Ezra 7

Ika 2018 Bible

← Chapter 6 Jump to: Chapter 8 →

1O tebe ọhụnma-ọhụnma, ogẹn Atazẹzẹsi gi wụ eze Pẹshịa, Ẹzra nọ bịa. Ẹzra wụ nwa Sẹraya nwa Azaria nwa Hil'kia.

2Shalum nẹdi Hil'kia wụ nwa Zadọkụ nwa Ahitubu

3nwa Amaria nwa Azaria nwa Mẹrayotu.

4Zẹrahịa nẹdi Mẹrayotu wụ nwa Uzi nwa Buki

5nwa Abishụa nwa Finẹhasị nwa Ẹliẹza. Ẹliẹza wụ nwa Ẹrọnụ onyẹ-isi nchụn-ẹjan ibuzọ.

6Okẹnnyẹni wụ Ẹzra gha Babilọnụ bịa Jerusalẹm. Onyẹ-nkuzi Iwu Mozizi rọ, hụn marịn Iwu Mozizi ru alị — Iwu hụn Osolobuẹ wụ Chuku Izrẹlụ ye. Eze Pẹshịa e yegụọ a ihiẹn ile ọ rịọ a n'o d'a bịa Jerusalẹm, makẹni Osolobuẹ wụ Chuku ẹ nọyen'ẹ.

7O nwọnzighọ ndị Izrẹlụ ọzọ gha Babilọnụ lụaha Jerusalẹm ahụa nke ẹsa ahụn eze-kanị wụ Atazẹzẹsi kịma — kẹ ndị nchụn-ẹjan kẹ ndị Livaị ibe wẹ a rụnyeni wẹ ọrụn kẹ ndị ọzọ e jẹn ozi imẹ Ụlọ-nsọ; ụfọdụ ndị Livaị hụ wụ ndị a bụ ẹbụ, ụfọdụ wụ ndị-nche ọnụ-mgbọn Ụlọ-nsọ.

8Ifọn nke isẹn imẹ ahụa nke ẹsa eze wụ Atazẹzẹsi kịma kẹ Ẹzra gi ru Jerusalẹm.

9Ụhụọhịn ibuzọ imẹ ifọn ibuzọ k'ọ gha Babilọnụ buli, ọ nọ ru Jerusalẹm ụhụọhịn ibuzọ imẹ ifọn nke isẹn, makẹni Chuku yen'ẹ ẹka ọda-ọda.

10Makẹni Ẹzra e wegụọ enwẹn ẹ ye ịmụ Iwu Osolobuẹ lẹ imẹn'ẹ lẹ ikuzi Izrẹlụ ụmụ-iwu ndị rịn'a lẹ ihiẹn ndị Osolobuẹ sị wẹ mẹ.

11Ọnwan wụ ẹkụkwọ-ozi eze wụ Atazẹzẹsi gi kwadọn onyẹ nchụn-ẹjan lẹ onyẹ nkuzi-iwu wụ Ẹzra, hụn mụ iwu lẹ uhi Osolobuẹ butọnị ndị Izrẹlụ, marịn a ru alị:

12Atazẹzẹsi, eze ndị-nze alị ichẹn-ichẹn, de ẹkụkwọ-ozini jẹnni onyẹ nchụn-ẹjan wụ Ẹzra hụn wụ onyẹ-nkuzi Iwu Chuku rị elu-igwee: Ekele m'i.

13M rị nwan e ye iwuni: onyẹ ọwụlẹ imẹ ndị Izrẹlụ rị alị-eze m hụn chọ n'o sọn i la Jerusalẹm, ya sọnmẹ i, kẹ onyẹ-mmaka kẹ ndị nchụn-ẹjan kẹ ndị Livaị.

14Eze lẹ ịhịamẹ ẹ ẹsa zijẹnkọ ị d'e lele kẹ ndị rị Juda lẹ Jerusalẹm dọn rị e dọnmẹ Iwu Chuku i hụn o mẹni ẹka ị k'ọ rị.

15Buruzikwọ egho siliva lẹ goru eze lẹ ịhịamẹ ẹ rị e gi uche wẹ e ye Chuku Izrẹlụ, hụn bi imẹ Jerusalẹm,

16cheni egho siliva lẹ goru ile ị k'e nwọnhẹn Ẹgbẹrẹ Babilọnụ lẹ oyiye ghapụha ndị Izrẹlụ lẹ ndị nchụn-ẹjan wẹ obi ye makẹ Ụlọ-nsọ Chuku wẹ imẹ Jerusalẹm.

