Ecclesiastes 8

Ilokano (Ti Biblia (1973))

← Chapter 7 Jump to: Chapter 9 →

1Siasino ti cas iti masirib a tao? ken siasino ti macaammo ti caipapanan ti aniaman a banag? Ti sirib ti tao pagraniagenna ti rupana, ket ti kinarupanget ti rupana masucatan.

2Siac patigmaananca, Salimetmetam ti bilin ti ari, ken ti bilin a maipapan ti sapata ti Dios.

3Dica agdarasudos a rumuar nga aggapu iti saclangna; dica agtalinaed iti dakes a banag; ta isu aramidenna ti aniaman a macaay-ayo kencuana.

4Ta ti sao ti ari addaan pannacabalin; ket asino ti agsao coma kencuana, Ania ti aramidem?

5Asinoman a mangsalimetmet iti bilin dinanto mapadasan ti dakes a banag; ket ti puso ti maysa a masirib a tao mapaglasinna ti pannawen ken panangipato ti tiempo ken pannacaocom:

6Ta iti tunggal panggep adda pannawenna ken pannacaikeddengna; agsipud ta ti kinaay-ay-ay ti tao dackel kencuana:

7Ta isu dina ammo ti addanto; ta asino ti macaibaga no casanonto?

8Awan ti tao nga addaan pannacabalin iti rabaw ti espiritu tapno tenglenna ti espiritu; isu awanan kinaturay ti aldaw ti patay, ket awan ti panagleppasna iti gubat: uray ti kinadangcoc dina maisalacan daydiay maited kencuana.

9Amin daytoy, nakitac, ket impaayco ti pusoc iti tunggal aramid a naaramid iti baba ti init: adda pannawen a ti maysa a tao addaan pannacabalin iti sabali a maipaay iti pagdacsanna.

10Iti casta nakitac dagiti nadangcoc a naiponpon ket dimtengda iti panungpalanda; ket dagiti nagaramid a sililinteg pinanawanda ti nasantoan a yan, ket nalipatan ida ti ili: daytoy kinaubbaw met.

11Agsipud ta ti panangipato a maibusor iti dakes nga aramid saan a matungpal a sipapardas, iti casta ti puso dagiti annac dagiti tattao ipamaysada ti agaramid iti dakes.

12Uray pay ti maysa a managbasol agaramid iti dakes iti mamingasut, ket paatiddugenna dagiti aldawna, nupay casta ammoc a sipupudno a naimbagto cadagiti agbuteng iti Dios, dagiti agbuting iti sangoananna:

13Ngem dinto naimbag iti nadangcoc, dinanto paatiddugen dagiti al-aldawna, nga isuda a cas la aniniwan; agsipud ta saan nga agbuteng iti sangoanan ti Dios.

14Adda maysa a kinaubbaw a maaramid iti rabaw ti daga, nga adda tattao a nalinteg a cadacuada mapasamac ti maitutup iti aramid ti nadangcoc; casta met adda tattao a nadangcoc a cadacuada mapasamac ti maitutup iti aramid ti nalinteg: kinunac a daytoy kinaubbaw met.

15Idin dinayawco ti kinaragsac, agsipud ta ti maysa a tao awanan naim-imbag a banag iti baba ti init, ngem iti pannangan ken yiinum, ken panagragona; ta dayta makipagyanto kencuana iti nagbannoganna cadagiti amin nga al-aldaw ti biagna nga inted ti Dios kencuana iti baba ti init.

16Idi ipapusoc ti panangammoc iti sirib ken panangkitac iti aramid a maaramid iti rabaw ti daga (gapu ta adda met daytay saan a macaturog cadagiti matana iti aldaw man wenno rabii),

17Idin kinitac amin ti aramid ti Dios, a di matontonan ti tao ti aramid a maaramid iti baba ti init agsipud ta no casano ti caadu ti panagbannog ti tao nga agsukimat, nupay casta isu dinanto masaracan; wen uray pay no ti maysa a masirib a tao agpanunot a mangammo iti daydiay, cascasdi nga isu dinanto cabaelan a saraken.

← Chapter 7 Jump to: Chapter 9 →