bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Ika
/
Ika 2018 Bible
/
Luke 9
Luke 9
Ika 2018 Bible
← Chapter 8
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 10 →
1
Jesu kpọkikomẹ ndị nsọnmazụụn a mmẹbụọ, ye wẹ ikẹn hụn eje-mmọn ile e gi rị okpuru wẹ lẹ hụn wẹ e gi zụọ ọrịa.
2
Ya ọ nọ zi wẹ d'e zi ozi Alị-eze Osolobuẹ lẹni wẹ d'a zụọ ndị emu rị a kụ.
3
Ọ nọ sị wẹ, “Ụnụ jẹnkọnị, ewerilẹ ni ihiẹn ọwụlẹ: kẹ ọkpọ kẹ ẹkpa kẹ ihiẹn-oriri kẹ egho; ewerilẹ ni ẹwuru ọzọ cheni hụn ụnụ yi.
4
Ụlọ ọwụlẹ nabanhan ụnụ, nọdị nị ebahụn d'e ru mgbe ụnụ gha obodo hụ pụ.
5
Ebe ọwụlẹ wẹ nọlẹni nabanhan ụnụ, ụnụ pụkọnị obodo hụ, kpukpupụ nị ẹjan rị ụnụ ụkụ n'ọ wụrụ ihiẹn wẹ e gi shịagbu wẹ ẹri.”
6
Ndị nsọnmazụụn hụ nọ jẹnmẹ, a ghasọnmẹ wẹ ụmụ-alị ichẹn-ichẹn, e zi oziọma, a zụọ ọrịa ebe ile wẹ ru.
7
Ogẹn Hẹrọdụ, hụn rị a kị ẹgbẹrẹ Galili gi nụ ihiẹn ile rị e mẹni, obi eruzin'ẹ alị kaka. Makẹni o nwọn ndị rị a sị nị Jọnụ hụn e mẹ mirin-Chuku a ghagụọ ọnwụn lihi,
8
ndị ọzọ sị nị Ẹlaịja a pụhagụọ, ndị ọzọ sịzị nị onyẹ ohu imẹ ndị-amụma mbụ e lihigụọ.
9
Hẹrọdụ nọ sị, “Mmẹ bepụ Jọnụ isi; onyẹ wụzị nwan onyẹni m rị a nụ otiti ẹ?” Ya ọ nọ chọma n'ọ hụn Jizọsị.
10
Ndị-ozi hụ pụ-ichẹn a lụaha ebe wẹ jẹn d'e zi ozi Alị-eze, wẹ nọ gwa Jesu ihiẹn ile wẹ mẹ. Ọ nọ gi nzuzue weri wẹ pụ, wẹ nọ shi obodo w'a kpọ Bẹtisaịda.
11
Kanị ogẹn igunrun ndị ahụn gi nụ a, wẹ nọ rusọnmẹ ẹ. Ọ nọ nabanhan wẹ, gwa wẹ oku Alị-eze Osolobuẹ, zụọ ndị hụn chọ nzụọrị.
12
Ogẹn anwụn gi rọma, ndị nsọnmazụụn a mmẹbụọ hụ nọ bịa d'e kunrun ẹ, sị a, “Sị igunrunni lama, nị wẹ jẹn obodo ndị mẹ ẹkẹrẹ-ẹkẹrẹ lẹ alị-ọfịa rị ẹgbẹrẹni d'a chọrị ebe wẹ k'a ranhịn lẹ ihiẹn-oriri, makẹni onwọnni onyẹ bi ebeni ẹnyi rị.”
13
Kanị Jizọsị nọ sị ndị nsọnmazụụn a, “Yeni wẹ ihiẹn-oriri.” Ndị nsọnmazụụn a nọ sị a, “Ogbe brẹdi isẹn lẹ azụn ẹbụọ sụọ kẹ ẹnyi nwọn, mmanị ẹnyi jẹnkọ d'e ṅọnni ndịnị ile ihiẹn-oriri.”
