Jeremiah 48 — Ika 2018 Bible

1Ọnwan wụ ihiẹn Osolobuẹ ihiẹn ile ri okpuru ẹ, hụn wụ Chuku Izrẹlụ ku banyeni alị Mụabụ: “Nke alị Nebo rị Mụabụ a gụgụọ, makẹni wẹ sikọ d'e tikpọrịrị a! Ụya k'e ri alị Kiriataim rị Mụabụ, makẹni w'e k'e mẹri ẹ weri; ụya k'e ri ebẹhụ wẹ gi dọn ẹnya; wẹ k'a kụkpọ a.

2Anụkọzị wẹ ẹfan Mụabụ; wẹ k'a nọ Hẹsh'bọnụ rị Mụabụ zu umẹ hụn wẹ k'e gi tikpọ alị Mụabụ ru alị, a sị, ‘Pụha nị, nị ẹnyi tikpọ n'a n'ọ wụbehi alị.’ Alị Mad'mẹni, wẹ k'e kpumẹzikwọ ị ọnụ; ọpịa-agha k'a chụ ị ọsọ!

3“Wẹ k'a nụ olu ẹkwan imẹ Horonaim, ẹkwan okẹn ntikpọ wẹ rị e tikpọ wẹ!

4Wẹ k'a kụkpọ alị Mụabụ; ụmụ Mụabụ k'a kwan ụya.

5“Wẹ k'e shi alị Luhiti rị elu òke, kwankọ ụya jẹnkọ; ụzọ Horonaim rị mkpọtu òke, wẹ k'a gha a nụzịkwọ ẹkwan, ẹkwan ụya ndị wẹ rị e tikpọ.

6“ ‘Gbapụ nị! Zụọrị nị isi ụnụ! Ọsụọn'a nị ụnụ k'a nọ kẹ ẹfịfịa junipa hụn ya sụọ tụkeri imẹ atụ!’

7“Makẹni ụnụ gi ihiẹn ụnụ rụn e dọn ẹnya, ya lẹ akụ-lẹ-ụba ụnụ, wẹ k'a nwụnrụnzịkwọ ụnụ nwẹn. Wẹ k'e weridẹ mmọn ụnụ wụ Kẹmọshi pụ, ya lẹ ohẹn-Kemọshi lẹ ndị-ọrụn Kẹmọshi.

8“Onyẹ-ntikpọ jẹnkọ d'e ru alị ile rị Mụabụ, onwọnni hụn ọwụlẹ k'a wanahịnnị. O tikpọ ndị rị Ọdanmgbugbu la iwi, o tikpọ ndị rị alị-aradan la iwi. Mmẹ wụ Osolobuẹ e kugụọ a.

9“Ye ni Mụabụ nku, n'o fepụkọ efepụkọ; alị ndị shịa ẹfọ rịn'a k'a gba okpokoro, onwọnni onyẹ k'a họdụ imẹ wẹ.

10“Onyẹ e gi ahịa a rụn ọrụn Osolobuẹ ya wụrụ onyẹ wẹ bụ ọnụ! Onyẹ-agha jụ nị ọpịa-agha a egbukọ onyẹ Osolobuẹ sị a gbu, ya wụrụ onyẹ wẹ bụ ọnụ.

11“Ẹhụ fu alị Mụabụ gha alị lala, eyetuni w'ẹ nsọngbu — ọ nọhụ kẹ manya wẹ latọ imẹ obele ẹ n'o dọn, manya wẹ rịlẹni e huhumẹ. Akpụnpụtuni wẹ wẹ alị wẹ. Mụabụ nọ kẹ manya sụọhutọtulẹni, hụn e kunkwọ fuẹin k'o kun.

12Kanị, ogẹn lala hụn m'e gi zijẹn ndị e hupụnị, e hupụ wẹ ihiẹn rị imẹ ẹ. E hupụchanrịn wẹ Mụabụ kẹ w'e hupụ manya rị ọgọ, ọ gba okpokoro, a kụkpọ w'a kẹ ite. Ya kẹ Osolobuẹ ku.

13“O k'e kpuye alị Mụabụ, o gi gi mmọn wẹ wụ Kẹmọshi dọn ẹnya, k'o dọn kpuye Izrẹlụ Ẹbamịn-ugu hụn gi mmọn wẹ kọma imẹ Bẹtẹlụ dọn ẹnya.

14“Kị ụnụ rị a sịnị, ‘Ndị odogun-agha kẹ ẹnyi wụ dikẹn ọgụn kẹ ẹnyi wụ?’

15“ ‘Wẹ k'e tikpọ alị Mụabụ; agha k'e ru obodo ile rịn'a; wẹ k'e gbuchanrịndẹ ikorọbịa a ndị kachanrịn mma. Eze hụn ẹfan a wụ Osolobuẹ ihiẹn ile rị okpuru ẹ e kugụọ a!’

