Esther 2

Ika 2018 Bible

← Chapter 1 Jump to: Chapter 3 →

1Ihiẹnni ile e mẹgụ, hụn olulu eze gi rọma, ọ nọ nyanhanma Vashiti lẹ iwu wẹ gi sọn ẹ.

2Ndị e jẹnni eze ozi nọ sị, “Wẹ chọnị eze ụmụ-agbọ ma mma-ẹhụ, uwẹ lẹ okẹnnyẹ kelẹni ranhịntu.

3Eze ya tumẹsọnmẹ onyẹ ohu-ohu Azụụn ọwụlẹ ọ rị a kị, n'o wẹhẹ ịgbagba ndị hụ ile ma mma-ẹhụ hụn wẹ lẹ okẹnnyẹ kelẹni ranhịntu, bu wẹ tọ ebe inyẹnmẹ eze bi imẹ isi-obodo Susa ebeni. Wẹ bu ịgbagba ndị ahụn che ẹka Hẹgaị, odibo-uku eze wẹ wara, hụn e lepụ ikpoho ẹnya; wẹ ye wẹ ihiẹn wẹ gi a chọ mma.

4Nwagbọọ ka eze a sụọ ya wụrụ Alasị, nọkin ẹnya Vashiti.” Ndụnmọdụnnị a sụọghọ eze, ọ nọ gi ẹ rụn ọrụn.

5Ogẹn hụ, o nwọn onyẹ Ju ohu bi obodo Susa ahụn eze nọ a kị alị-eze Pẹshịa. Okẹnnyẹni wụ onyẹ ebọn Bẹnjamini alị Izrẹlụ; ẹfan a wụ Mọdikaya nwa Jaịrị nwa Shimei nwa Kishi.

6Mọdikaya rị ndị Nebukadineza wụ eze Babilọnụ gha Jerusalẹm kpụnrụn wẹ lẹ eze wẹ, Jehoyakini eze Juda.

7Mọdikayanị rị a zụn Hadasa (hụn wụ Ẹsta), nwa nwẹnẹ ẹ, makẹni nwata hụ enwọnzi nẹdi lẹ nnẹ. Nwa-agbọnị ma mma ẹhụ, la ẹnya. Mọdikaya mụnrụn nwatanị ogẹn nẹdi ẹ lẹ nnẹ ẹ nwụnhụngụ.

8Ogẹn iwu eze ti lẹ ozi o zi gi nwan bịa, wẹ nọ kpọnhẹn ịgbagba imẹ obi-eze rị obodo Susa, we wẹ che ẹka Hẹgaị. Ẹsta rị ndị wẹ wẹhẹ obi-eze ebẹhụ, che ẹka Hẹgaị hụn e lepụ ikpoho ndị ahụn ẹnya.

9Ihiẹn Ẹsta sụọ Hẹgaị, Hẹgaị nọ mẹmẹn'ẹ ọhụnma. O keye Ẹsta ihiẹn o gi a chọ mma lẹ ihiẹn-oriri pụ-ichẹn ozigbo-ozigbo, hanyen'ẹ ịgbagba ẹsa wẹ kpachanpụ ẹnya họrị imẹ obi-eze, ndị k'a gha e fe ẹ; o bu ịya lẹ ịgbagba a che ebe ka mma ebẹhụ inyẹnmẹ eze e bi.

10Ẹsta ekuni alị a lẹ ndị nke ẹ, makẹni Mọdikaya sị a ekulẹ.

11Ụhụọhịn ile kẹ Mọdikaya gi e jẹnjẹn e jẹnlụa ihun ezi-ọgwa ụlọ inyẹnmẹ eze hụ, kẹn'ọ marịn kẹ Ẹsta rị lẹ n'ọ marịn kẹ o nwọn ihiẹn rị e mẹn'ẹ.

12Omẹgụ, ọ nọ ru ogẹn nwagbọọ ọwụlẹ imẹ wẹ jẹnkọ d'e gi jẹn d'e kunrun Eze wụ Ahazẹrusu. Wẹ chọzugụ wẹ mma ifọn mmẹbụọ kẹ wẹ gi e jẹn nke eze: wẹ tegụ udẹn maa ifọn isin, tegụ udẹn basam ifọn isin lẹ ihiẹn ndị ọzọ ikpoho gi a chọ mma.