14
Wẹ ku ẹrịra makẹni ndị rị ebẹhụ rị ihiẹn nọ kẹ ikẹnnyẹ nnụ-uku isẹn (5,000). Ya ọ nọ sị ndị nsọnmazụụn a, “Sị nị wẹ nọdị ọkụdụ-ọkụdụ, ihiẹn nọ kẹ iri-kwasị-ọgụnnaị, iri-kwasị-ọgụnnaị.”
15
Ndị nsọnmazụụn a nọ mẹ ẹ, ndị hụ ile nọ nọdị alị ẹrịra.
16
Jesu nọ weri ogbe brẹdi isẹn hụ lẹ azụn ẹbụọ hụ, lee ẹnya elu-igwee, kpanmịn Osolobuẹ; ya ọ nọ bebe wẹ, weye ndị nsọnmazụụn a nị wẹ kesọnmẹni igunrun hụ.
17
Wẹ ile nọ rijunchanrịn ẹfọ. E kpọnkikomẹ wẹ irinrin ẹ, o jun ụkpalị mmẹbụọ.
18
Ụhụọhịn ohu, Jesu sụọ nọdị e mẹ ekpere. Ndị nsọnmazụụn a nọkunmẹ ẹ. Ọ nọ sị wẹ, “Onyẹ kẹ wẹ sị nị ịya kẹ m wụ?”
19
Wẹ nọ sị, “O nwọn ndị sị ị wụ Jọnụ hụn e mẹ mirin-Chuku; ndị ọzọ sị ị wụ Ẹlaịja; ndị ọzọ sị ị wụ onyẹ amụma mbụ-mbụ hụn gha nwan ọnwụn lihi.”
20
Ọ nọ nwan sị wẹ, “Ụnụ nwẹn, onyẹ kẹ ụnụ sị nị ịya kẹ m wụ?” Pita nọ za, “Ịyụ wụ Kraịstị, Onyẹ-nzụọpụha ahụn Osolobuẹ Tumẹ.”
21
Ya Jizọsị nọ dọ wẹ ẹka-ntịn wẹ agwakwọlẹ onyẹ ọwụlẹ ihiẹnni.
22
Ọ nọzị sị wẹ, “Nwa nke Ịhịan jẹnkọ d'a tarịrị okẹn afụnfụn ẹka ndị-isi lẹ ndị-isi nchụn-ẹjan lẹ ndị-nkuzi Iwu. Wẹ sikọ d'a jụ a, gbu ẹ, kanị, nke akpọhịn ẹtọ Osolobuẹ e weli ẹ.”
23
Ọ nọ sị wẹ, “Onyẹ chọ n'o sọn m, ya jụ enwẹn ẹ, buru obe ẹ ụhụọhịn ile, sọnmẹ m.
24
Makẹni onyẹ chọ n'o ghe isi ẹ, isi ẹ a tọ a; kanị, onyẹ hụn gi ufiri m tuhu ndụn a k'e nwọnhẹn ẹ.
25
Elee erere k'ọ bannị ịhịan, omẹni o nwọnchanrịngụ ụwa ile, ya lẹ enwẹn ẹ e tuhu?
26
“Makẹni, onyẹ mẹ ifẹnrẹn mmẹ lẹ oku-ọnụ m, mmẹ wụ Nwa nke Ịhịan sikọ d'e mẹzi ifẹnrẹn ẹ ogẹn m'e gi gi ọghọ m lẹ nke Chuku-Nẹdi lẹ nke ndị mmọn-ozi nsọ bịa.
27
M rị a gwa ụnụ ezioku, imẹ ndị turu ebeni o nwọn ndị jẹnkọlẹni d'a nwụnhụn d'e ru ni a hụn wẹ Alị-eze Osolobuẹ.”
28
Ọ rị ihiẹn nọkẹ akpọhịn ẹsatọ Jesu ku ihiẹn ndịnị, ọ nọ weri Pita lẹ Jọnụ lẹ Jemisi shi elu ugu d'e mẹ ekpere.
29
Ebe ọ rị e mẹ ekpere, ihun ẹ nọ nwọnhutọ, ẹkwa o yi nọ gbukemẹ.
