Luke 15

Ika 2018 Bible

← Chapter 14 Jump to: Chapter 16 →

1Ndị ile a na ụgwọ-isi lẹ ndị wẹ gi njọ marịn hụ a nọkunmẹ Jizọsị nị wẹ gọn ẹ ntịn.

2Ndị Itu-Farisi lẹ ndị-nkuzi Iwu nọ dẹnwịnnwịnma, a sị, “Okẹnnyẹni a nabanhan ndị njọ, e sọn wẹ e ri ihiẹn-oriri.”

3Ya Jizọsị nọ tanị wẹ iluni:

4“Imẹ ụnụ, onyẹ k'e nwọn atụnrụn ọgụn-isẹn, ohu e tuhu, ọ latọnị ohu-arịa-ọgụn-isẹn họdụnị ebẹhụ o wejẹn wẹ d'a kpa nni, jẹn d'a chọ ohu hụ tuhuni d'e ru mgbe ọ hụn a?

5Ọ hụn a, o k'a pa che uvun, a ghọghọ;

6o ru ụlọ, ọ kpọgbama ndị ọwụ a lẹ ndị bikunmẹn'ẹ, sị wẹ, ‘Sọn ni m ghọghọ, ni a hụngụọ m atụnrụn m tuhuni.’

7M rị a gwa ụnụ, ẹrịra kẹ ịghọghọ jẹnkọ d'a rị elu-igwee ọda-ọda yeni onyẹ-njọ ohu rogharịnị karị ndị ezi-omumẹ ohu-arịa-ọgụn-isẹn hụn nrogharị rịlẹni mkpa.

8“Ra elee okpoho nwọn egho ọrụn akpọhịn iri, egho ọrụn akpọhịn e tuhu, hụn jẹnkọlẹni d'a mụye ukpẹ, zachanrịn mmụlọ iwe ẹ, chọ a ntan, chọ a imọn d'e ru n'ọ hụn a?

9Ọ hụn a, ọ kpọkikomẹ ndị ọwụ a lẹ ndị bikunmẹn'ẹ, sị wẹ, ‘Sọn ni m ghọghọ, n'a hụngụọ m egho m tuhuni.’

10M rị a gwa ụnụ, ẹrịra kẹ ịghọghọ dọn a rị imẹ igunrun ndị mmọn-ozi Osolobuẹ makẹni onyẹ-njọ rogharị erogharị.”

11Jizọsị nọzị sị, “Okẹnnyẹ ohu mụ ikẹnnyẹ ẹbụọ.

12Ọ nọbe hụn-nta nọ sị nẹdi ẹ, ‘Baba, ye m ihiẹn runi m.’ Ya okẹnnyẹ hụ nọ kebe ihiẹn ẹ, ye ẹ hụn run'ẹ.

13“O ke mẹhụ akpọhịn ole, hụn-nta nọ bu ihiẹn ile wẹ keye ẹ re, shi alị teni, nọ ebahụn ritịta egho ẹ yeni obibi nwọnlẹni isi.

14Ogẹn o gi rigụ ihiẹn ile o nwọn, okẹn ụnwụn nọ mụgbarị alị hụ, elu nọ fụma a.

15Ya ọ nọ jẹnmẹ d'a rụnmanị onyẹ alị hụ ọrụn, ọ nọ zi ẹ shi ebe ọ nọ a zụn anụ d'e yemẹn'ẹ ezin ihiẹn-oriri.

16O te rị a n'o gi ihiẹn-oriri ezin e gbọn ẹgụn, kanị onwọnni hụn w'a nị a ri.

17“Ogẹn uche ẹ gi lụa, ọ nọ sị, ‘Ndị hụ ile nẹdi m we ọrụn e ri e rihọdụ, kanị ẹgụn hụ e gbu m ebeni?

18M jẹnkọ d'e lihi, buru nẹdi m; m jẹnkọ d'a sị a, “Baba, e mẹọlẹ m elu-igwee njọ, mẹzikwọ ị njọ.

19Efuruzini m onyẹ wẹ sikọ d'a kpọ nwa ị; weri m kẹ onyẹ ohu imẹ ndị hụn i we ọrụn.” ’

20“Ya ọ nọ buli, buru nẹdi ẹ. Kanị, ebe ọ rị ebe teni, nẹdi ẹ nọ lechen'ẹ; omikẹn nwa a nọ mẹ nẹdi ẹ ọda-ọda, ọ nọ gbaburu nwa a, dide ẹ, susu ẹ ọnụ.

21Ya nwa a nọ sị nẹdi ẹ, ‘Baba, e mẹọlẹ m elu-igwee njọ, mẹzikwọ ị njọ, efuruzini m onyẹ w'a kpọ nwa ị.’

22“Kanị, nẹdi ẹ nọ kpọ ndị idibo ẹ, sị wẹ, ‘Ozigbo-ozigbo! Wẹhẹ ni ẹkwa hụn kachanrịn mma yimẹ ẹ! Yimẹ n'ẹ ọla ẹka! Yimẹn'ẹ akpụkụ!

23Wepụha nị nwa-efin ahụn kachanrịn mma ẹnyi zụntọ nị ẹnyi gbu ẹ! Nị ẹnyi ri ni oriri, nị ẹnyi ghọghọ —

24makẹni nwa m nị te nwụnhụn anwụnhụn, kanị ọ rị nwan ndụn; o te tuhu etuhu, kanị a hụngụọ m'a nwan.’ Wẹ nọ rimẹ oriri, ghọghọma.

25“Nwa a hụn kanị rị ugbo ogẹnni. Ogẹn o gi lala, o rumẹ ẹhụ ụlọ, ọ nọ nụ egu wẹ rị a kpọ, e tẹn.

26Ya ọ nọ kpọ odibo ohu, jụ a, ‘Kị rị e mẹ?’

27Odibo hụ nọ sị a, ‘Nwẹnẹ i bịa abịa; nẹdi i e gbugụọ nwa-efin ahụn kachanrịn mma ọ zụntọ, makẹni ọ lụaha udọn lẹ ndọnkwa, onwọnni ihiẹn mẹn'ẹ.’

28Iwe nọ wemẹ nwẹnẹ ẹ hụn kanị, o kwerini ban mmụlọ. Ya kẹ nẹdi ẹ nọ pụha, rịọma a.

29Kanị, ọ sị nẹdi ẹ, ‘Lee ẹ, kete ahụa ole-lẹ-ole m hụ e fe i kẹ igbọn, enupụtunini m'i isi. Kanị, y'e yetudẹni m nwa-ewu mmaka nị mmẹ lẹ ndị ọwụ m ri, ra!

30Kanị, nwa ị nị gigụ ihiẹn i ile bu ịgbaraja a lụa nwan, y'e gbun'ẹ nwa-efin hụ kachanrịn mma ẹnyi zụntọ!!’

31Ya Nẹdi ẹ nọ sị a, ‘Nwa m, mmẹ lẹ yụ rịchanrịn ebeni, ihiẹn ile m nwọn wụ nke i.

32O furu nị ẹnyi ri oriri, ghọghọ, makẹni nwẹnẹ i ni te nwụnhụn anwụnhụn, kalẹ ọ rị nwan ndụn; o te tuhu etuhu, kanị, a hụngụọ w'a nwan.’ ”

← Chapter 14 Jump to: Chapter 16 →