17Hụn a n'i gi eghoni ile ṅọn okẹn-efin lẹ ebulu lẹ ụmụ-ebulu lẹ ọka lẹ manya ndị wẹ gisọnmẹ a chụn ẹjan, y'e gi wẹ chụn ẹjan elu ukpo nchụn-ẹjan rị Ụlọ Chuku i imẹ Jerusalẹm,

18yụ lẹ ndị Ju ibe i e gi egho siliva lẹ goru k'a họdụnị mẹ ihiẹn ọwụlẹ rị ụnụ mma ẹnya hụn wụ uche Chuku ụnụ.

19Hụn a nị ihiẹn ile wẹ buche i ẹka wẹ gi e fe ofufe imẹ Ụlọ-nsọ Chuku i e rughọ ihun Chuku imẹ Jerusalẹm.

20Ihiẹn ọzọ ọwụlẹ wẹ chọ imẹ Ụlọ Chuku i hụn o mẹni ịyụ k'e wẹhẹ ẹ, i nwọn ikẹn nọ ẹkpa eze weri ẹ.

21Mmẹ, Atazẹzẹsi hụn wụ eze, rị nwan a sị ndị ihaza ile e kwọndọn ẹkpa eze Ẹgbẹrẹ Nfetu Iyi-Yufretisi wẹ weru ẹnya alị yechanrịn onyẹ nchụn-ẹjan wụ Ẹzra hụn wụ onyẹ-nkuzi Iwu Chuku elu-igwee ihiẹn ọwụlẹ o k'a sị ụnụ ye ẹ —

22yerun'ẹ ẹkpa siliva uku ọgụn-isẹn (100), ẹkpa ọka-witi uku ọgụn-isẹn (100), galọnụ manya ọgụn-isẹn (100), galọnụ ofigbọn-olivu ọgụn-isẹn (100), yezin'ẹ nnu ọda-ọda.

23Ihiẹn ile Chuku rị elu-igwee ku imẹ Iwu ẹ, weru nị ẹnya alị mẹni Ụlọ-nsọ Chuku elu-igwee ya. Kị ẹnyi k'a nị nị Chuku gi ọnụma sọn alị-eze eze lẹ ụmụ a?

24Ya wezikwọ ụnụ ile e kwọndọn egho eze ẹnya nị ẹnyi asịnị ụnụ na onyẹ ọwụlẹ a rụn ọrụn imẹ Ụlọ-nsọ hụ ụgwọ-isi mọbụ ụtụ-eze mọbụ ụtụ ibu-afịa — kẹ ndị nchụn-ẹjan kẹ ndị Livaị kẹ ndị a bụ ẹbụ kẹ ndị-nche ọnụ-mgbọn Ụlọ-nsọ hụ kẹ ndị idibo Ụlọ-nsọ kẹ ndị ọzọ a rụn ọrụn imẹ Ụlọ-Chukuni.

25Ịyụ wụ Ẹzra, gi amamihiẹn Chuku i, hụn rị imẹ i, tumẹsọnmẹ ndị ọka-ikpe uku lẹ ọka-ikpe nta hụn marịn Iwu Chuku i, nị wẹ hụn ụzọ e dọnzini ndị ile rị Ẹgbẹrẹ Nfetu Iyi-Yufretisi oku. Ndị ile marịnlẹni Iwu Chuku i, y'a kuzi wẹ ya.

26Onyẹ jụ n'o mẹkọ dọnmẹkọ iwu Chuku i lẹ iwu eze sikọ d'a narịnrịrị afụnfụn ya lẹ wị — ọnwụn mọbụ ịchụpụ wẹ alị mọbụ ịnapụ wẹ ihiẹn wẹ mọbụ ịtụ wẹ ngan.

27Ịja-mma ya rịnị Osolobuẹ, Chuku ndị nẹdi ẹnyi, hụn bu ẹ che eze obi n'o ye ụlọ Osolobuẹ rị Jerusalẹm ọghọ ẹnịna,

28hụn mẹtụnị m eze lẹ ịhaịmẹ ẹ lẹ ndị-isi ẹ ẹka obi. Ndụn ban m ọhụnma-ọhụnma makẹni Osolobuẹ wụ Chuku m nọyeni m anọyeni, ya m nọ kpọkikomẹ ndị-isi Izrẹlụ hụn jẹnkọ d'e sọn m la Jerusalẹm.

← Chapter 6 Jump to: Chapter 8 →