Ecclesiastes 12

Ilokano (Ti Biblia (1973))

← Chapter 11 Jump to:

1Lagipem met ti Namarsua kenca cadagiti aldaw ti kinaagtutubom, iti sacbay ti idadateng dagiti dakes nga aldaw, ken yaadani dagiti tawen, inton cunaem, Awan ti panagragsacco cadacuada;

2Iti sacbay ti init ken lawag, ken ti bulan, ken dagiti bitbitwen, agsipngetda, ket dagiti ulep agsublida iti calpasan ti tudo;

3Iti aldaw intono agpigerger dagiti agaywan ti balay, ket dagiti napigsa a tattao agcubboda, ket dagiti aggiling sumardengda agsipud ta bassitdan, ken dagiti tuman-aw cadagiti tawtawa mapasipngetdanto,

4Ket dagiti ruangan mapunitandanto idiay lansangan; no ti daranudor ti panaggiling mapababa, ket ti maysa tumacderto gapu iti timec ti tumatayab, ket amin dagiti annac a babbai ti musica mapababadanto:

5Wen, agbutengdanto iti daydiay a nangato, ket dagiti nacakigkigtot addadanto iti dalan; ket ti almendro agsabongto, ket ti dudon maysanto nga awit, ket ti gartem mapucaw; agsipud ta ti tao mapan iti agnanayon a pagtaenganna, ket dagiti agdung-aw agsursurda cadagiti lanlansangan:

6Iti sacbay ti pannacapugsat ti lubid a pirac, wenno ti pannacaburac ti malucong a balitoc, wenno ti pannacaburac ti gorgorita idiay ubbog, wenno ti pannacaburac ti pilid idiay bubon,

7Ket agsubli ti tapoc iti daga a cas idi, ket ti espiritu agsubli iti Dios a nangted kencuana.

8Kinaubbaw dagiti kinaubbaw, cuna ti Mangascasaba; isu-amin kinaubbaw.

9Ket maysa pay, agsipud ta ti Mangascasaba nasirib, insurona met laeng ti pannacaammo iti umili; wen, isu nagpakinakem, ket inornosna dagiti adu a proverbios.

10Ti Mangascasaba sinukimatna tapno sarakenna dagiti maawat a sasao, ket ti naisurat idi a nalinteg, a dagiti met laeng sao ti pudno.

11Dagiti sasao ti mamasirib cacasda la cadagiti pagduyoc; ken cacas la cadagiti lansa a naipaloc a naimbag dagiti sasao dagiti appoen dagiti gimgimong, a maited nga aggapu iti maysa a pastor.

12Ket maysa pay, anacco, mabalacadanca: iti panagaramid cadagiti adu a liblibro awan ti gibusna; ket ti adu nga adal isu ti maysa a bantot ti lasag.

13Daytoy isu ti pagbanagan ti panggep: amin nangngegan: Agbutengca iti Dios, ket salimetmetam dagiti bilbilinna; ta daytoy isu ti dagup ti rebbeng ti tao.

14Ta ti Dios iyegnanto ti tunggal aramid iti pannacaocom, agraman tunggal nailemmeng a banag, no isu naimbag, wenno dakes.

← Chapter 11 Jump to: