Esther 1

Ika 2018 Bible

Jump to: Chapter 2 →

1Ihiẹn ndịnị mẹ ogẹn Ahazẹrusu gi wụ eze alị-eze Pẹshịa, Ahazẹrusu hụn kị Azụụn ẹsa kwasị ọgụn-isin (127) rị alị-eze Pẹshịa ogẹn hụ — ghakwọrị Ndịa d'e ru Ẹtiopịa.

2Ukpo-eze ẹ hụn rị isi-obodo wụ Susa kẹ Ahazẹrusu nọ a kị ogẹn ahụn.

3Hụn mẹ ahụa ẹtọ ọ kịma, ọ nọ kpọ ndị-isi ẹ lẹ ndị-ọrụn a oriri; ndị wụ ikẹn Pẹshịa lẹ Mẹdịa lẹ ndị-isi lẹ ndị ọrụn kịsọnmẹ Azụụn ile ọ rị a kị bịazịkwọ oriri hụ ọ kpọ.

4Ọrọgbọ ifọn isin gbegbegbe ọ hụ a ghọsị akụ-lẹ-ụba karị ẹka hụn rị alị-eze ẹ lẹ mma lẹ ọghọ-eze lẹ ikpẹn rị a ẹhụ.

5Ifọn isin hụ e zugụ, eze nọ kpọ ndị ile rị isi-obodo hụ wụ Susa oriri, kẹ onyẹ-uku kẹ onyẹ-nta; oriri hụ nọ akpọhịn ẹsa; imẹ ụgba-obobo wẹ nọ e zu ikẹn rị obi-eze ẹ kẹ wẹ nọdị.

6Wẹ tansọnmẹ ẹkwa linẹni ma mma ṅanrannị ebẹhụ, kẹ ẹkwa ọchan kẹ hụn e nwun bru-bru. Wẹ gisọnmẹ eriri linẹni ọchan lẹ nke pọpụ kẹnmẹsọnmẹ ẹkwa ndị hụ; wẹ kẹnmẹsọnmẹ wẹ ye ẹgba siliva rịsọnmẹ adansụn ọmụma-mabụlụ ndị rị ebẹhụ. Ocho pụ-ichẹn wẹ gi goru lẹ siliva mẹmẹ rịsọnmẹ ebẹhụ. Ọmụma ufie pụ-ichẹn tụsọnmẹ ẹkịrịka kẹ wẹ gi gbe alị ebẹhụ, ya lẹ ihiẹn ndị-ọzọ pụ-ichẹn wẹ buchesọnmẹ ọmụma wẹ gi e gbe alị.

7Mkpu goru kẹ wẹ gi ye wẹ manya. Onwọnni mkpu ẹbụọ wụ ụdị ohu. Manya e jun, makẹni eze wepụha manya ọhụnma-ọhụnma.

8A nịzịghọ wẹ onyẹ-onyẹ ra k'ọ ra, makẹni eze sị ndị ile rị e ke manya ye onyẹ-onyẹ hụn ọ chọ.

9Alasị eze wụ Vashiti nkẹ kpọzị ikpoho oriri imẹ obi-eze Ahazẹrusu.

10Hụn mẹ akp'ọhịn ẹsa, ogẹn manya gi nwunyemẹ eze ẹnya, ọ nọ zi idibo ẹ ẹsa pụ-ichẹn wẹ wara ozi. Mmadụ ẹsa hụ wụ Mẹhumanị, Biz'ta, Habona, Big'ta, Abag'ta, Zeta lẹ Kakasị.

11O zi wẹ d'e wẹhẹn'ẹ Vashiti nwunyẹ ẹ hụn wụ Alasị, ya kpuru okpu-alasị ọ lalanị, kẹni eze ghọsị ndị hụ ile lẹ ndị-isi rị ebahụn mma a, makẹni ẹnya len'ẹ a ra lee ọfịa.

12Kanị, ogẹn ndị ozi ahụn gi zi ozi eze zi wẹ, Alasị eze wụ Vashiti ekweni bịa. Eze nọ bumẹ olulu, iwe e we ẹ.

13Ya eze nọ gwa ndị a dụn a ọdụn, ndị ghọta kẹ ihiẹn nọ, makẹni ẹrịra kẹ eze dọn a jụ uwẹ ndị marịn iwu lẹ ọdịnalị ọhụnma uche wẹ;

14uwẹ wụ ndị a hansọn eze. Ẹfan wẹ wụ Kashẹna, Shẹta, Adimata, Tashishi, Meresi, Masẹna lẹ Mẹmukanị, uwẹ wụ ndị-isi ẹsa rị alị-eze Pẹshịa lẹ Mẹdịa hụn e jẹn ebe eze rị; uwẹ kachanrịn imẹ alị-eze ahụn.

15Eze a sị wẹ, “Kị iwu ẹnyi sị wẹ mẹ Alasị wụ Vashiti? O mẹni ihiẹn Eze wụ Ahazẹrusu ku hụn idibo eze zi ẹ!”

16Ya kẹ Mẹmukanị nọ nọ idẹnya eze lẹ ndị-isi hụ sị, “Alasị wụ Vashiti e mẹọlẹ eje-ihiẹn; ẹlẹ eze sụọ k'o mẹ ẹ, kanị ndị-isi ile lẹ ndị ile rị Azụụn ile Eze wụ Zẹzẹsi rị a kị k'o m'ẹ!

17Makẹni ikpoho ile k'a nụ ihiẹnni Alasị eze mẹ, gi ẹ legberimẹ di wẹ, a sị, ‘Eze wụ Ahazẹrusu lẹ enwẹn a sịgụọdẹ wẹ wẹhẹn'ẹ alasị a wụ Vashiti, ọ jụ n'ọ bịakọ.’

18Gha tannị jẹnmẹ, inyẹnmẹ ndị-isi Pẹshịa lẹ Mẹdịa hụn nụ agụngụn alasị eze gụn k'e gi ẹka ahụn sọnmẹ ndị-isi, mkpari lẹ olulu e jun ụzọ ile.”

19“O mẹ nwan n'ọ sụọghọ eze, ya ti iwu, e de wẹ ẹ ye iwu Pẹshịa lẹ Mẹdịa ẹnyi hụn wẹ ghalẹni e gbehutọ, nị Vashiti abịakọzị ihun Eze wụ Ahazẹrusu. Eze ya weri ọkwa Alasị ye okpoho ọzọ hụn ka Vashiti mma.

20Iwuni eze jẹnkọ d'e ti ghagbarịọlẹ ebe ile eze rị a kị, ikpoho ile a gbayemẹ di wẹ, kẹ onyẹ-uku kẹ onyẹ-nta.”

21Okuni Mẹmukanị ku nọ sụọ eze lẹ ndị-isi hụ. Ya eze nọ mẹ ihiẹn Mẹmukanị ku.

22Ọ nọ de ẹkụkwọ ozi zijẹnni wẹ Azụụn ile rị alị-eze hụ, Azụụn ọwụlẹ lẹ mkpụrụ-ẹkụkwọ wẹ gi e de ihiẹn, alị ọwụlẹ lẹ asụsụ a, sị okẹnnyẹ ọwụlẹ ya hụn a nị ịya rị a kị ikpụlọ a.

Jump to: Chapter 2 →