Zechariah 2

Ika 2018 Bible

← Chapter 1 Jump to: Chapter 3 →

1E lee m ẹnya, m nọ hụn okẹnnyẹ gi eriri wẹ gi a ma ihiẹn.

2Ya m nọ sị a, “Elebe k'i jẹnkọ?” Ọ nọ za m, sị, “M sikọ d'e gi eririni ma Jerusalẹm, nị m hụn k'ọ shịahan lẹ k'o suehan.”

3Ya kẹ mmọn-ozi ahụn mmẹ lẹ ịya gba ku nọ jẹnpụha, mmọn-ozi ọzọ nọ jẹn d'e kunrun ẹ,

4sị a, “Ọsọ, d'a sị okorọbịa hụ, ‘Jerusalẹm k'a wụ alị nwọnlẹni mgbọn makẹni ịhịan lẹ anụmanụ k'a barahị,

5mmẹ nwẹn k'a wụrụ mgbọn rị e nwun ọkụn, fihunmẹ ẹ. Mmẹ k'a wụzịkwọ ọghọ a. Ya kẹ Osolobuẹ ku.’ ”

6Lihi ni! Lihi ni! Gha nị alị ahụn rị ẹbamịn-ugu gbapụ, ọsụọn'a nị e te feyịyagụọ m ụnụ nọkẹ ufere ye ẹbamịn ẹnọ rị ụwa! Ya kẹ Osolobuẹ ku.

7Lihi ni! Gbashi ni Jerusalẹm, ụnụ ndị bi nwan obodo Babilọnụ.

8Makẹni, Osolobuẹ ihiẹn ile rị okpuru ẹ hụn gi ufiri ọghọ a zi m, e kuọlẹ oku ndị hụn gbu ụnụ kwarị ihiẹn ụnụ. Ọ sị nị onyẹ ọwụlẹ mẹtụ ụnụ ẹka mẹtụ nwa-ẹnya a ẹka!

9Ọ sị, “Lee ẹ, m sikọ nwan d'a tịnpụ ẹka mẹshi wẹ ikẹn, ụnụ ndị wẹ te gi họnrin igbọn k'a kwanarịn wẹ ihiẹn wẹ!” Ogẹn hụ, ụnụ a marịn nị Osolobuẹ lẹ enwẹn ẹ, onyẹ hụn ihiẹn ile rị okpuru ẹ, zi mmẹ wụ Zẹkaraya.

10Osolobuẹ sị, “Ndị Zayọnụ, bụma nị ẹbụ, ghọghọma nị, nị m lala d'e biri imẹ igunrun ụnụ. Ya kẹ Osolobuẹ ku.

11O ru ogẹn hụ, alị bu ọda jẹnkọ d'a banyeni mmẹ wụ Osolobuẹ, e họnrin wẹ ndị nke m — e sọn m ụnụ biri.” Ogẹn hụ, ụnụ a marịn nị Osolobuẹ ihiẹn ile rị okpuru ẹ lẹ enwẹn ẹ zi mmẹ wụ Zẹkaraya d'a gwa ụnụ oku.

12Osolobuẹ jẹnkọ d'e gi Juda họnrin azụụn nke ẹ imẹ alị a nị rị nsọ; o k'e gizi Jerusalẹm họnrin ihiẹn ẹ pụ-ichẹn.

13Ịhịan ile, gba nị nkịtịn ihun Osolobuẹ, makẹni ọ ghagụọ Ụlọ a rị nsọ lihi d'a ghọsị ẹka a.

← Chapter 1 Jump to: Chapter 3 →