13Ẹnịna kẹ ịgbagba ndị hụ dọn e jẹn ebe eze rị: Onyẹ jẹnkọnị e we wẹ ihiẹn ọwụlẹ ọ chọ ye ẹ, ọ pụ ebẹhụ inyẹnmẹ eze bi.

14Ẹnyasị, o shi nke eze, ụz'ọtụntụn e we wẹ ẹ shi ụzọ ọzọ inyẹnmẹ eze bizi, we ẹ che ẹka Shashigazị, odibo-uku eze hụn wẹ warazị, hụn e lepụ ndị mgba eze ẹnya. Onyẹ hụn pụha ebeni, o jẹnkọzị ebe eze rị mmanị ihiẹn ẹ sụọ eze, nị eze kpọnị wẹ ẹfan a zi wẹ d'e wẹhẹ ẹ.

15O ru ogẹn nwagbọọ hụ wụ Ẹsta hụn Mọdikaya mụrụn kẹ nwa a, hụn wụ nwa Abihailu nwẹnẹ nẹdi Mọdikaya, e gi jẹn ebe eze rị, ọ sịnị wẹ ye ẹ ihiẹn ọwụlẹ karị hụn odibo-uku eze ahụn wẹ wara wụ Hẹgaị hụn e lepụ ụlọ inyẹnmẹ eze hụ ẹnya sị a weri. Ihiẹn Ẹsta hụ a sụọ ndị ile hụnn'a.

16Ifọn nke iri wụ Tẹbẹtị, ahụa nke ẹsa eze wụ Ahazẹrusu kịma, kẹ wẹ we Ẹsta jẹnn'ẹ imẹ obi-eze ẹ.

17Ẹsta nọ chanban eze ẹnya karị ikpoho ndị ọzọ hụ ile, eze nọ gi ẹnya rị mma lẹ ẹnya rị ichẹn lee ẹ karị ịgbagba ndị ọzọ hụ ile họdụnị. Ọ nọ bu okpu-eze Alasị che ẹ isi, gi ẹ họnrin Alasị nọkin ẹnya Vashiti.

18Eze nọ kpọ ẹregede oriri, kpọchanrịn ndị-isi lẹ ndị ile gi ọkwa oriri hụ. Ẹsta k'ọ kpọnị oriri hụ. Ọ nọ sị ndị ile rị Azụụn ile ọ rị a kị ejẹnlẹ ọrụn, wẹ gi ẹ zu ikẹn; o yesọnmẹ ịhịan oyiye a tụ ẹnya kẹ ndị-nze e ye.

19Ogẹn hụ ịgbagba ndị hụ gi rị e zu ụlọ nke ẹbụọ hụ ndị mgba eze bi, Mọdikaya e nwọnọlẹ ọkwa o gi a nọdị ọnụ-mgbọn eze.

20Ẹsta nkẹ eke kukwọ ebọn ẹ lẹ alị a, makẹni ya kẹ Mọdikaya gwa a. Makẹni ọ hụkwọ e mẹ ihiẹn Mọdikaya gwa a k'o dọn e mẹ ogẹn Mọdikaya gi rị a zụn a.

21Ogẹn ahụn Mọdikaya gi rị ọnụ-mgbọn eze ebẹhụ, Big'tana lẹ Tereshi, idibo eze ẹbụọ rị mkpa wẹ wara hụn e che ọnụmụzọ nọ wemẹ iwe eze wụ Ahazẹrusu, zun'ẹ umẹ nị wẹ gbu ẹ.

22Kanị Mọdikaya nọ marịn umẹ hụ wẹ zu, ọ nọ gwa Alasị wụ Ẹsta; Ẹsta nọ jẹn d'a gwa eze, sị a nị Mọdikaya gwa a.

23Mgbe wẹ gi lebangụ oku hụ ẹnya, hụn a nị ezioku rọ, wẹ nọ hogbu idibo-uku ẹbụọ hụ elu osisi. Wẹ nọ nọ ihun eze detọ ihiẹnni ile imẹ ẹkụkwọ w'e deye ihiẹn rị e mẹni.

← Chapter 1 Jump to: Chapter 3 →