Zechariah 8

Ika 2018 Bible

← Chapter 7 Jump to: Chapter 9 →

1Ya kẹ Osolobuẹ ihiẹn ile rị okpuru ẹ nọ gwa m oku, sị m:

2“Ọnwan wụ ihiẹn Osolobuẹ ihiẹn ile rị okpuru ẹ ku: Ụya Jerusalẹm rị e ri a fụka m; ọ hụ a fụ m, e bu m olulu ọda-ọda!

3“Osolobuẹ ihiẹn ile rị okpuru ẹ sị: e kinhẹngụọ m Zayọnụ; ẹghẹẹ, m sikọ d'e biri imẹ Jerusalẹm, a kpọma wẹ Jerusalẹm ‘Obodo ezioku’, kpọma ugu Osolobuẹ ihiẹn ile rị okpuru ẹ, ‘Ugu rị nsọ.’

4“Osolobuẹ ihiẹn ile rị okpuru ẹ sị: ndị ẹgẹdi k'a rịzị Jerusalẹm: ikẹnnyẹ lẹ ikpoho a nọdịsọnmẹ elu ocho ihun-ezi wẹ, onyẹ-onyẹ lẹ ọkpọ a yeni nka;

5ụmụẹka rị e gu egu jẹnkọ d'e jun ogbe Jerusalẹm.”

6Osolobuẹ ihiẹn ile rị okpuru ẹ sị: “Ọsụọn'a n'ọ fụka ọrụn ẹnya ndịnị họdụ imẹ alịnị, n'ọ fụzị mmẹ nwẹn ọrụn?!” Ya kẹ Osolobuẹ ihiẹn ile rị okpuru ẹ ku.

7Osolobuẹ ihiẹn ile rị okpuru ẹ sị: “M sikọ nwan d'a zụọpụha ndị nke m, kẹ ndị rị alị ibe anwụn n'a wa kẹ ndị rị ibe ọ n'a dan,

8e welụa m wẹ Jerusalẹm d'e biri, a wụrụ wẹ ndị nke m, mmẹ nwẹn a wụrụ Chuku wẹ, gi ezioku lẹ ezi-omumẹ e sọn wẹ.”

9Osolobuẹ ihiẹn ile rị okpuru ẹ sị: “Jikẹnmẹ ni nwan, ụnụ ndị rị a nụ oku ndịnị m rị a gwa ụnụ ghahanị ndị-amụma, ndị-amụma hụn rị ebẹhụ kẹ wẹ gbemẹzi iyetọ wẹ gi nwan a tụndọnzi Ụlọ-NSỌ Osolobuẹ ihiẹn ile rị okpuru ẹ.

10Ezioku-ezioku, nị wẹ d'e gbemẹzi iyetọ hụ, onwọnni onyẹ a hụn ihiẹn ọ rị a rụn, kẹ ịhịan kẹ anụmanụ; kẹ ndị pụkọnị kẹ ndị banlanị onwọnni onyẹ obi e ru alị yeni egun ndị-iṅẹnrẹn — makẹni e mẹgụọ m onyẹ-onyẹ bunụmanị ibe ẹ.

11“Egikọzị m nwan ẹka m gi sọn ndị Juda mbụ sọn ndịnị họdụnị.” Mmẹ wụ Osolobuẹ ihiẹn ile rị okpuru ẹ ku ẹ.

12Mba! M jẹnkọ d'a kụn ọrịrịmma nọkẹ mkpụrụ; osisi vaịnị k'a mị mkpụrụ a; alị k'e mẹ ihiẹn; igwere k'e ye mirin ẹ. M k'e mẹ ndịnị họdụ imẹ ndị Juda nwọnrin ihiẹn ndịnị ile.

13Kẹ ụnụ ndị Juda lẹ Izrẹlụ ile te dọn wụ ihiẹn wẹ bụ ọnụ ẹnya alị ndị-ọzọ, ẹrịra kẹ m sikọ nwan d'a zụọpụha ụnụ, ụnụ a wụrụ ngọzi. Atụlẹ ni nwan egun; ka jikẹnmẹ ni a rụn Ụlọ ahụn.

14Makẹni, Osolobuẹ ihiẹn ile rị okpuru ẹ sị: Kẹ m dọn ku ẹ ogẹn ndị nẹdi ụnụ gi kpasu m iwe nị m k'e mẹshi ụnụ ikẹn, m nọ mẹ ẹ, eleni m ẹnya azụụn,

15ẹrịra kẹ m dọn nwan rị e ku ẹ nị m k'e mẹ obodo Jerusalẹm lẹ alị Juda ile mma; atụlẹ ni egun.

16“Ka lee ni ihiẹn ndị ụnụ k'e mẹ: A gwa nị ibe ụnụ ezioku; a han nị ezigbo eṅẹn imẹ ọgwa ụnụ ile — eṅẹn udọn gi a rị;

17amamalẹ ni ni ibe ụnụ eje-ihiẹn; egilẹ ni ẹri-ntụ mẹ ẹhụ; makẹni ihiẹn ndịnị ile e ze m ize.” Ya kẹ Osolobuẹ ihiẹn ile rị okpuru ẹ ku.

18Ya kẹ Osolobuẹ ihiẹn ile rị okpuru ẹ nọ nwan za ihiẹn wẹ jụ banyeni ọnụ ndị hụ wẹ rị e bu, sị m:

19“Osolobuẹ ihiẹn ile rị okpuru ẹ sị: Ọnụ ndị ahụn ụnụ e busọnmẹ ifọn nke ẹnọ lẹ ifọn nke isẹn lẹ ifọn nke ẹsa lẹ ifọn nke iri e bigụọ. Ogẹn hụ ile ụnụ te gi e bu ọnụ ndịnị jẹnkọ nwan d'a wụrụ nị ụnụ ndị Juda ogẹn ịghọghọ lẹ anwịnrịn lẹ mmẹmmẹ. A nị nị nwan ezioku lẹ udọn a sụọ ụnụ ụsụọ.”

20Osolobuẹ ihiẹn ile rị okpuru ẹ, sị: “Ịhịan lala! Ndị bidẹ obodo ndị ọzọ rị ichẹn-ichẹn lala!

21Ẹghẹẹ, ndị bi obodo ohu k'a chọjẹn ndị bi obodo ichẹn d'a sị wẹ, ‘Bịa nị, nị ẹnyi d'a rịọ Osolobuẹ; bịa nị nị ẹnyi d'e fe Osolobuẹ ihiẹn ile rị okpuru ẹ; ẹnyi lẹ enwẹn ẹnyi e jẹnmẹkwọ-o!’

22Alị bu ọda lẹ alị ndị a kpadẹ ikẹn k'a gha a bịa Jerusalẹm d'e fe Osolobuẹ ihiẹn ile rị okpuru ẹ; wẹ k'a bịa d'a rịọ Osolobuẹ.”

23Osolobuẹ ihiẹn ile rị okpuru ẹ sị: “O ru ogẹn hụ, ikẹnnyẹ iri ndị alị ọzọ, ndị a sụ asụsụ ọzọ, k'a dọdọn akpụ onyẹ Ju ohu ẹwuru, a rịọ a, ‘Dodo, nị ẹnyi sọn i la, nị ẹnyi a nụọlẹ nị Chuku rị azụụn nke ụnụ!’ ”

← Chapter 7 Jump to: Chapter 9 →