Ephesians 5

Ilokano (Ti Biblia (1973))

← Chapter 4 Jump to: Chapter 6 →

1Tuladenyo ngarud ti Dios, cas annac a madongdongngo;

2Ket magnacayo babaen ti ayat, a cas met ni Cristo inayatnacayo ket intedna ti bagina gapu cadatayo cas sagut ken daton, a nasayamosom ti banglona iti Dios.

3Ngem ti pannakicamalala ken ti amin a kita ti kinarugit, wenno ti agum, saan man la coma a madukit cadacayo, cas mayannugot cadagiti sasanto;

4Ket uray dagiti naalas a panagsasao, ken dagiti awan capapayanna, ken dagiti panangsursuron, banbanag a di maipaay; no di ket dagiti coma panagiaman.

5Ta pagaammoyo unay, nga amin a mannakicamalala, wenno tao a narugit, wenno naagum, isu a panagrucbab cadagiti didiosen, awan ti aniaman a tawidda iti pagarian ni Cristo ken ti Dios.

6Dicay coma paal-lilaw cadagiti sasao nga awan capapay-anna; ta gapu cadagitoy a banbanag umay ti pungtot ti Dios cadagiti annac ti kinasukir.

7Saancayo ngarud a makiraman cadacuada:

8Ta idi naminsan dacay ti sipnget, ngem ita dacay ti silaw iti Apo: magnacayo a cas annac ti lawag.

9(Ta ti bunga ti lawag pulos nga imbag ken kinalinteg ken pudno).

10A padasenyo no ania ti pagayatan ti Apo;

11Ket awan coma ti pakicadcadduaanyo cadagiti ar-aramid ti sipnget a di agbunga, no di ket babalawenyo coma ida;

12Ta dagiti banbanag nga aramidenda iti nalemmeng, nacababainda uray saritaen laeng ida.

13Ngem amin dagitoy a banbanag intono mababalawda maiparangarangda gapu iti lawag; ta amin a malawagan agbalinda a silaw.

14Gapuna masasao: Agriingca, sica a matmaturog, ket bumangonca, iti nagtengngaan dagiti natay, ket lawagannacanto ni Cristo.

15Kitaenyo ngarud a siannad no casano ti pannagnayo, saan a cas la nacuneng, no di ket cas la masirib;

16Nga cailalaanyo ti gundaway a panagaramid ti naimbag, ta dagiti al-aldaw dakesda.

17Gapuna dicay agnengnengneng, no di ket ammoenyo no ania ti pagayatan ti Apo.

18Ket dicay agbartec iti arac, isu a pagbuslonan ti kinadakes, no di ket mapnocay coma iti Espiritu;

19Nga agsasaocayo coma ti mapacuyogan cadagiti salmos ken himhimno ken naespirituan a cancancion nga icancantayo iti Apo ket itoctocaryo cadagiti puspusoyo;

20Nga agiamancayo nga agnanayon, iti Dios ken Ama, gapu cadagiti isu-amin a banbanag, babaen ti nagan ni Apotayo a Jesu-Cristo.

21Nga agtulnog ti maysa ken maysa cadacayo babaen iti panagbuteng ken Cristo.

22Dacayo babbai, agtulnogcayo cadagiti assawayo, a cas iti Apo.

23Ta ti asawa a lalaki isu ti ulo ti babai, a cas met ni Cristo isu ti ulo ti Iglesia, ket isu met laeng ti Manangisalacan iti bagi.

24Ngem cas ti Iglesia agtulnog ken Cristo, casta met a dagiti babbai agtulnogda coma cadagiti assawada iti isu-amin.

25Lallaki, ayatenyo dagiti assawayo, a cas met iti panagayat ni Cristo iti Iglesia, ket inyawatna ti bagina gapu kencuana;

26Tapno pagsantaenna, idinto nga inugasanna iti panangbuggo ti danum gapu iti sao.

27Tapno pagparangenna kencuana met laeng ti Iglesia a nadayag, nga awan ti rugitna wenno caretket wenno sabali a pacapilawan nga umas-asping, no diket coma santa ken awan tulawna.

28Castamet ti rebbeng dagiti lallaki a panagayat cadagiti assawada, a cas cadagiti bagida. Ti agayat iti asawana, ayatenna ti bagina:

29Ta nicaanoman awan pay ti gimmura iti lasagna met laeng, no di ket taraonanna ken igagana, a cas met ken Cristo igagana ti Iglesia;

30Ta datayo dagiti camcameng ti bagina.

31Gapu itoy ti lalaki panawannanto ni amana ken ni inana, ket makitiponto ken asawana: ket isuda a dua maymaysadanto a lasag.

32Daytoy a palimed dackel, ngem agsaoac a maipapan ken Cristo ken iti Iglesia.

33Nupay casta, tunggal maysa cadacayo, ayatenna coma ti asawana a babai cas iti bagina; ket ti babai padayawanna coma ti asawana.

← Chapter 4 Jump to: Chapter 6 →