16Nke Mụabụ e d'a gụ; okẹn-ihiẹn k'a bịakẹnrin.

17Ndị ile nọhunmẹ alị Mụabụ, kwanmanị n'a; ndị ile a nụ ẹfan a, gomẹ ni, ‘A kpagi wẹ okẹn-ọkpọ nwẹn a kpa ikẹn! A kpagi wẹ ọkpọ-ọma hụ, ọghọ a a la!’

18“Ụnụ enwọnkọzị ọghọ hụ ụnụ te nwọn, shi ni akpak'alị d'a nọdị, ụnụ ndị bi Dibọnụ rị Mụabụ — makẹni onyẹ hụn k'e tikpọ Mụabụ k'e ru azụụn nke ụnụ imẹ Mụabụ. O jẹnkọ d'e tikpọchanrịn ebe ile ụnụ a gbaban.

19Ịyụ hụn bi Arụa imẹ Mụabụ, d'e wuzo ọkpụzọ e lee ẹnya. Ị hụn okẹnnyẹ gbapụkọnị mọbụ okpoho gbakọ ọsọ-agha, ị sị a, ‘Kị rọ?’

20O k'a sị ị, ‘Ụya e rigụọ Mụabụ; e tikpọgụọ w'a. Gomẹ ni; kwanma nị ẹkwan! Nọ nị mkpẹnrẹn Iyi-Anọnụ hị nị e tikpọgụọ wẹ Mụabụ.

21Alị ndịnị rị alị-aradanị rị elu-ugu k'e gi isi buru ihiẹn wẹ mẹ — kẹ Holọnụ kẹ Jaza kẹ Mẹfaatị,

22kẹ Dibọnụ kẹ Nebo kẹ Bẹt-Diblataịm,

23kẹ Kiriataim kẹ Bẹt-Gamulu kẹ Bẹt-Miọnụ,

24kẹ Kẹriọtụ kẹ Bozra — kẹ alị ile rị alị Mụabụ — kẹ ndị rị ẹhụ nsue kẹ ndị rị ebe teni.

25Wẹ k'a kwapụ Mụabụ mpịn o gi a kpa ikẹn, kpagi ẹ ẹka.’ Mmẹ wụ Osolobuẹ e kugụọ a.

26“Ye Mụabụ afụnfụn ra n'ọ tụ a kẹ manya, makẹni ọ kpọ Osolobuẹ mgba; Mụabụ ya kperemẹ imẹ ẹgbọ a kẹni ya nwẹn wụrụzịkwọ ihiẹn w'a mụ ẹmụ.

27Ụnụ ndị Mụabụ amụgụọnị Izrẹlụ ẹmụ k'ọ dan? Izrẹlụ zundẹ nwan ohin ra? Kị ụnụ e finfinni isi a mụ ẹmụ ogẹn ile ụnụ gi e ku oku ẹ?

28Gbakwọ nị alị ụnụ ndị shịa ẹfọ tọ, ụnụ ndị bi Mụabụ, ụnụ a gbashi atụ ebe ọmụma jun d'a warị. Mẹ ni kẹ nduru hụn a kụ ẹkụ a e ye ụsụọ imẹ mgbugbu.

29“Ẹnyi a nụgụọ kẹ ndị Mụabụ a pachehan — mpache wẹ ẹlẹkwọ ẹkẹrẹ; ẹnyi a nụgụọ kẹ w'e mẹkarịhan enwẹn wẹ, e kukarị enwẹn wẹ; kẹ w'e rohan nị onwọnni onyẹ han kẹ wẹ.

30A marịngụọ m nị wẹ rị e mẹkarị enwẹn wẹ mmaka — mmẹ wụ Osolobuẹ ku ẹ; isi wẹ rị a nyan arị mma; wẹ rị a nyan isi mmakanaka.

31“M k'e goo Mụabụ; m k'a kwanị Mụabụ ile ẹkwan, m k'a kwannị alị Kiri-Harẹsẹti ẹkwan.

32Ẹkwan wẹ kwannị obodo Jaza ndị Amọnụ erukọ hụn m k'a kwann'ị, ịyụ, vaịnị rị e sue imẹ Sibma; y'e te kụrugụọdẹrị Ohimin-Nnu, kụrudẹ Jaza, mkpẹnrẹn Ohimin hụ. Onyẹ hụ e tikpọnị k'e ripụ mkpụrụ-osisi i lẹ vaịnị ị channị.

33Ịghọghọ lẹ anwịnrịn arịkọzị imẹ alị ugbo hụ wụ alị Mụabụ. Anịkọzị m wẹ hụn manya ebe wẹ nọ a pịnpụha manya; anụkọzị wẹ olu onyẹ rị a ghọghọ a zọ ogbe-vaịnị e wepụha manya; ọsụọn'a oro rị a rị, ọwụkọ oro ịghọghọ.

