Ezra 3

Ika 2018 Bible

← Chapter 2 Jump to: Chapter 4 →

1Ogẹn o gi ru ifọn nke ẹsa, ndị Izrẹlụ e birisọnmẹgụọ obodo wẹ. Ya kẹ wẹ ile nọ zu imẹ Jerusalẹm, onwọnni onyẹ pụn'a.

2Jeshụa nwa Jozadakị lẹ ndị nchụn-ẹjan ibe ẹ lẹ Zerubabẹlụ nwa Shiẹtiẹlụ lẹ ibe ẹ nọ rụn ukpo nchụn-ẹjan Chuku Izrẹlụ kẹ w'a rụn a, kẹni wẹ nọ elu ẹ chụmazị ẹjan w'a kpọ ọkụn kẹ wẹ dọn de ẹ imẹ Iwu Mozizi odibo Chuku.

3A rụnghọ wẹ ukpo nchụn-ẹjan hụ, ọsụọn'a nị egun ndị fihunmẹni wẹ rị a tụ wẹ. Wẹ rụn ye ebẹhụ ukpo nchụn-ẹjan Osolobuẹ rị mbụ. Ya wẹ nọ chụnyemẹni Osolobuẹ ẹjan w'a dụn ọkụn elu ẹ — kẹ ẹjan ụtụntụn kẹ nke ẹnyasị.

4Wẹ nọ mẹ Mmẹmmẹ Ibi-imẹ-ọdụ kẹ wẹ dọn de ẹ imẹ Iwu, a chụn wẹ ẹjan w'a kpọ ọkụn ole w'a chụ ụhụọhịn-ụhụọhịn imẹ Mmẹmmẹ hụ.

5Omẹgụ, wẹ nọ chụnye ẹjan w'a kpọ ọkụn: kẹ hụn w'a chụn ogẹn ile kẹ ẹjan Ifọn-ọhụn kẹ ndị w'a chụn ogẹn Mmẹmmẹ nsọ Osolobuẹ ile lẹzi oyiye ndị gha wẹ obi pụha hụn wẹ wẹhẹsọnmẹ d'e ye Osolobuẹ.

6Ụhụọhịn ibuzọ imẹ ifọn nke ẹsa kẹ wẹ chụnyemẹni Osolobuẹ ẹjan ahụn w'a dụn ọkụn, kanị wẹ eke gbedọnzimẹ iyetọ Ụlọ-NSỌ Osolobuẹ lẹ enwẹn ẹ ogẹn hụ.

7Ya wẹ nọ gi egho we ndị e dọn ụlọ lẹ ndị kapịnta, gi ọka lẹ manya lẹ ofigbọn-olivu kụ ndị alị Sidọnụ lẹ alị Taya ụgwọ, wẹ nọ gha Lẹbanọnụ bu ogwe osisi sida che elu Ohimin-Mẹditeranịa buhẹni wẹ ya Jọpa hụn rị mkpẹnrẹn Ohimin hụ — makẹni Saịrọsị eze Pẹshịa a sịgụọ wẹ mẹ ẹ.

8Ahụa mẹ ẹ ẹbụọ wẹ ru Ụlọ Chuku imẹ Jerusalẹm, o ru ifọn nke ẹbụọ, Zerubabẹlụ nwa Shiẹtiẹlụ lẹ Jeshụa nwa Jozadakị nọ bidọn ọrụn ịtụndọnzi Ụlọ-nsọ, uwẹ lẹ mmunẹ wẹ họdụnị — kẹ ndị nchụn-ẹjan kẹ ndị Livaị kẹ ndị ọzọ ile gha ebe wẹ kpụnjẹn wẹ lụaha Jerusalẹm. E tumẹ wẹ ndị Livaị rị nwa ahụa ọgụn shi elu nị w'e lepụ ọrụn ụlọ Osolobuẹ wẹ rị a rụn ẹnya.

9Jeshụa wẹ hụ e lepụ ọrụn Ụlọ Chuku hụ ẹnya, ya lẹ ụmụ a lẹ umunẹ ẹ ndị ebọn Livaị — kẹ Kad'miẹlụ lẹ ụmụ a (ndị hụn Hodavia mụ) kẹ ụmụ Henadadị.

10Ogẹn ndị rị e gbedọnzi iyetọ Ụlọ-NSỌ Osolobuẹ gi gbegụ a, ndị nchụn-ẹjan nọ yiri ẹwuru nchụn-ẹjan wẹ, burusọnmẹ opi; ndị Livaị wụ ụmụ Asafụ e burusọnmẹ kpajaị (simbalụ); wẹ ile nọ werisọnmẹ ọnọdị wẹ gi a ja Osolobuẹ mma kẹ eze Izrẹlụ wụ Defidi dọn ku ogẹn mbụ.

11Wẹ hụ a bụ ẹbụ wẹ gi a ja Osolobuẹ mma lẹ hụn wẹ gi a kpanmịn a, a sị: Ọ rịka mma: O nwọn ihiẹn-ọsụsụọ Izrẹlụ jẹnrin ejẹn. Ịhịan ile nọ yini Osolobuẹ okẹn oro ịja-mma, makẹni e gbegụọ wẹ iyetọ ụlọ Osolobuẹ.

12Kanị ndị ẹgẹdi bu ọda imẹ ndị nchụn-ẹjan lẹ ndị Livaị lẹ ndị-isi ikpụlọ ichẹn-ichẹn hụn gi ẹnya hụn Ụlọ-nsọ mbụ hụ wẹ tikpọ hụ a kwan a kwanshi elu, kẹ wẹ hụn iyetọ wẹ rị nwan e gbeni Ụlọ-nsọ hụnnị, kanị ndị bu ọda hụ e yi oro ịghọghọ,

13Ọ nịzịnị ịhịan marịn hụn wụ oro ịghọghọ lẹ hụn wụ oro ẹkwan, makẹni e yikẹnmẹkẹ wẹ oro; a nụghọ wẹ oro wẹ ebe teni.

← Chapter 2 Jump to: Chapter 4 →