Esther 4

Ika 2018 Bible

← Chapter 3 Jump to: Chapter 5 →

1Ogẹn Mọdikaya gi marịn ihiẹn ile rị e mẹni, ọ nọ tika ẹwuru ye enwẹn ẹ olu, yiri ẹkpa-mkpụrụ wẹ gi a kwan ụya, kpọn ntụn kpu enwẹn ẹ, shi imẹ obodo hụ, e goo, a kwan ụya.

2Kanị ọnụ-mgbọn eze sụọ k'ọ sa ẹka jẹnru, makẹni w'a ra nị ịhịan yiri ihiẹn wẹ gi a kwan ụya banye obi-eze.

3Azụụn ọwụlẹ iwu eze ru, ndị Ju rị ebẹhụ a kwanma ụya, e bu ọnụ, a kwan ẹkwan, e goo. Ndị bu ọda imẹ wẹ e yiri ẹkpa-mkpụrụ wẹ gi a kwan ụya, dinẹsọnmẹ ikpọn-ntụn.

4Ogẹn ịgbagba Ẹsta lẹ idibo-uku ndị hụ wẹ wara hụn e jẹnn'ẹ ozi gi gwa Ẹsta oku Mọdikaya, ọ nọ fụ a ọda-ọda. Ọ nọ kịye wẹ ẹwuru jẹnni Mọdikaya n'o yiri, kẹn'ọ gbụpụ ẹkpa-mkpụrụ hụ ọ rị e gi a kwan ụya; kanị Mọdikaya ekweni yiri ẹwuru ndị hụ.

5Ya kẹ Ẹsta nọ kpọ Hatakị, onyẹ ohu imẹ idibo-uku eze ndị hụn eze hanyeni Ẹsta n'ọ hụn ụzọ e jẹnn'ẹ ozi. Ẹsta nọ zi Hatakị d'a jụ Mọdikaya kẹ kị rọ? Kị haịn?

6Ya Hatakị nọ jẹn d'e kunrun Mọdikaya ebe ọ rị ebe wẹ nọ e zu imẹ obodo hụ, ihun ọnụ-mgbọn eze.

7Mọdikaya nọ gwa a ihiẹn ile mẹn'ẹ, gwapụ a ọnụ-egho Hamanị kwe nkwa n'o k'a kuye ẹkpa eze, kẹni wẹ gbuchanrịn ndị Ju.

8Mọdikaya nọzị ye Hatakị ẹhụhụọ wẹ gi de iwu eze hụ imẹ Susa, sị wẹ gbuchanrịn ndị Ju, ọ sị Hatakị d'a ghọsị Ẹsta ya, ya kọwan'a ya; ya gwashi Ẹsta ikẹn ya jẹn ebe eze rị d'a rịọdọnni ndị nke wẹ.

9Hatakị nọ kin azụụn d'a gwa Ẹsta ihiẹn Mọdikaya ku.

10Ẹsta nọ zi ẹ d'a sị Mọdikaya,

11“Ndị ile wẹ lẹ eze gba a rụn lẹ ndị ile rị Azụụn ile eze rị a kị a marịngụọ nị iwu ohu sụọ kẹ wẹ gi e sọn okẹnnyẹ mọbụ okpoho ọwụlẹ jẹn imẹ ọgwa hụ rị imẹ d'e kunrun eze bụ eze akpọn'a: wẹ k'e gburịrị hụnyẹ, mmanị eze bu ọkpọ siliva a zinmẹ onyẹ hụ, ya wụ onyẹ hụ a hụn isi. Mmẹ nwẹn, o zugụọdẹ nwan akp'ọhịn iri kwasị ọgụn kete wẹ kpọlẹ m, kete m jẹnlẹ d'a hụn eze.”

12Ogẹn wẹ gi gwa Mọdikaya ihiẹn Ẹsta ku,

13Mọdikaya nọ zikin wẹ d'a sị a, “Erokwọlẹ nị wẹ k'e gbuchanrịn ndị Ju yụ nwẹn a wanahịn makẹni ị rị iwe eze!

14Ịgba nkịtịn ogẹnni, eyemẹka lẹ nzụọpụha k'a gha ụzọ ọzọ bịanị ndị Ju — kanị ịyụ lẹ ikpụlọ nẹdi i k'a la iwi. Onyẹ marịndẹ nwan kẹ ogẹn nọ ẹnịna haịn i gi nwọn ọkwanị i nwọn nke eze?”

15Ẹsta nọ zikin wẹ d'a sị Mọdikaya:

16“Jẹn d'a kpọkwama ndị Ju ile rị imẹ Susa, ụnụ e buni m ọnụ — erilẹ ni, aralẹ ni — akpọhịn ẹtọ, kẹ uhinhin kẹ efinnaị; mmẹ nwẹn lẹ ịgbagba ndịnị e feni m k'e buzikwọ ọnụ kẹ ụnụ dọn rị e bu. O mẹgụ, m k'e jẹn d'e kunrun eze, ọ sụọn'a nị ịdan iwu rọ. Omẹni ọnwụn rọ, a nwụn m.”

17Mọdikaya nọ pụ d'e mẹ ihiẹn Ẹsta sị a mẹ.

← Chapter 3 Jump to: Chapter 5 →