Ezra 5

Ika 2018 Bible

← Chapter 4 Jump to: Chapter 6 →

1Ogẹn hụ, ndị-amụma wụ Hagaị lẹ Zẹkaraya nwa Ido nọ gi ẹfan Chuku Izrẹlụ, hụn ndị Izrẹlụ rị okpuru ẹ, bu ni ndị Ju hụn rị Juda lẹ Jerusalẹm amụma.

2Ya kẹ Zerubabẹlụ nwa Shiẹtiẹlụ lẹ Jeshụa nwa Jozadakị nọ kọnrin ọrụn, tụndọnzimẹ Ụlọ Chuku imẹ Jerusalẹm; ndị-amụma Chuku ndị ahụn hụ imẹ igunrun wẹ, a kwadọn wẹ.

3Ogẹn ahụn, Tatenaị hụn wụ gọvanọ rị a kị Nfetu Iyi-Yufretisi ahụn alị Juda rị lẹ Shẹta-Bozenaị lẹ itu wẹ nọ jẹnburu wẹ, sị wẹ, “Onyẹ sị ụnụ d'a tụndọnzi Ụlọ-nsọnị? Onyẹ sị ụnụ dọnzi ẹ?”

4Wẹ nọzị sị wẹ: “Gwa nị ẹnyi ẹfan ndị rị a tụnn'a?”

5Kanị ẹnya Chuku ndị Ju rị ebe ndị-isi ndị Ju rị, akụsịnị wẹ wẹ, makẹni gọvanọ sikọ d'e bu ụzọ zigụ ozi jẹnni eze Pẹshịa wụ Dariọsụ, ọ zakịngụ wẹ wẹ kebe marịn ihiẹn o ku.

6Ọnwan wụ ihiẹn rị ẹkụkwọ-ozi Tatenaị wụ gọvanọ Ẹgbẹrẹni wụ Nfetu Iyi-Yufretisi lẹ Shẹta-Bozenaị lẹ itu wẹ, ndị-isi rị Nfetu Iyi-Yufretisi, dejẹnni eze wụ Dariọsụ:

7Dariọsụ, Agụ! Isi-i-chei!

8O furu nị eze marịn nị ẹnyi jẹn Ẹgbẹrẹ Juda, jẹn Ụlọ-nsọ Chuku uku. Ndị ahụn rị e gi ọmụma hi-ogbe a tụn a, a dọ ogwe osisi e ye ụsụọ-ẹjan a. Wẹ rị a rụnshi ọrụn hụ ikẹn, ọ hụ a gha ihun ọhụnma-ọhụnma ẹka wẹ.

9Ya ẹnyi nọ jụ ndị-isi wẹ ụtaa, sị wẹ: Onyẹ gwa ụnụ tụndọnzi Ụlọ-nsọnị lẹ ihiẹnni ụnụ rị a tụnkin?

10Ẹnyi a jụzịghọ wẹ ẹfan wẹ, kẹni ẹnyi hụn ụzọ deri ẹfan ndị-isi wẹ, wẹhẹn'i.

11Ọnwan wụ ihiẹn wẹ za ẹnyi: “Ẹnyi wụ idibo Chuku hụn nwọn elu-igwee lẹ ụwa. Ẹnyi rịhụ a tụndọnzi Ụlọ-nsọnị wẹ tụngụ kete ahụa ole-lẹ-ole, hụn eze uku hụn kị Izrẹlụ mbụ tụn, tụngụ a,

12kanị, makẹni ndị nẹdi ẹnyi wẹ kanị kpasu Chuku elu-igwee iwe, ọ nọ we wẹ che ẹka Nebukadineza onyẹ Kal'di, eze Babilọnụ. Ọ nọ tikpọ ụlọ-nsọnị, kpụn ndị alịnị shi Babilọnụ.

13“Kanị o ru nwan ahụa ibuzọ Saịrọsị eze Babilọnụ kịma, Saịrọsị nọ yi uhi sị wẹ tụndọnzi Ụlọ Chukuni.

14Ọ ghadẹ ụnọ-mmọn Babilọnụ kwapụha ihiẹn goru lẹ ihiẹn siliva Ụlọ Chuku, hụn Nebukadineza gha Ụlọ-nsọ rị Jerusalẹm kwashi ụlọ-mmọn Babilọnụ. “Saịrọsị e bupụha wẹ, we wẹ ye okẹnnyẹ w'a kpọ Shẹshibaza hụn o tumẹ gọvanọ Ẹgbẹrẹ Nfetu Iyi-Yufretisini,

15sị a, ‘Buru ihiẹn ndịnị; jẹn d'e bu wẹ che imẹ Ụlọ-nsọ rị Jerusalẹm; tụndọnzi Ụlọ Chuku ebe ọ rị mbụ.’

16Okẹnnyẹni wụ Shẹshibaza nọ bịa, gbe iyetọ Ụlọ Chuku rị Jerusalẹm. Wẹ rịkwọ nwan a tụn a kete mgbẹhụ; w'e k'e tụngụ a.

17“Agụ, o mẹ nwan n'ọ sụọghọ ị, sị wẹ lele ebe wẹ detọsọnmẹ ihiẹn mẹ imẹ Babilọnụ mbụ, nị wẹ lele kẹ o nwọnghọ ogẹn eze wụ Saịrọsị gi yi uhi sị wẹ d'a tụndọnzi Ụlọ Chukuni rị Jerusalẹm. Omẹgụ y'e zi ozi gwa ẹnyi uche i banyeni okuni.”

← Chapter 4 Jump to: Chapter 6 →