bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Ika
/
Ika 2018 Bible
/
Luke 10
Luke 10
Ika 2018 Bible
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 11 →
1
Ọhụn e mẹgụ, Di-nwọnni-ẹnyi nọ họrị ikẹnnyẹ mmẹbụọ kwasị ọgụn-ẹtọ ndị ọzọ. Ọ nọ zipụ wẹ ẹbụọ-ẹbụọ, nị wẹ burun'ẹ ụzọ jẹn obodo ile lẹ ebe ile o sikọ d'e jẹn.
2
Ọ nọ sị wẹ, “Ihiẹn-ugbo wẹ jẹnkọ d'a ghọ e bukẹ, kanị ndị ọrụn ebuni ọda. Mẹ ni nwan ekpere rịọ onyẹ nwọn ugbo n'o zi ndị ọrụn d'a ghọn'a ihiẹn-ugbo ẹ.
3
Jẹnmẹ ni nwan! Lee ẹ, m zikọ ụnụ kẹ atụnrụn wẹ ziye imẹ igunrun ẹwọrọ.
4
Ewerilẹ ni egho; ebulẹ ni ẹkpa; ewerilẹ ni akpụkụ; akụsịlẹ ni ụzọ kele onyẹ ọwụlẹ.
5
“Ụlọ ọwụlẹ ụnụ banye, kele ni wẹ, sị, ‘Udọn ya rị ụlọnị.’
6
Omẹni onyẹ udọn rị ụlọ hụ, udọn ụnụ a nọyen'ẹ; kanị, omẹni onyẹ udọn arịa, udọn ụnụ e kinhẹnni ụnụ.
7
Nọdị nị ụlọ ohu ahụn nabanhannị ụnụ, e ri, a ra ihiẹn ọwụlẹ wẹ ye ụnụ — makẹni onyẹ ọrụn furu w'a kụ ụgwọ. Akwahunmẹlẹ ni.
8
“Obodo ọwụlẹ ụnụ banye, nị a nabanhan wẹ ụnụ, ri ni ihiẹn ọwụlẹ wẹ ye ụnụ;
9
zụọ nị ndị emu rị a kụ imẹ obodo hụ; sị nị ndị rịn'a, ‘Alị-eze Osolobuẹ e rugụọ ụnụ ẹhụ.’
10
Kanị obodo ọwụlẹ ụnụ banye nị anabanhannị wẹ ụnụ, shi ni ọgbara-ogbe, ụnụ a nọ ebẹhụ sị,
11
‘Kẹ ẹjan obodo ụnụ rị ẹnyi ụkụ, ẹnyi rị e tichanpụ a a tọnị ụnụ n'ọ shịagbu ụnụ ẹri. Ka marịnkwọ nị nị Alị-eze Osolobuẹ a rịgụọ nsue!’
12
M rị a gwa ụnụ ezioku, obodo ahụn k'a takarị eje-alị wụ Sodọm afụnfụn Ụhụọhịn Okinkin-ikpe!
13
“Okẹn nsọngbu jẹnkọ d'a rịnị ndị obodo Korazini! Okẹn nsọngbu jẹnkọ d'a rịzịkwọnị ndị obodo Bẹtisaịda! Makẹni, omẹni imẹ alị Taya-lẹ-Sidọnụ kẹ wẹ nọ rụn ọrụn-atụmẹnya ndị wẹ rụn imẹ ụnụ, nkẹ o tekẹ ndị Taya-lẹ-Sidọnụ rogharịgụ, yiri ẹkwa-achọ, bụọ ntụn kpu enwẹn wẹ, nọdị akpakalị gi ghọsị n'e rogharịgụọ wẹ!
14
Ụnụ jẹnkọ d'a takarị ndị Taya-lẹ-Sidọnụ afụnfụn Ụhụọhịn Okinkin-ikpe.
15
“Nke ụnụ ndị obodo Kapanọm, ụnụ ro ni wẹ sikọ d'e bushi ụnụ elu-igwee? Mba! Wẹ jẹnkọ d'a tụ ụnụ ye alị-mmọn!
16
“Ọ nọ sị ndị nsọnmazụụn a, ‘Onyẹ gọn ụnụ ntịn, mmẹ k'ọ rị e gọn ntịn; onyẹ jụ ụnụ, mmẹ k'ọ jụ; onyẹ ọwụlẹ jụnị m rị a jụ onyẹ zihẹni m.’ ”
17
Omẹgụ, ikẹnnyẹ mmẹbụọ kwasị ọgụn-ẹtọ hụ nọ gi okẹn ịghọghọ lụaha. Wẹ nọ sị, “Di-nwọnni-ẹnyi, eje-mmọn rị ichẹn-ichẹn e humẹni ẹnyi isi hụn ẹnyi gihụ gi ẹfan ị gwa wẹ oku!”
18
Jesu nọ sị wẹ, “A hụnghọ m kẹ Ekwensụ gha elu-igwee dan ‘nwaịn!’ nọkẹ amụma beni.
19
Lee ẹ! E yeọlẹ m ụnụ ikẹn ịzọ agwọ lẹ akpị lẹ ikẹn ile Eṅẹnrẹn nwọn ụkụ ghafe, onwọnni ihiẹn o k'e mẹ ụnụ.
20
K'osilẹrị, aghọghọlẹ ni nị eje-mmọn rị e humẹni ụnụ isi, ka ghọghọ nị n'e deyegụọ wẹ ẹfan ụnụ imẹ elu-igwee.”
21
Ogẹn hụzịkwọ, Jesu nọ ghọghọ imẹ Mmọn-nsọ, sị, “Baba, Onyẹ nwọn elu-igwee lẹ ụwa! M rị a ja ị mma ni y'e zuemẹgụọnị ndị marịn ihiẹn lẹ ndị nwọn nghọta ihiẹn ndịnị, we wẹ ghọsị ụmụ-ndu. Ẹghẹẹ Baba, ẹnịna k'ị chọ n'ọ rị.
