1 Thessalonians 1

Ilokano (Ti Biblia (1973))

Jump to: Chapter 2 →

1Ni Pablo, ni Silvano ken ni Timoteo, isuratda, iti Iglesia dagiti taga Tesalonica, nga adda iti Dios Ama ken ni Apo Jesu-Cristo: Parabur ken talna coma cadacayo.

2Cancanayon nga agyamancami iti Dios, gapu cadacayo amin nga idawdawatandacayo cadagiti carcararagmi;

3A laglagipenmi a di agsarday ti aramidyo iti pammati, ken ti trabajo ti ayat, ken ti nabileg a pananginanamayo ken Apotayo a Jesu-Cristo, iti imatang ti Dios ken Amatayo;

4Nga ammomi, ti pannacatudingyo cacabsat nga ay-ayaten ti Dios.

5Ta ti evangeliomi saan a dimteng cadacayo iti sao laeng, no di pay ket iti pannacabalin, ken iti Espiritu Santo, ken ti naan-anay a kinatalged; cas ammoyo met no aniacami a kita ti tao idi cadacayo, maipoon cadacayo.

6Ket nagbalincayo a tumutulad cadacami ken iti Apo, nga inawatyo ti sao a nabuyugan ti adu a rigat, agraman ragsac ti Espiritu Santo;

7Iti casta nagbalincayo nga ulidan cadagiti mammati nga adda idiay Macedonia ken Acaya.

8Ta nangrugi cadacayo nagwara ti sao ti Apo, saan la nga idiay Macedonia ken Acaya, no di pay ket iti amin a disso, ti pammatiyo iti Dios naiwarnac; iti casta awan ti pacasapulan ti panagsaomi ti aniaman.

9Ta isuda met laeng ibagada ti maipapan cadacami, no casano ti idadatengmi cadacayo, ken no casano ti panagsubliyo iti Dios manipud cadagiti didiosen, tapno agservicayo iti Dios a sibibiag ken pudno.

10Ken tapno urayenyo ti Anacna nga aggapu sadi langit isu a pinagungarna cadagiti natay, ni Jesus a mangisalacan cadatayo iti pungtot nga umayto.

Jump to: Chapter 2 →