Ephesians 6

Ilokano (Ti Biblia (1973))

← Chapter 5 Jump to:

1Annac agtulnogcayo cadagiti dadackelyo gapu iti Apo; ta daytoy nalinteg.

2Dayawem ni amam ken ni inam, (nga isu ti umuna a bilin nga adda carina),

3Tapno naimbag ti lac-ammo ket atiddag ti biagmo iti rabaw ti daga.

4Ket dacayo nga amma, dicay ruroden dagiti annacyo, no di ket idalanyo ida iti alagaden ken pammagbaga ti Apo.

5Dacayo a paad-adipen, agtulnogcayo cadagiti appoyo a tattao, a mabuyugan ti buteng ken pigerger, iti kinadalus ti pusoyo, a cas ken Cristo;

6A dicay agservi iti mata, a cas cadagiti umagawa a mangay-ayo cadagiti tattao, no di ket, cas adadipen ni Cristo, agaramidcayo a napusoan iti pagayatan ti Dios;

7Nga agservicayo a siaayat, a cas la maipaay iti Apo, ket saan a cadagiti tattao:

8A siammocayo nga uray ania a banag a naimbag nga aramidento ti tunggal maysa, adipen man wenno saan, awatennanto ti supapacna iti biang ti Apo,

9Ket dacayo nga appo, casta met ti aramidenyo cadacuada, ket baybay-anyo dagiti panangam-ames; a siammocayo a ti Apoda ken Apoyo adda sadi langit, ket awan ti pagdudumaan dagiti tattao kencuana.

10Panungpalanna, cacabsat, agsarikekedcayo iti Apo ken iti pigsa ti pannacabalinna.

11Icawesyo ti amin a cabal a nadiosan tapno mabalinyo ti agtalinaed a bumusor cadagiti pangal-lilaw ti sairo.

12Ta ti pannakidangadangtayo saan a maibusor iti lasag ken dara, no di ket cadagiti ar-ari, cadagiti mannacabalin, cadagiti agturay iti lubong daytoy a sipnget, cadagiti espiritu ti kinadakes idiay ngato.

13Gapuna, alaenyo ti amin a cabal a nadiosan, tapno mabalinyo ti sumarikedked inton dakes nga aldaw, ket inton naisaganayon amin, addacayo a sititibker.

14Bumilegcayo ngarud a sibabarikescayo iti kinapudno, ken sicacawescayo iti cabal ti kinalinteg,

15Ket sisasapatozcayo iti pannacaisagana iti evangelio ti cappia;

16Nangrona unay, alaenyo a calasag ti pammati, isu a mabalinyonto a pangsarapa cadagiti isu-amin a dumardarang a gayang ti sairo.

17Alaenyo met a pannacacabal ti ulo, ti pannacaisalacan, ken ti campilan ti Espiritu, nga isu ti sao ti Dios:

18Nga agdawdawatcayo a cancanayon babaen ti Espiritu cadagiti dawdawat ken carcararag ket agsalucagcayo ti maipaay itoy a mabuyugan ti amin a panagtalinaed ken panangidawdawat cadagiti isu-amin a sasanto,

19Ken gapu caniac, tapno maited coma caniac ti Sao agraman ti panagsao a situtured tapno ipacaammoc ti palimed ti evangelio,

20Gapu iti daytoy siac ti maysa a babaonen a nacawaran; tapno kencuana macapagsaoac coma a situtured, a cas rebbengco a panagsao.

21Ngem tapno ammoyo met dagiti banbanag a maipapan caniac ken ti casasaadco, ni Tiquico, ayayaten a cabsat ken mapagtalcan a ministro iti Apo, ipacaammonanto amin cadacayo:

22Isu nga imbaonco cadacayo, gapu itoy met laeng, tapno maammoanyo ti maipapan cadacami, ken tapno isu liwliwaenna dagiti puspusoyo.

23Talna coma cadagiti cacabsat, ken ayat a buyugen ti pammati, iti biang ti Dios Ama ken ni Apo Jesu-Cristo.

24Ti parabur adda coma cadagiti isu-amin nga agayat a di-agressat ken Apotayo a Jesu-Cristo.

← Chapter 5 Jump to: