Nehemiah 1

Ilokano (Ti Biblia (1973))

Jump to: Chapter 2 →

1Dagiti sarita ni Nehemias nga annac a lalaki ni Hacalias. Naaramid idi bulan ti Kisleu, idi maicaduapulo a tawen, idi addaac idiay Susan a palacio,

2A ni Hanani, maysa cadagiti cacabsatco, immay, isu ken dadduma a lallaki ti Juda; ket nagsaludsudac cadacuada iti maipapan cadagiti Judios a nacalapsut a natda iti pannacacayaw, ken maipapan iti Jerusalem.

3Ket kinunada caniac, Ti nabati a natda iti pannacacayaw idiay provincia addada iti dackel a pannacaparigat ken pannacaumsi: ti bacud ti Jerusalem met narba, ket dagiti ruanganna nauramda iti apuy.

4Ket naaramid, idi nangngegco dagitoy a sasao, a nagtugawac ket nagsangitac, ken nagdung-awac bayat iti sumagmamano nga aldaw; ket nagayunarac ken nagcarcararagac iti sango ti Dios ti langit,

5Ket kinunac, Gumawawaac kenca, O Jehova, a Dios ti langit, a dackel ken nacakigkigtot a Dios, a mangsalimetmet iti tulag ken kinamanangngaasi cadagiti agayat kencuana ken mangsalimetmet cadagiti bilbilinna:

6Umimdeng cadi ta lapayagmo ken dagita matam silulucatda coma tapno timudem ti cararag ti adipenmo, isu nga icararagco kenca itoy a tiempo, iti aldaw ken iti rabii, gapu cadagiti annac ti Israel nga adipenmo, iti bayat ti panangipudno cadagiti basbasol dagiti annac ti Israel, isui a nagbasolanmi a maicaniwas kenca. Wen, siac ken ti balay ni amac nagbasolcami.

7Nagaramidcami a sidadakes a maicaniwas kenca, ket dicami sinalimetmetan dagiti bilbilin, uray dagiti al-alagaden, uray dagiti an-annuruten, nga imbilinmo ken adipenmo a Moises.

8Gumawawaac kenca, lagipem, ti sao nga imbilinmo ken adipenmo a Moises, a kinunam, No aglabsingcayo, iwarascayto iti nagtengngaan dagiti tattao:

9Ngem no sumublicayo caniac, ken salimetmetanyo dagiti bilbilinco, ken aramidenyo ida, nupay no ti nacaipalladawanyo idiay caadayuan a paset a sangapaglangitan, nupay casta urnongecto ida manipud sadiay, ken yegconto ida idiay disso a pinilic a pangitaengac iti naganco.

10Ita dagitoy isuda dagiti ad-adipenmo ken ti ilim, a sinubbotmo iti dackel a pannacabalinmo, ken iti napigsa nga imam.

11O Apo, gumawawaac kenca, ta lapayagmo umimdeng cadi iti cararag ti adipenmo, ken iti cararag dagiti ad-adipenmo, nga agayat nga agbuteng iti naganmo; ket dawatec kenca, parang-ayem ti adipenmo itoy nga aldaw, ket itdem kencuana ti caasi iti imatang daytoy a lalaki. (Siac idi ti agiggem iti copa ti ari).

Jump to: Chapter 2 →