Esther 3

Ika 2018 Bible

← Chapter 2 Jump to: Chapter 4 →

1O mẹgụ, eze wụ Ahazẹrusu nọ bushi Hamanị nwa Hamẹdata hụn wụ onyẹ ebọn Agagị elu, ye ẹ ocho lẹ ọkwa kachanrịn nke ndị-isi ile họdụnị.

2Ndị-isi ọrụn eze ile rị ọnụ-mgbọn obi-eze a rụn ọrụn nọ gbumẹni Hamanị osekpu, e ye ẹ ọghọ, makẹni ịya kẹ eze sị wẹ e mẹn'ẹ. Kanị Mọdikaya ekweni gbun'ẹ osekpu mọbụ ye ẹ ọghọ.

3Ya kẹ ndị-isi ọrụn eze ndị hụ a nọ ọnụ-mgbọn eze a rụn nọ jụma Mọdikaya, “Kị haịn i gi a pa oku eze?”

4Wẹ hụ a gwa a ihiẹnni ụhụọhịn-ụhụọhịn, kanị o gọnni wẹ ntịn. Ya wẹ nọ gwa Hamanị, nị wẹ marịn kẹ wẹ k'e yeni Mọdikaya efe; wẹ mẹ ẹrịra makẹni Mọdikaya a gwagụọ wẹ n'ọ wụ onyẹ Ju.

5Mgbe Hamanị gi hụn a nị Mọdikaya a rị e gbun'ẹ osekpu mọbụ ye ẹ ọghọ, olulu nọ jun ẹ obi.

6Makẹni a gwagụọ w'a onyẹ alị Mọdikaya wụ, ọ nọ sị ẹfọ ejunkọ a o gbu Mọdikaya sụọ. Ọ nọ chọma ụzọ o k'e gi gbuchanrịn ndị nke Mọdikaya ile, ndị Ju ile rị alị-eze Ahazẹrusu.

7Imẹ ahụa nke mmẹbụọ eze wụ Ahazẹrusu kịma, imẹ ifọn nke ibuzọ hụ wụ ọnwan Nisanị, wẹ nọ gi Puri hụn wụ ịtụ-mkpọ gi uri-uri họye Hamanị ụhụọhịn lẹ ifọn o k'e gi mẹ ihiẹn o romẹni ndị Ju. Mkpọ wẹ tụ hanrịn ụhụọhịn nke mmẹtọ imẹ ifọn nke mmẹbụọ, ọnwan Ada.

8Ya Hamanị nọ sị eze wụ Ahazẹrusu, “O nwọn ndị rị ichẹn hụn rị imẹ igunrun alị ichẹn-ichẹn Azụụn ile rị alị-eze i. Ọdịnanị wẹ rị ichẹn ebe nke alị ndị ọzọ ile rị, w'ara dọnmẹ iwu eze. Ọ rịnị mma nị eze gba wẹ nkịtịn.

9Omẹni ọ sụọghọ eze, ya ti iwu nị wẹ gbuchanrịn wẹ. M k'a kụ ndị hụ ọrụnnị k'a rị ẹka wẹ ẹkpa-siliva-uku nnụ-uku iri (10,000) hụn wẹ k'a kụye ẹkpa eze rịsọnmẹ wẹ ẹka.”

10Eze nọ gbụpụha ọla mkpịnsịn ẹka o gi e biye ẹka ihiẹn o de, we ẹ ye Hamanị nwa Hamẹdata onyẹ ebọn Agagị, Hamanị eṅẹnrẹn ndị Ju.

11Ọ nọ sị Hamanị, “La oku egho tọ; mẹ ndị hụ k'ọ sụọ ị.”

12Nke akp'ọhịn mmẹtọ imẹ ifọn ibuzọ hụ, wẹ nọ kpọ ndị akanwe eze. Wẹ nọ de ihiẹn Hamanị sị ndị ọkịkị ile mẹ — kẹ ndị a nọkin ẹnya eze Azụụn ichẹn-ichẹn kẹ ndị gọvanọ Azụụn ichẹn-ichẹn kẹ ndị-isi kị ndị alị ichẹn-ichẹn. Hamanị sị wẹ gi mkpụrụ-ẹkụkwọ Azụụn ichẹn-ichẹn gi e de ihiẹn deni wẹ ịya, gizi asụsụ alị ichẹn-ichẹn rị azụụn hụ deni ndị ọwụlẹ ya. Ẹfan eze wụ Ahazẹrusu kẹ wẹ gi de ihiẹn hụ, gi ọla mkpịnsịn ẹka o gi e biye ihiẹn ẹka biye ẹ ẹka.

13Wẹ nọ we ẹkụkwọ-ozi ndị hụ yesọnmẹ ndị-ozi a gba ọsọ, e weri wẹ ozini ghagbarị Azụụn ile Ahazẹrusu rị a kị, a sị ịhịan ile wẹ gi akp'ọhịn ohu, nke akp'ọhịn mmẹtọ imẹ ifọn nke mmẹbụọ, hụn wụ ọnwan Ada, tikpọ ndị ju ile, gbuchanrịn wẹ — kẹ ikoro kẹ ndị ẹgẹdi, kẹ ikpoho kẹ ụmụ-ẹka; ọ sịzịkwọ wẹ kwarịchanrịn ihiẹn wẹ.

14Wẹ sịzị wẹ tini ndị rị Azụụn ọwụlẹ Iwu hụ wẹ de imẹ ẹkụkwọ-ozi hụ, mẹ ndị alị ọwụlẹ marịn, kẹni wẹ kwademẹ cheri ụhụọhịn hụ.

15Ndị ọsọ hụ nọ jẹnmẹ ozigbo-ozigbo kẹ eze dọn gwa wẹ; wẹ nọzịkwọ ti iwu hụ imẹ obodo Susa hụ eze nọ a kị. Eze lẹ Hamanị a nọdị alị a ra manya kanị isusu hụ obodo Susa.

← Chapter 2 Jump to: Chapter 4 →