30
Idẹnmizi ya lẹ ikẹnnyẹ ẹbụọ nọ kumẹ oku. Ikẹnnyẹ ẹbụọ hụ wụ Mozizi lẹ Ẹlaịja;
31
wẹ gi ọghọ elu-igwee pụha, e ku oku ọnwụn Jizọsị hụn o sikọ d'a nwụn imẹ Jerusalẹm gi mẹzu uche Osolobuẹ.
32
Ụran te gi Pita lẹ ibe ẹ ya lẹ wẹ wị, kanị ogẹn o gi fọn wẹ ẹnya kẹ wẹ gi hụn ọghọ Jizọsị lẹ ikẹnnyẹ ẹbụọ ahụn turuyenin'ẹ.
33
Ogẹn ikẹnnyẹ ẹbụọ hụ gi gha ebe Jesu rị pụkọ, Pita nọ sị Jesu, “Di-nwọnni-ẹnyi, ọ rịka mma nị ẹnyi nọdịchanrịn ebeni! Nị ẹnyi tụn ọdụ ẹtọ: nke i wụ ohu, nke Mozizi wụ ohu, nke Ẹlaịja wụ ohu.” (Pita amarịn ihiẹn o rị e ku.)
34
Okuni rịkwọ Pita ọnụ kẹ orukpu pụha d'e kpumẹ wẹ. Egun tụ ndị nsọnmazụụn ẹtọ hụ ogẹn orukpu hụ gi rị e kpumẹ wẹ.
35
Olu nọ gha imẹ orukpu hụ sị, “Ọnwan wụ Nwa m, Onyẹ hụn m họrị, gọnn'ẹ ntịn!”
36
Ogẹn olu hụ gi kugụ, Jesu sụọ kẹ wẹ hụnzị. Ndị nsọnmazụụn a ẹtọ hụ ekupụhanị ihiẹnni wẹ hụn ogẹn hụ wẹ gi hụn a; onwọnni onyẹ wẹ gwa ihiẹn wẹ hụn.
37
Eki e fọn, ogẹn Jesu lẹ ndị nsọnmazụụn a ẹtọ ahụn gi gha elu ugu hụ hidan, igunrun hi-ogbe nọ bịa d'e kunrun Jesu.
38
Okẹnnyẹ ohu nọ gha imẹ igunrun hụ yi, “Onyẹ-nkuzi! Dodo, lee nwa m! Ịya sụọ kẹ m mụ!
39
O nwọn eje-mmọn e kwọndọnn'ẹ. O kwọndọn ẹ, ọ dọbepụ oro, ụfọfọ a gbọma a ọnụ; a ra yen'ẹ efe; ẹhụ ẹhụ k'ọ rụsọnmẹ ẹ!
40
A rịọlẹ m ndị nsọnmazụụn ị nị wẹ chụpụ a, asanị wẹ ẹka.”
41
Jesu nọ, sị, “Eje-agbọ nwọnlẹni okukwe! Elebe mmẹ lẹ ụnụ k'a nọru?! Elebe kẹ m k'e dinruni ụnụ ndidin?!” Ya ọ nọ sị okẹnnyẹ hụ, “Wẹhẹ nwa ị ebeni.”
42
Ogẹn nwata-okẹnnyẹ ahụn gi pụla, eje-mmọn hụ nọ we ẹ gbe alị, dọma a. Kanị Jesu nọ jụgbọ eje-mmọn hụ, zụọ nwata hụ, we ẹ ye nẹdi ẹ.
43
Ogẹn ndị ahụn gi hụn ikẹn Osolobuẹ, ọ tụ wẹ ẹnya ọda-ọda. Hụn ahụn ihiẹn ile Jesu rị e mẹ rịkwọ a tụ ịhịan ile ẹnya, ọ nọ sị ndị nsọnmazụụn a,
44
“Azọkwọlẹ ni ihiẹnni m jẹnkọ d'a gwa ụnụ kikẹnni: Wẹ sikọ d'e re Nwa nke Ịhịan ye wẹ.”
