Ephesians 3

Ilokano (Ti Biblia (1973))

← Chapter 2 Jump to: Chapter 4 →

1Gapu itoy, siac ni Pablo, a balud ni Cristo Jesus, gapu cadacay a Gentil,

2No casta a nadamagyo ti pannacaaywan ti parabur ti Dios, a naited caniac a maipaay cadacayo;

3Ta gapu iti palti-ing naipacaammo caniac ti palimed, cas insuratco iti ababa a sao:

4A no basaenyo, maawatanyo ti pannacacaammoc iti palimed ni Cristo;

5Isu a cadagidi sabsabali a caputotan saan a naipacaammo cadagiti annac dagiti tattao, cas iti pannacaipalti-ingna ita cadagiti sasanto nga apostol ken mammadto babaen ti Espiritu;

6A dagiti Gentil makipagtawidda ken makipagcamcamengda iti bagi, ket makiranudda iti naicari ken Cristo Jesus, gapu iti evangelio.

7Gapu itoy naaramidac a ministro cas iti sagut daydi parabur ti Dios a naited caniac, cas iti panangaramid ti pannacabalinna.

8Caniac, a siac ti canomoan cadagiti isu-amin a sasanto, naited daytoy a parabur ti panangicascasabac cadagiti Gentil dagiti di matucod a kinabacnang ni Cristo;

9Ken ti panangilawlawag cadagiti amin a tattao, no ania ti ornos ti palimed, a nanipud idi damo nailemmeng iti Dios, a namarsua cadagiti amin a banbanag;

10Tapno ita gapu iti Iglesia, maipacaammo coma cadagiti panguloen ken agturturay cadagiti yan a nailangitan, ti nadumaduma a kinasirib ti Dios.

11A mayannurot iti gandat nga agnanayon a tinungpalna ken Cristo Jesus, nga Apotayo:

12Isu a pacagun-odantayo ti wayawaya ken pacaasicgantayo a sitatalged iti Dios, gapu iti pammatitayo kencuana.

13Gapuna dawatec a dicay maupay gapu cadagiti rigrigat a sagabaec gapu cadacayo, ta isuda ti pacaidayawanyo.

14Gapu itoy, irucnoyco dagiti tumengco iti sangoanan ti Ama,

15Isu a pangalaan ti nagan ti amin a sangacabbalayan idiay langit ken ditoy daga,

16Tapno ipaayna coma cadacayo, cas iti kinabacnang ti dayagna a mapapigsacayo iti pannacabalin, iti tao a makin-uneg; gapu iti Espirituna,

17Tapno agnaed coma ni Cristo cadagiti puspusoyo, gapu iti pammati; tapno idinto nga agramutcayo ket macimientoancayo ken ayat,

18Mabaelanyo coma a maawatan, agraman dagiti amin a sasanto, no ania ti caacaba ken caatiddug, ken ti cangato ken cauneg,

19Ken maammoan ti ayat ni Cristo, nga atiwenna ti amin a pannacaammo; tapno mapnocayo iti isu-amin a pannacapunno ti Dios.

20Ket iti daydiay mannacabalin nga agaramid iti di matucod nga ad-adu ngem iti dagup ti isu-amin a mabalintayo a dawaten, wenno panunuten, cas iti pannacabalin nga agaramid cadatayo,

21Maipaay coma kencuana ti dayaw iti Iglesia ken ni Cristo Jesus, cadagiti isu-amin a caputotan nga agnanayon. Amen.

← Chapter 2 Jump to: Chapter 4 →