34“Ẹkwan ụya wẹ rị e ri imẹ Hẹsh'bọnụ lẹ Ẹlialẹ k'e rukwọrị ndị Jahazị ntịn; ndị rị Zụa k'a kwan ụya, a nụ w'a imẹ Horonaim lẹ Ẹglatị-Shẹlishiya; makẹni mirin Nimrim k'a tahịzịdẹ.

35M k'e gbuchanrịn ndị ile a chụn ẹjan imẹ ụlọ-mmọn ndị ahụn, ndị a mụyeni mmọn ndị ahụn wẹ rị e fe nsẹnsi. Mmẹ wụ Osolobuẹ ku ẹ.

36“Akpobi m rị nwan a kwannị Mụabụ nọkẹ ẹkpịrị wẹ rị e gbu wẹ gi a kwan ozun. Obi m rịzị a kwannị ndị Kiri-Harẹsẹti rị Mụabụ ẹkwan nọkẹ ẹkpịrị wẹ rị e gbu wẹ gi a kwan ozun, makẹni ihiẹn wẹ kpatọ a lachanrịn iwi.

37Wẹ ile jẹnkọ d'a kpụnpụ ntutu, kọpụ ẹtu; wẹ ile k'e bekika enwẹn wẹ ẹka, jeri ẹkwa-achọ ndị rị a kwan ụya.

38Ẹkwan-ẹkwan k'e jun alị Mụabụ — kẹ elu-ụlọ wẹ ile hụn w'a nọdị kẹ ebe ile rị ogbe wẹ nọ e zu, makẹni m jẹnkọ d'e tikpọ Mụabụ lekẹ ugbẹgbẹ nwọnlẹni ihiẹn wẹ gi ẹ e mẹ. Mmẹ wụ Osolobuẹ ku ẹ.

39“Heuu, wẹ k'e tikpọ Mụabụ ọda-ọda! Heuu, ndị Mụabụ k'a kwan ụya ọda-ọda! Ifẹnrẹn k'e mẹgbu ndị Mụabụ; Mụabụ k'e họnrin ihiẹn w'a mụ ẹmụ lẹ ihiẹn alị ile nọkunmẹn'ẹ e legha egun a tụ wẹ.”

40Makẹni mmẹ, Osolobuẹ, sị: Lee ẹ! Ugọn shịapụ nku rị e fetu n'o buru ihiẹn, onyẹ hụn lala d'a maye alị Mụabụ rọ!

41Ẹka ndị iṅẹnrẹn k'a dụ alị Kẹriọtụ rị Mụabụ; ebẹhụ zegbu enwẹn ẹ w'a gbaban k'a bandẹ ndị iṅẹnrẹn ẹka. Ogẹn hụ obi k'a nọ ndị-agha alị Mụabụ kẹ nke okpoho imẹ rị e mẹ.

42Wẹ k'e tikpọ alị Mụabụ, ọ wụkọzị alị, makẹni ọ kpọ Osolobuẹ mgba.

43Ihiẹn-egun lẹ mgbugbu lẹ ọnyan rị e che ụnụ ndị Mụabụ; ya kẹ Osolobuẹ ku.

44Onyẹ gbanahịn ihiẹn-egun ahụn, ọ danye imẹ mgbugbu hụ; onyẹ hụn isi nyinpụha imẹ mgbugbu hụ, ọ danban ọnyan hụ. Makẹni, m welanị alị Mụabụ ogẹn o gi ta afụnfụn furun'ẹ. Mmẹ wụ Osolobuẹ e kugụọ a.

45“Ndị gbakọnị agha sikọ d'a gbaha Hẹsh'bọnụ, wẹ lẹ ndụn gụnị wẹ; Hẹsh'bọnụ kẹ ọkụn k'a gha benwunrun, Hẹsh'bọnụ hụn Sihọnụ nọ kị ogẹn mbụ kẹ ọkụn k'a gha nwunrun. Ọ k'a dụnpụ ndị Mụabụ ezimezi ihun, dụnkpụkpọ okpokomisi ndị hụn agha a sụọ.

46Nke i a gụgụọ, Mụabụ! Nke ndị a rụa Kẹmọshi a gụgụọ! Wẹ k'a kpụnrụn ụmụ ị ikẹnnyẹ, kpụnrụn ụmụ ị ikpoho.

47“Kanị, o mẹgụ, m jẹnkọ d'e mẹ n'ọ rịzịnị alị Mụabụ mma. Mmẹ wụ Osolobuẹ ku ẹ.” Ebeni kẹ ikpe Chuku ma alị Mụabụ jẹndemẹ.