1 Thessalonians 5

Ilokano (Ti Biblia (1973))

← Chapter 4 Jump to:

1Ngem maipapan cadagiti al-aldaw ken cadagiti pannawen, cacabsat, awan pacasapulanyo a maisurat cadacayo.

2Ta dacayo met laeng ammoyo a naimbag a cas iti mannanacaw iti rabii, casta ti iyaay ti aldaw ti Apo.

3Intono sasao-enda: Talna ken talged: isunto metten ti iyaayna cadacuada ti kel-laat a pannacadadael cas iti panagpasical a mapasamac ti masicog; ket didanto macalisi.

4Ngem dacayo, cacabsat, awancayo iti sipnget, tapno daydiay nga aldaw kel-laatennacayo a cas mannanacaw:

5Ta dacayo amin annacnacayo ti lawag ken annac ti aldaw; datayo saantayo a taga rabii, ken saan met a taga sipnget;

6Saantayo ngarud a maturog a cas cadagiti dadduma, no di ket agpuyattayo ket managparbengtayo coma,

7Ta dagiti maturog, maturogda iti rabii ket dagiti nabartec, nabartecda iti rabii.

8Ngem no maipapan cadatayo a taga aldaw, managparbengtayo coma, nga icapettayo a cabal ti barucong, ti pammati ken ayat, ken cabal ti olo, ti inanama ti pannacaisalacan.

9Ta ti Dios saannatayo a tinudingan a maipaay iti pungtot, no di ket tapno magun-odantayo ti pannacaisalacan, gapu ken Apotayo a Jesu-Cristo,

10Isu a natay gapu cadatayo, tapno uray addatayo nga agpuypuyat wenno matmaturog, agbiagtayo coma a maicuyog kencuana.

11Gapuna aglilinniwanliwacayo iti maysa ken maysa ket agsisinnurocayo cas ar-aramidenyo met.

12Ket dawatenmi cadacayo, cacabsat, a bigbigenyo dagiti agbannog iti tengngayo, ken mamangulo cadacayo iti Apo, ken mamalbalacad cadacayo;

13Ket patgenyo coma unay ida babaen ti ayat maipanggep iti aramidda. Agtalinaedcayo a sitatalna.

14Ngem ibalacadmi cadacayo, cacabsat, a bagbagaanyo coma dagiti naringgor a pabilgenyo dagiti maupay ti nakemda, a patalgedanyo dagiti nacapuy, ket naanuscayo coma cadagiti isu-amin.

15Kitaenyo ta awan coma ti manupapac iti siasino ti dakes iti dakes met laeng, ngem surutenyo a cancanayon ti nasayaat iti maysa ken maysa, ken cadagiti isu-amin.

16Agragsaccayo a cancanayon;

17Agcararagcayo a di agressat;

18Iti isu-amin, agyamancayo; ta daytoy ti nakem ti Dios ken Cristo Jesus ti maipapan cadacayo.

19Saanyo nga iddepen ti Espiritu;

20Saanyo a laisen dagiti panagpadto;

21Suutenyo amin; salimetmetanyo a sititibker ti naimbag;

22Idianyo ti amin a kita ti dakes.

23Ket ti met laeng Dios ti cappia pagsantoennacayo coma a maananay; ket ti nakem ken cararua ken ti bagiyo maaywananda coma amin nga awan pacapilawanda maipaay iti idadateng ni Apotayo a Jesu-Cristo.

24Mapagtalcan ti mangayab cadacayo, isu a mangaramidto met.

25Cacabsat, icarcararagandacami.

26Cablaawanyo dagiti isu-amin a cacabsat babaen ti agep a nasantoan.

27Ipaunayunayco cadacayo gapu iti Apo, a maibasa coma daytoy a surat cadagiti isu-amin a cacabsat.

28Ti parabur ni Apotayo a Jesu-Cristo adda coma cadacayo.

← Chapter 4 Jump to: