Ezra 1

Ika 2018 Bible

Jump to: Chapter 2 →

1O ru ahụa hụ Saịrọsị eze Pẹshịa kịma, Osolobuẹ nọ mẹtụ Saịrọsị eze Pẹshịa ẹka obi kẹni ihiẹn Osolobuẹ gi Jerimaya ku hụn ụzọ bụn, Saịrọsị nọ zi ozi ghagbarị ebe ile ọ rị a kị, dezikwọ a, sị:

2“Ọnwan wụ ihiẹn Saịrọsị eze Pẹshịa ku: Ọ sị, ‘Osolobuẹ, Chuku rị elu-igwee, e yegụọ m alị-eze ile rị ụwa; o tumẹgụọ m nị m tụnn'a Ụlọ-nsọ imẹ Jerusalẹm hụn rị Juda.

3Onyẹ nke ẹ ọwụlẹ hụn rị imẹ ụnụ, Chuku ẹ ya nọyen'ẹ; ya lakin nwan Jerusalẹm rị Juda d'a tụn Ụlọ-nsọ Osolobuẹ wụ Chuku Izrẹlụ. Ịya wụ Chuku hụn rị imẹ Jerusalẹm.

4Ebe-lẹ-ebe onyẹ nke ẹ wanahịn otikpọ wẹ tikpọ alị wẹ bi nwan, ndị rị ebẹhụ wẹ gi siliva lẹ goru lẹ ihiẹn ichẹn-ichẹn lẹ anụmanụ kwadọn wẹ; wẹ gizi oyiye gha wẹ obi pụha kwadọn wẹ nị wẹ gi chụn ẹjan wẹ ru Ụlọ Chuku imẹ Jerusalẹm.’ ”

5Ya ndị-isi ikpụlọ rịsọnmẹ Juda lẹ Bẹnjamini lẹ ndị nchụn-ẹjan lẹ ndị Livaị, ndị ile Chuku mẹtụ ẹka obi, nọ kwademẹ nị wẹ jẹn d'a tụn ụlọ Osolobuẹ imẹ Jerusalẹm.

6Ya ndị ile bikunmẹni wẹ nọ gi ihiẹn-goru lẹ ihiẹn-siliva lẹ ihiẹn ichẹn-ichẹn kwadọn wẹ, lẹzi anụmanụ lẹ ihiẹn ichẹn-ichẹn rị mkpa cheni oyiye ile gha wẹ obi pụha.

7Eze wụ Saịrọsị nkẹ nọ kpọnpụha ihiẹn ndị hụ te rị Ụlọ-nsọ Osolobuẹ, ihiẹn Nebukadineza kpọnrin imẹ Jerusalẹm butọ imẹ ụlọ-mmọn a.

8Saịrọsị wụ eze Pẹshịa gwa Mitrẹdatị hụn e dọnmẹ ihiẹn ya kpọnpụha wẹ, gụn wẹ, we wẹ ye Shẹshibaza nwa eze Juda.

9Ọnwan wụ ole wẹ rịsọnmẹ: afẹrẹ goru iri kwasị ọgụn (30); afẹrẹ siliva nnụ-uku (1,000); arịa siliva itenẹi kwasị ọgụn (29) ndị ọzọ;

10ugbẹgbẹ goru ndị ọzọ, iri kwasị ọgụn (30); ugbẹgbẹ siliva ndị ọzọ iri kwasị nnụ (410); arịa ndị ọzọ rịn'a rị nnụ-uku (1,000).

11Wẹ ile wụ ihiẹn goru lẹ siliva nnụ kwasị nnụ-uku-isẹn (5,400). Ihiẹn ndịnị ile kẹ Shẹshibaza welụa Jerusalẹm ogẹn ndị wẹ kpụnjẹn Babilọnụ gi kinhẹn Jerusalẹm.

Jump to: Chapter 2 →