Nehemiah 6

Ilokano (Ti Biblia (1973))

← Chapter 5 Jump to: Chapter 7 →

1Ket naaramid idi naidamag cada Sanballat, Tobias, ken Gesem nga Arabe, ken iti matda cadagiti cabusormi, a nabangoncon ti bacud, ken awanen ti gutbaw kencuana (nupay no agingga met laeng idi a tiempo diac pay impatacder dagiti ruangan cadagiti pagsercan),

2A nagbaonda caniac da Sanballat, ken Gesem, a kinunada, Umayca, agsasaractayo coma iti maysa cadagiti purpuroc iti tanap ti Ono. Ngem pinanggepda nga aramiden caniac iti dakes.

3Ket nangibaonac cadacuada cadagiti babaonen, a kinunac, Agar-aramidac iti maysa a dackel nga aramid iti casta diac mabalin ti sumalog: apayapay a sumardeng coma ti aramid bayat ti panangbay-ac ket sumalogac agingga cadacayo?

4Ket nagbaonda caniac iti naminpat a daras a cas itoy; ket sinungbatac ida a mayannurot iti isu met laeng a wagas.

5Idin imbaon caniac ni Sanballat ti adipenna iti casta met laeng a wagas iti maicalima a daras agraman maysa a silulucat a surat iti imana,

6Isu a nacaisuratan ti castoy, Naidamag cadagiti nasnacion, ket nasao ni Gasmu, a sica ken dagiti Judios panggepenyo ti umalsa; iti dayta a gapu bangbangonem ti bacud: ket sica coma ti arida, a mayannurot cadagitoy a sasao.

7Ket nangdutocca met cadagiti mammadto a mangasaba iti maipapan kenca dita Jerusalem, a cunada, Adda maysa nga ari iti Juda: ket ita maidamagto iti ari a mayannurot cadagitoy a sasao. Gapuna ita nga umayca ket agbibinnalacadtayo coma a sangsangcatipon.

8Idin nagbaonac kencuana, a kinunac, Awan ti casta a banag a maaramid cas ti saoem, ngem pinarbom ida a nagtaud dita pusom met laeng.

9Ta isuda amin pagbutngendacam coma, a cunaenda, Cumapsutto dagiti im-imada iti aramid ket dinto malpas, Ngem ita, O Dios, papigsaem dagiti im-imac.

10Ket immuliac iti balay ni Semaias nga anac a lalaki ni Dalaias nga anac a lalaki ni Metabeel isu a nabalud idi; ket kinunana, Agtitipontayo coma idiay balay ti Dios iti uneg ti templo, ket punitantayo coma dagiti ruangan ti templo: ta umaydanto a mangpatay kenca; wen, umaydanto iti rabii a mangpapatay kenca.

11Ket kinunac, Ti lalaki a cas caniac agtaray coma? ket asino ti adda idiay, nga idinto a cas caniac sumrec coma iti templo tapno ispalenna ti biagna? Diacto sumrec.

12Ket inamirisco, ket, adtoy, isu saan nga imbaon ti Dios; no di ket binalicasna daytoy a padto a maibusor caniac: ket isu tinangdanan da Tobias ken Sanballat.

13Maipaay itoy a panggep natangdanan idi, tapno agbutengac coma, ket aramidec ti casta, ken agbasolac, ken tapno addaanda coma iti banag a maipaay iti maysa a dakes a damag, tapno maumsidac coma.

14Lagipem, O Diosco, da Tobias ken Sanballat a mayannurot cadagitoy aramidda, ken casta met ken mammadto a babbai a Noadias, ken dagiti matda cadagiti mammadto, a mamagbuteng coma caniac.

15Iti casta nalpas ti bacud idi maicaduapulo ket lima nga aldaw ti bulan ti Elul, bayat iti limapulo ket dua nga aldaw.

16Ket naaramid, idi a nangngeg dayta dagiti amin a cabusormi, nga amin dagiti nacion nga addada idi iti sibaymi, nagbutengda, ket napalidayda unay cadagiti matada met laeng; ta naawatanda a daytoy nga aramid naaramid idi a gapu iti Dios.

17Maysa pay cadagidi nga al-aldaw impaw-it dagiti natacneng ti Juda dagiti adu a surat ken Tobias, ket dagiti sursurat ni Tobias immay cadacuada.

18Ta adu idi iti Juda ti nagsapata kencuana, agsipud ta isu idi ti manugang a lalaki ni Secanias nga anac a lalaki ni Ara; ket ni Johanan nga anacna a lalaki inasawana ti anac a babai ni Mesullam nga anac a lalaki ni Berekias.

19Casta met nga insaoda iti sangoc dagiti naimbag nga aramidna, ket indamagda kencuana dagiti sasaoc. Ket ni Tobias nagibaon cadagiti sursurat a pamagbutengna caniac.

← Chapter 5 Jump to: Chapter 7 →