Ephesians 1

Ilokano (Ti Biblia (1973))

Jump to: Chapter 2 →

1Ni Pablo, apostol ni Cristo Jesus, gapu iti nakem ti Dios, isuratna cadagiti sasanto nga adda idiay Efeso ken cadagiti mammati ken Cristo Jesus:

2Parabur cadacayo ken talna ti Dios nga Amatayo, ken ni Apo Jesu-Cristo.

3Madaydayaw coma ti Dios ken Ama ni Apotayo a Jesu-Cristo, isu a nangbendicion cadatayo cadagiti amin a kita ti naespirituan a bendicion a nailangitan ken Cristo:

4Cas iti panangpilina cadatayo kencuana (Cristo) idi saanpay a nabangon ti lubong, tapno agsantotayo ket awan ti pacapilawantay iti sangoananna:

5Idinto a iti ayat tinudingannatayo idi damo a maibilang nga annacna gapu ken Jesu-Cristo, a maipaay met la kencuana, cas ti pagayatan ti nakemna,

6Tapno pacaidayawan ti dayag ti paraburna, nga imparaburna cadatayo iti Ay-ayatenna nga Anac:

7Ket kencuana maaddaantayo ti pannacasubbot gapu iti darana, ti pannacapacawan dagiti basbasol, a mayannurot iti kinabacnang ti paraburna,

8A pinaaduna a maipaay cadatayo iti amin a sirib ken kinamanakem,

9Nga impacaammona cadatayo ti palimed ti nakemna, cas iti pagayatanna, a pinanggepna kencuana,

10A maipaay iti pannacaisagana ti pannacatungpal dagiti pannawen, tapno mapagcaycaysa dagiti amin a banbanag ken Cristo, dagiti adda sadi langit ken dagiti met adda iti rabaw ti daga; kencuana,

11Isu met a nacaaramidantayo a sanicuana, idinto a natudingantay idi, cas ti panggep daydiay agararamid cadagiti isu-amin a banag cas mayalubog iti nakemna met laeng:

12Tapno datayo maipaaytay coma a pacaidayawan ti dayagna—datayo a nanginanama ken Cristo:

13Isu a dacayo met idinto a nangngeganyo ti sao ti pudno, ti evangelio ti pannacaisalacanyo; isu met idinto a namaticayo, namarcaancayo iti Espiritu Santo ti cari,

14Isu ti tanda ti tawidtayo, a maipaay ti pannacasubbot ti sanicua ti Dios, a maipaay iti dayaw ti dayagna.

15Gapu itoy met idinto a nangngegco ti pammatiyo ken Apo Jesus, ken ti ayatyo cadagiti isu-amin a sasanto.

16Diac umingga nga ag-yaman gapu cadacayo, nga idawdawatancayo cadagiti ar-ararawco;

17Tapno ti Dios ni Apotayo a Jesu-Cristo, ti Ama ti kinadayag, ipaayannacay coma ti maysa nga espiritu ti kinasirib ken paltiing iti pannacaammo kencuana;

18A malawagan coma dagiti matmata ti pannacaawatyo, tapno maammoanyo coma no ania ti inanama ti panangawisna, no ania dagiti kinabacnang ti dayag ti ipatawidna cadagiti sasanto.

19Ken no ania a naindaclan unay ti pannacabalinna, cadatayo a mamati cas iti panagar-aramid ti pigsa ti pannacabalinna.

20Nga inaramatda ken Cristo, idi pinagungarna cadagiti natay, ket impatugawna iti macanawanna cadagiti yan a nailangitan,

21A nangatngato unay ngem ti amin a gobierno ken agturay ken pannacabalin ken kinaapo, ken iti isu-amin a nagan a managanan, saan la a daytoy a pannawen, no di ket iti mapasungad pay:

22Ket incabilna dagiti amin a banbanag iti babaen dagiti sacsacana, ket isu insaadna nga ulo cadagiti isu-amin a banag iti Iglesia,

23Isu a bagina, ti pannacaananay daydiay mangpunno amin cadagiti isu-amin.

Jump to: Chapter 2 →