22
Nẹdi m e bugụọ ihiẹn ile che m ẹka. Onwọnni onyẹ marịn onyẹ Nwa-Chuku wụ wezụka Chuku-Nẹdi; onwọnzikwọnị onyẹ marịn Chuku-Nẹdi wezụka Nwa a lẹ onyẹ ọwụlẹ Nwa a chọ n'o mẹ ẹ marịn a.”
23
Jizọsị e kugụ ihiẹnni, ọ nọ gbehutọ, bu ihun zinmẹ ndị nsọnmazụụn a, kagwa wẹ, sị, “Ẹnya rị a hụn ihiẹn ndịnị ụnụ rị a hụn e nwọnkẹ ngọzi!
24
M rị a gwa ụnụ, ndị-amụma lẹ ndị-nze bu ọda a chọgụọ nị wẹ hụn ihiẹn ụnụ rị a hụn, ahụnnị w'a; a chọzịkwọ wẹ nị wẹ nụ ihiẹn ụnụ rị a nụ, anụnị w'a.”
25
Ọka-iwu ohu bịa d'e shini Jesu ọnyan. Ọ sị Jesu, “Onyẹ-nkuzi, kị m'e mẹ nị m nwọnhẹn ndụn-itẹbitẹ?”
26
Jesu nọ sị a, “Kị Iwu Mozizi ku? Nanị ị ghọta a?”
27
Okẹnnyẹ hụ nọ za, “ ‘Gi obi i ile, umẹ-ndụn i ile, ikẹn i ile lẹ uche i ile nwọn ihiẹn-ọsụsụọ Di-nwọnni-ẹnyi wụ Chuku i’; lẹ ‘Nị ihiẹn ibe i a sụọ ị kẹ ihiẹn enwẹn i dọn a sụọ ị.’ ”
28
Jesu nọ sị a, “Y'a zagụọ ọhụnma; mẹ ẹ nwan kẹni i rị ndụn.”
29
Kanị Ọka-iwu hụ chọ n'o kuni enwẹn ẹ ọhụnma, ọ nọ sị Jesu, “Onyẹ wụ nwan ibe m?”
30
Jesu nọ za, “Okẹnnyẹ ohu gha Jerusalẹm jẹnkọ Jẹriko. Ọ nọ danban ẹka ndị ohin. A narịn w'a ihiẹn ile o gi, gbu ẹ ili, ọ họdụ ẹkẹrẹ n'ọ nwụn, wẹ nọ la a tọ ụzọ.
31
Ọ nọ nwan mẹ ni onyẹ nchụn-ẹjan ohu ghakọ ụzọ hụ; kanị, ọ hụn okẹnnyẹ hụ, ọ nọ ghakpẹn ẹ.
32
Ẹrịra kẹ onyẹ Livaị a rụn ọrụn Ụlọ-nsọ hụn ghakọ ụzọ hụ dọnzi pụha ebahụn, ọ hụn okẹnnyẹ ahụn, ghakpẹn ẹ.
33
Kanị, onyẹ Sameria jẹnkọ alị-ịhịan a pụha ebe okẹnnyẹ hụ rị, hụn a, omikẹn ẹ nọ mẹ ẹ.
34
Ọ nọ nọzụnhan, hu udẹn lẹ manya ye ẹ ebe ile wẹ rụ a ẹhụ, kẹnmẹchanrịn a wẹ ile. Ya ọ nọ gi anyịnyan a buru okẹnnyẹ hụ, we ẹ shi ụlọ ndị-ijẹn, nọ ebẹhụ lepụ a ẹnya.
35
Eki e fọn, ọ nọ we egho ọrụn akpọhịn ẹbụọ ye hụn nwọn ụlọ ndị-ijẹn hụ, sị a, ‘Dodo, lepụ a ẹnya; m kinhẹn e yepụ m'ị hụn ọwụlẹ k'a banzịn'a.’
36
“Jesu nọ nwan sị ọka-iwu hụ ọ tanị iluni: Imẹ mmadụ ẹtọnị, onyẹ wụ ibe okẹnnyẹ hụ danye ẹka ndị ohin?”
37
Ọ nọ za, “Onyẹ hụn mẹn'ẹ ẹfọma.” Ya kẹ Jesu nọ sị a, “D'e mẹ nwan ẹrịra.”
38
Ogẹn Jesu lẹ ndị nsọnmazụụn a gi jẹnkọ, wẹ nọ banye obodo ohu mẹ ẹkẹrẹ. Okpoho ohu ẹfan a wụ Mata nọ nabanhan a iwe ẹ:
39
Mata nwọn nwẹnẹ w'a kpọ Meri. Mẹri nọ nọdị alị ebe ụkụ Di-nwọnni-ẹnyi rị, e gọn ntịn ihiẹn ọ rị e ku.
40
Kanị, ozi jun mmụlọ anịnị Mata nọdị ụzọ ohu. Mata nọ bịa d'e kunrun Jesu, sị, “Di-nwọnni-ẹnyi, onwọnni ihiẹn i kpọ a nị nwẹnẹ m la ọrụn ile tọnị mmẹ sụọ? Gwa a nwan d'e yeni m ẹka.”
41
Kanị Di-nwọnni-ẹnyi nọ za a, “Mata, Mata! Ị rị e hue uhue, e sọngbu enwẹn i yeni ihiẹn bu ọda —
42
kanị ihiẹn ohu sụọ rị mkpa; Meri a họrịgụọ hụn ka mma; anapụkọ w'a ya.”
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 11 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24