gbakẹnmẹ ebe iku oku-Chuku lẹ ikuzin'ẹ rị.

18Makẹni, Ẹkụkwọ-nsọ sị, “Ekẹnmẹlẹ efin rị a zọchanpụha ọka ọnụ,” sịzị, “Onyẹ-ọrụn e furughọ hụn w'a kụ ụgwọ-ọrụn a.”

19Wẹ kpe onyẹ-isi, eyelẹ ẹ ọnụ, mmanị madụ ẹbụọ mọbụ ẹtọ pụha ọshẹri.

20Nke ndị hụn tọ njọ e mẹ, jụgbọ wẹ idẹnya ịhịan ile, kẹni egun hụn ụzọ tụma ndị họdụnị.

21M rị a gba ị mkpịnsịn-ẹka idẹnya Osolobuẹ lẹ Kraịstị wụ Jizọsị lẹ ndị mmọn-ozi rị nsọ: e dọnmẹ iwu ndịnị; egbeyekwọlẹni ịhịan; elekwọlẹ ịhịan ẹnya ihun!!

22Ahụhụkwọlẹ bu ẹka kwasị ịhịan; kpachanpụ ẹnya amamgbe y'e bi ẹka ye njọ ndị ọzọ mẹ; dọnmẹ enwẹn i ọchan.

23Arazịlẹ mirin sụọ, ka a rarị ẹkẹrẹ manya makẹ ẹfọ ị lẹ emu a kụn'ị mbụ-lẹ-ẹbụọ.

24O nwọn ndị njọ wẹ a pụhachanrịn ifọn, a ma wẹ ikpe, wẹ kebe kinmẹdẹ wẹ ikpe, kanị nke ndị họdụnị e sọn wẹ, wẹ kingụ wẹ ikpe ọ pụha ifọn.

25Ẹrịra kẹ ọrụn ọma dọnzi a pụhachanrịn ifọn. Ọsụọdẹn'a n'o ke pụhachanrịn ifọn, o zuerisọnmẹkọ.

← Chapter 4 Jump to: Chapter 6 →