1 Timothy 4

Ika 2018 Bible

← Chapter 3 Jump to: Chapter 5 →

1Mmọn-nsọ e kupụgụọ a n'o ru ogẹn ikpanzụụn, o nwọn ndị k'a latọ ofufe-Kraịstị, sọnmẹ mmọn ndị hụn e dufieni lẹ nkuzi eje-mmọn,

2ebe wẹ nọ e sọn nkuzi ndị-ntụ lẹ ndị ihunnaị obi ghalẹni e gbuzi mgbu makẹni a dagbugụọ w'a.

3Wẹ k'a kuzimẹ ịhịan w'a lụlẹ di-lẹ-nwunyẹ, w'e rilẹ ụfọdụ ihiẹn-oriri, ihiẹn Osolobuẹ ke kẹni ndị hụn kwerini hụn marịn ezioku hụn ụzọ e ri, a kpanmịn a.

4Ihiẹn ile Osolobuẹ ke rị mma; onwọnni hụn w'a jụ, kasị a mẹ ni wẹ gi ekele narịn a,

5makẹni oku Osolobuẹ lẹ ekpere e dọn ẹ nsọ.

6Ị gwa umunẹ ẹnyi imẹ Kraịstị ihiẹn ndịnị wẹ, i k'a wụrụ ezigbo onyẹ-ọrụn Kraịstị Jizọsị wẹ zụn ọhụnma, onyẹ wẹ gi ihiẹn ndị nke Kraịstị kweri lẹ ezigbo nkuzi zụn.

7Latọ ilu ndị ahụn ndị marịnlẹni ihiẹn gi e dọn hụn ghalẹni a kwadọn ihiẹn Osolobuẹ. Ka gi ihiẹn Osolobuẹ a zụn enwẹn i.

8Ịzụn ẹhụ a banghọ erere, kanị ife-Osolobuẹ ka erere a ban ụzọ ile, makẹni w'e ri erere ẹ imẹ ndụnnị lẹ ndụn lalanị.

9Ezigbo oku rọ, o furu nị wẹ nabanhanchanrịn a.

10Ịya haịn ẹnyi gi a rụngbu enwẹn ẹnyi, a lụgbu enwẹn ẹnyi, makẹni ẹnyi gi Chuku rị ndụn dọn ẹnya, Chuku hụn wụ Onyẹ-nzụọpụha ịhịan ile, tụmadụ ndị kwerini.

11Sị wẹ nị iwu rọ, a kuzi wẹ ya.

12Anịkwọlẹ onyẹ ọwụlẹ legberi i n'ị wụ nwata. Ka wụrụ onyẹ ndị kwerini e leri oku-ọnụ a, obibi ẹ, ihiẹn-ọsụsụọ a, okukwe ẹ lẹ k'o dọn e dọnmẹ obi ẹ ọchan.

13M gini d'a bịa, hụn a nị ị hụ a gụnpụha Ẹkụkwọ-nsọ ebe ịhịan ile rị, e gi oku-Chuku a kpasu mmọn wẹ, a kuzi wẹ ogẹn ile.

14Alatọkwọlẹ oyiye rị imẹ i, hụn i nwọnhẹn ghahanị amụma lẹ ẹka ndị-isi ụka bukwasị ị.

15E mẹ ihiẹn ndịnị ile; e we enwẹn i e che imẹ wẹ, kẹni ịhịan ile hụn a nị ọ hụ a gha.

16E leban enwẹn i lẹ nkuzi i ẹnya — mẹsọnmẹ ẹ, makẹni ịya kẹ y'e gi zụọpụha kẹ enwẹn i kẹ ndị rị e gọn i ntịn.

← Chapter 3 Jump to: Chapter 5 →