Ecclesiastes 10

Ilokano (Ti Biblia (1973))

← Chapter 9 Jump to: Chapter 11 →

1Dagiti natay a ngilngilaw pataudenna iti dakes nga angot iti lana ti agaramid iti bangbanglo; casta ti bassit a kinamaag nadagdagsen ngem ti sirib ken dayaw.

2Ti puso ti maysa a masirib adda iti macanawanna; ngem ti puso ti maysa a maag adda iti macatigidna.

3Wen, casta met, no magna ti maag iti dalan, ti panagawatna nacurang, ket cunana iti tunggal maysa nga isu ti maysa a maag.

4No ti espiritu ti agturay bumangon a bumusor kenca, dica panawan dayta yanmo; ta ti kinapakumbaba pasardengenna ti dackel a pannacaranggas.

5Adda maysa a dakes a nakitac iti baba ti init, cas maysa a biddut a nagtaud iti agturay:

6Ti kinamaag naisaad iti dackel a caicarian, ket ti bacnang agtugaw iti nanomo a disso.

7Nakitac dagiti ad-adipen a nacacabayoda, ken dagiti principe nga agpagpagna a cas ad-adipen iti rabaw ti daga.

8Ti mangcali iti abut matnagto kencuana; ket siasinoman a manggutbaw iti maysa a bacud, cagatento ti uleg.

9Siasinoman a mangticap cadagiti batbato madunorto cadacuada; ket ti mangpisi iti cayo agpeggad kencuana.

10No ti landoc mauped, ket awan ti mangasa ti tademna, maipapilit a maaramat iti ad-adda a pigsa: ngem ti sirib isu ti macagunguna a mangiturong.

11No ti uleg cumagat iti sacbay ti pannacapaamona, no casta saan a magundawayan ti mangpaamo.

12Dagiti balicas ti ngiwat ti maysa a masirib naparaburda; ngem dagiti bibig ti maysa a maag alununendanto ti bagina met laeng.

13Ti punganay dagiti balicas ti ngiwatna kinamaag; ken ti gibus ti panagsaona isu ti macaranggas a kinamauyong.

14Ti maag met paaduenna dagiti sasao: nupay casta saan nga ammo ti tao no anianto ti adda; ken ti addanto iti calpasanna, siasino ti macaibaga kencuana?

15Ti bannog dagiti maag utuyanna ti tunggal maysa cadacuada; ta isu dina ammo no casano ti panagudongna.

16Asica pay, O daga, no ti arim maysa nga ubing, ket dagiti pangpangoloen manganda iti bigat!

17Nagasatca, O daga, no ti arim lalaki nga anac dagiti natacneng, ket dagiti pangpangoloen manganda iti maiparbeng a tiempo, gapu iti pigsa, ket saan a gapu iti panagbartec!

18Gapu iti kinaliway agluyucan ti atep; ket gapu iti kinasadut dagiti im-ima agtedted ti balay.

19Maysa a rambac maaramid a maipaay iti catawa, ket ti arac paragsakenna ti biag; ket ti cuarta sungbatanna dagiti amin a banbanag.

20Dica pagsasaoan ti ari, saan, uray ita panunotmo; ket dica umsien ita siledmo ti bacnang: ta maysa a tumatayab dagiti langlangit ipannanto ti timec, ket dagiti addaan paypayac ibagadanto ti panggep.

← Chapter 9 Jump to: Chapter 11 →