1 Thessalonians 4

Ilokano (Ti Biblia (1973))

← Chapter 3 Jump to: Chapter 5 →

1Camaudiananna, cacabsat, dawatenmi ken bagbagaandacayo ken Apo Jesus a cas iti sinursuroyo cadacami no casano ti rebbengyo a pannagna ken panangay-ayo iti Dios, (cas ar-aramidenyo met) rumangaycayo a rumang-ay.

2Ta ammoyo no ania dagiti al-alagaden nga intedmi cadacayo gapu ken Apo Jesus.

3Ta daytoy ti pagayatan ti Dios isu ti pannacapagsantoyo; nga idianyo coma ti pannakicamalala;

4A tunggal maysa cadacayo ammona coma a salimetmetan ti asawana met laeng a mabuyugan iti kinasanto ken kinadayaw.

5Saan nga iti tarigagay ti derrep a cas la cadagiti Gentil a dida ammo ti Dios;

6Nga awan coma ti agranggas ken mangal-lilaw iti cabsatna itoy a banag; ta ti Apo isu ti bumales iti maipapan cadagitoy amin a banag; a cas met impacpacauna ken pinanecnecanmin cadacayo.

7Ta saannatayo nga inayaban ti Dios a maipaay iti kinarugit, no di iti kinasanto.

8Gapuna, dagiti sumukir, saan a tao ti paidenda, no di ket ti Dios, isu a mangted cadacayo ti Santo nga Espirituna.

9Ngem no maipapan iti ayat nga incacabsatna, saanyo a masapul ti mangisurat cadacayo: ta dacayo met laeng nasursuroancayo iti Dios iti panagayat ti maysa ken maysa;

10Ta pudno nga aramidenyo a casta cadagiti isu-amin a cacabsat nga adda iti amin a Macedonia. Ngem dawatenmi cadacayo, cacabsat, a rumang-aycayo la coma a rumang-ay.

11Ket agawaanyo coma ti agbiag a sitatalna, ket sangoenyo dagiti pagsapulanyo met laeng, ket agtrabajocayo cadagiti im-imayo, a cas iti imbagami cadacayo;

12Tapno macapagnacayo a sitatacneng cadagiti taga ruar, ket awan coma ti aniaman a pacasapsapulanyo ti tulong.

13Ngem dicami cayat nga awan ti ammoyo cacabsat, maipapan cadagiti maturog; tapno dicayo agladingit, a cas cadagiti dadduma, nga awan inanamada.

14Ta no patientayo a ni Jesus natay ket nagungar, casta met ti Dios iyegnanto dagiti maturog ken Jesus nga icuyog kencuana.

15Ta daytoy ti ibagami cadacayo babaen ti sao ti Apo: A datayo a sibibiag, datayo nga agbati agingga iti iyaay ti Apo, saantayonto nga unaan dagiti naturogen.

16Ta ti Apo met laeng aggapunto sadi langit a buyugen ti ariwawa, ti timec ti arcangel ken ti trompeta ti Dios, ket dagiti natay ken Cristo bumangondanto nga umuna;

17Calpasanna, datayo a sibibiag, datayo a mabati, maitayabtayo a maicuyog cadacuada cadagiti ululep, a sumabet iti Apo, iti tangatang; ket iti casta cancanayon nga addatayto iti Apo.

18Ngarud pangliwliwayo iti maysa ken maysa dagitoy a sasao.

← Chapter 3 Jump to: Chapter 5 →