1 Thessalonians 3

Ilokano (Ti Biblia (1973))

← Chapter 2 Jump to: Chapter 4 →

1Gapuna, idi a dicami macaurayen, napanunotmi a nasayaat no agbaticami a dacdacami idiay Atenas;

2Ket imbaonmi ni Timoteo, a cabsatmi, ken ministro ti Dios, ken catultulunganmi iti evangelio ni Cristo, tapno papigsaen ken liwliwaennacayo maipapan iti pammatiyo.

3Tapno awan coma ti tao a masingsinga gapu cadagitoy a rigat: ta dacayo met laeng ammoyo a naayabantayo maipaay itoy.

4Ta uray idi addacami cadacayo, impacpacaunami cadacayo nga agsagabatayto ti rigat; cas naaramid, a pagaammoyo.

5Gapu met itoy idinto a diac macaibturen, nangibaonac tapno maammoac ti pammatiyo, di la ket ta adda nacasulisuganyo, ket ti aramidmi agbalinto a barengbareng.

6Ngem ita ta simmangpeten ni Timoteo a naggapu cadacayo, ket imbagana cadacami ti naragsac a damag ti pammati ken ayatyo, ket cancanayon a laglagipendacami ket mailiwcayo unay a cumita cadacami, a cas met ti iliwmi cadacayo;

7Gapu itoy naliwliwacami, cacabsat, maipapan cadacayo, iti isu-amin a tuocmi ken rigatmi, gapu ti pammatiyo:

8Ita agbiagcami, ta agtalinaedcayo a sititibker iti Apo.

9Ta ania ti pagyaman a mabalinmi nga ited iti Dios gapu cadacayo, gapu iti amin a rag-o a pagragragsacmi maipoon cadacayo, iti sangoanan ti Dios;

10A rabii ken aldaw nga agdawdawatcami iti nasged unay tapno makitadacayo a rupanrupa, ket pabilgenmi ti pammatiyo?

11Ngem ti met laeng Dios ken Amatayo ken ni Apotayo a Jesus, ti mangidalan coma cadacami nga agturong cadacayo:

12Ket aramiden coma ti Apo a dumackelcayo ken adduancayo iti ayat ti maysa ken maysa, ken cadagiti isu-amin a tattao, a cas met ti panagayatmi cadacayo:

13Tapno mapapigsa dagiti puspusoyo, iti kinasanto nga awan ti pacapilawanda, iti sangoanan ti Dios ken Amatayo, intono iyaay ni Apotayo a Jesus a cuyugen dagiti isu-amin a sasantona.

← Chapter 2 Jump to: Chapter 4 →