45
Kanị ndị nsọnmazụụn a aghọtanị oku hụ. Wẹ zuemẹni wẹ ya, amamgbe w'a ghọta a, kanị egun anịnị wẹ jụ a ihiẹn o gi ẹ ku.
46
Onwọn ogẹn ndị nsọnmazụụn Jesu gi rị a dọ onyẹ kachanrịnnị imẹ wẹ.
47
Jizọsị a marịngụọ ihiẹn wẹ rị e ro imẹ obi wẹ, ya kẹ ọ nọ wezụhan nwa-ndu ohu ebe ọ rị,
48
ọ nọ sị wẹ, “Onyẹ gi ufiri ẹfan m nabanhan nwata nọ ẹnịna, mmẹ k'ọ nabanhan; onyẹ nabanhannị m nabanhan onyẹ zini m. Ya wụ, onyẹ hụn kachanrịn ẹkẹrẹ imẹ ụnụ ile, ịya wụ onyẹ hụn kachanrịnnị.”
49
Ya kẹ Jọnụ nọ sị Jizọsị, “Di-nwọnni-ẹnyi, ẹnyi hụn okẹnnyẹ ohu rị e gi ẹfan ị a chụpụ eje-mmọn, ẹnyi nọ sị a kụsị a, makẹni ara sọn ẹnyi.”
50
Kanị Jesu nọ sị wẹ, “Akụsịlẹ n'a, makẹni onyẹ ghalẹni a nọkin ụnụ ụzọ rị azụụn nke ụnụ.”
51
O rumẹ ogẹn wẹ e gi we Jizọsị shi elu-igwee, ọ nọ buchanrịn ihun zinmẹ Jerusalẹm, o leni ẹnya azụụn.
52
Ọ nọ zi ndị o zi burun'ẹ ụzọ. Wẹ nọ banye obodo ohu rị Sameria d'a kwademẹn'ẹ ihiẹn.
53
Kanị ekwerini wẹ n'ọ banhan makẹni Jerusalẹm kẹ ẹnya a rị.
54
Ogẹn ndị nsọnmazụụn a wụ Jemisi lẹ Jọnụ gi hụn ihiẹnni, wẹ nọ sị, “Di-nwọnni-ẹnyi, y'a chọghọ nị ẹnyi gha elu-igwee kpọtu ọkụn n'o ripụ wẹ [kẹ Ẹlaịja dọn mẹ]?”
55
Kanị Jesu nọ gbehutọ, jụgbọ wẹ, sị, [“Ụnụ amarịn ụdị obi ụnụ nwọn.”
56
Mmẹ wụ Nwa nke Ịhịan abịanị d'e gbu ịhịan, kama, m bịa d'a zụọpụha wẹ.] Ya lẹ wẹ nọ shi alị ọzọ mẹ ẹkẹrẹ.
57
Ogẹn wẹ gi jẹnkọ, okẹnnyẹ ohu nọ sị Jesu, “M k'e sọn i ebe ọwụlẹ i jẹnkọ.”
58
Jesu nọ sị a, “Ufu nwọn okporo; nnụnụ nwọnzikwọ ẹkụụ; kanị mmẹ wụ Nwa nke Ịhịan enwọn ebe m'e buche isi.”
59
Jesu sị okẹnnyẹ ọzọ, “Sọnmẹ m.” Kanị okẹnnyẹ hụ nọ sị, “Diọkpa, nị m d'e ligụ nẹdi m.”
60
Ya Jesu nọ sị, “Hapụ ndị nwụnhụnnị nị wẹ li ndị nke wẹ nwụnhụnnị. Ịyụ nwẹn, jẹnmẹ d'e zi ozi Alị-eze Osolobuẹ.”
61
Onyẹ ọzọ sịzị, “Diọkpa, m jẹnkọ d'e sọn i, kalẹ, nị m d'a gwagụ ezi-lẹ-ụlọ m, ‘Nọdị nị ọhụnma.’ ”
62
Kanị Jizọsị nọ sị a, “Onyẹ hụn e bu ẹka e che ọrụn e lee ẹnya azụụn efuruni Alị-eze Osolobuẹ.”
← Chapter 8
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 10 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24